2 Epilli 21 - Mawu a Mulluku

¹ Vatulli viwa Yehoshafati aakhwa, avitthiwa mu mahame a makhollwaaye mu muzinda wa Davide. Nave mwanaye Yehoramu aavollowa omwene munipuroni mwaye.

Yehoramu mwene a o Yuda

² Asinne a Yehoramu yaari Yehoshafati, Azariya, Yehiyele, Zekariya, Azariyahu, Mikaele ni Shefatiya. Attheenaalla yaari anamwani a Yehoshafati mwene a o Yuda.

³ Attiitthiiwa yahaavaha emphaso ddinchichi dda siliva, golide ni ddeko ddoowallamella mutengo ni mizinda ddamipanda dda o Yuda. Koma yaamuvaha Yehoramu omwene ekaamba yawi aari mwaana awaamba.

⁴ Yehoramu avollowille omwene ni okeraattheya va mpando woomwene wa attiitthinnya aawiipha asinne attheene ni nsupada ni oohoollella amodda a o Israele.

⁵ Yehoramu aari ni miyakha 32 voovollowani omwene nave aalamulella miyakha mitthanu ni miraru mu Yerusalemu.

⁶ Aheeta mu ettilla ddoonanara dda mamwene a o Israele wonanko mmo neerella nibanja na Ahabu vawi amutthenlle mwaana a Ahabu. Sika aaneera ddoonanara vamiitthoni va Apwiya.

⁷ Komave Apwiya kheyaapanlle omoononga Yuda ekaamba ya echipangano ni Davide oorumeyelliiwa vawi Apwiya yaalonjeza wi eneeromwinnya Davide omwene woohimalla.

⁸ Va enthawi yeeyo athu a o Edomu yaawukila olamulello wa Yuda nave yahiitthoollella mweniiwa.

⁹ Vano Yehoramu aatimulla ni oohoollellaaye ni magaretaaye attheene akhoto. Aatimulla mahiiyu aya aahella ekhoto Aedomu ayo yamwaaphenlle olliye vamodda ni oohoollella a magaretaaye.

¹⁰ Sika Aedomu tti oowukila olamulello wa Yuda ophiyera ollello. Vano enthawi yeeyo muzinda wa Libina waawukilattho olamulellwaaye ekaamba yawi olliye ahaahiya Apwiya Mulluku a makhollwaaye.

¹¹ Aamaka mapuro oollapellamo mafano omiyaangoni o Yuda nave ahaahoollella athu a o Yerusalemu wi ekhalle oohiroromelleya nave ahaahollosa Ayuda ohollowa.

¹² Nave aamwaakhella kalata ovenyera wa namallotella Eliya nave aallota wi, “Apwiya Mulluku a Davide nikhollo nawo eni, ‘Khothwarille echisanzo ya Yehoshafati nikhollo nawo apaallettho ya Asa mwene a o Yuda,

¹³ koma we othwanre echisanzo ya mamwene a o Israele nave wohaahoollella athu a o Yuda ni Yerusalemu wi ekhalle oohiroromelleya wonanko mmo neeresa nibanja na Ahabu vawaachimwihani athu a o Israele. Navettho woowiipha asinno a nibanja na attiittho ayo yaari aphaama wuukhwaranya.

¹⁴ Vano ekaamba ya ddenndda, Apwiya eneeromoriha mullilli va athwaawo, anaawo ni awariyo nave eneerewoononga ddeko ddawo ddittheddene.

¹⁵ Nave oneerovoriiwa ereta yawoopiha ya m'mirimani ophiyera marupwaawo eneerokhumella otte.’ ”

¹⁶ Nave Apwiya yaamushella murima Yehoramu oyeella mwa Afilisti ni Aarabu ayo eri vakhuviru ni Akushi.

¹⁷ Vano alliwa yaallipana ni athu a o Yuda nave yahaakha ddeko ddittheddene dda mwene nnddo yaddiphwanyilliiwa vamoddattho ni anaaye aallopwana ni awariye mwawi khaarivo naari mwaana mmodda aamullopwana ahanlle ohiri Ahaziya ethwakwaaye.

¹⁸ Vatulli viwa Apwiya yaammorihella ereta ya m'mirimani yoohichiriheya.

¹⁹ Vimanlle miyakha miilli, marupwaaye yaakhumella otte ekaamba ya ereteeyo nave aakhwa moohikhalla phaama. Athwaaye kheyaakharihalle munllo woomuvaha olemu wonanko yeerelliiwa ni makhollwaaye yakhwa.

²⁰ Olliye aari ni miyakha 32 mvo aambeeye olamulella nave aalamulella miyakha mitthanu ni miraru mu Yerusalemu. Akhwilleeye khaavo naari mmodda ammorelle ethakaraka. Yaamuvittha mu muzinda wa Davide koma ohiri mu mahame a mamwene.