2 Epilli 20 - Mawu a Mulluku

Apwiya enamupambaniha ekhoto Yehoshafati

¹ Vatulli viwa Amowabu, Aamoni ni Ameuni amodda yaawa wi ewane ekhoto ni Yehoshafati.

² Athu amodda yaamulleella Yehoshafati wi, “Athu anchichi enimawa wi ewane ekhoto ni nyu ovenyera o Edomu vakhopella va enyanja nave ngoonani, eri o Hazazoni Tamara,” (sika wi Engedi).

³ Vaavo Yehoshafati ahoova nave aaganiza wi aaveke Apwiya ezeru ni ollalleya wi athu attheene a o Yuda ehalle ocha.

⁴ Vano athu attheene a o Yuda, ovenyera m'mizindani ddittheddene, yaatthukumana wi eveke nikavihero wa Apwiya.

⁵ Nave Yehoshafati ahiimella variyari va mutthukumano wa Yuda ni Yerusalemu mu nthato nanaanweene na enyumba ya Apwiya

⁶ nave aallota wi, “Nyu Apwiya Mulluku a makhollwaahu, ethiyo khemuhiyo Mulluku oyo ari oddullu? Ethiyo khemuhiyo nyu munalamulella moomwene mattheene? M'mattani mwanyu mookhalla masiva ni ottekweene, sika wi khaavo muthu anaawore ollipana ni nyu.

⁷ Nyu Mullukwaahu, ethiyo khemwaawiikanre aneetthi amwiillaponimmu ehinaphiyemo Aisraele athwaanyu nave muyivaha wa edduullu dda Abrahamu mukhwiinyu wa enthawi yoohimalla?

⁸ Vano enakhalla mwemmo nave yoomakamo enyumba ya nnddina nanyu enallota wi,

⁹ ‘Otulli woonimorella, nsupada, echiweruzo, mullilli apaalle ettalla, nineerewiimella va enyumbaanyu vawi nnddina nanyu niri vaava. Vano nineerokhuwella wa nyu ekaamba ya ddookatamiha ddahu, muneerewiiwa nave muneeronivullusa.’

¹⁰ Vano ngoonani, athu a o Amoni, Mowabu ni mwaango wa Seiri ayo mwahiwaakhullelleenyu Aisraele wi yawanena ekhoto ekhumalle o Iguputo nave yahaahiya ehiwoononga.

¹¹ Vano ngoonani, vatulli viwa enimaniikara mwiillaponi eyo mwanivahilleenyu wi ekhalle yoohallanaahu.

¹² Nyu Mullukwaahu, ethiyo yaalla khemwaallaka? Vawi hi kheninna masiva awi ttuullipanana athu enaanihelle ekhoto. Kheninna yaweera koma miitthwaahu eri va nyu.”

¹³ Enthawi yeeyo athu a o Yuda yahiimella vamiitthoni va Apwiya vamodda ni awariwa, aniiwa ni ang'onong'onweene.

¹⁴ Nave munepa a Apwiya aamukitthella Yahaziele mwaana a Zekariya mwaana a Benaya mwaana a Yeiyele mwaana a Mataniya, Mulevi, mmodda a anamwani a Asafu.

¹⁵ Olliye aallota wi, “Ngiiwani, nyu Ayuda attheene ni athu a mu Yerusalemu ni nyuttho mwene Yehoshafati, Apwiya enallota ni nyu wi, ‘Muhoove nave muhitathille murima ni waata wa athu vawi ekhotweella khe yaanyu koma ya Mulluku.

¹⁶ Osiisello khaweni mwawanena ekhoto. Enaaweelle omwaako wa Zizi nave muneerewaaphwanya wookomella ntapo, wookhuma nndduwa wa echipululu ya Yeruwele.

¹⁷ Khewupaalleyattho owanana ekhoto koma nyu mukhulle moona wiimella m'mapuroni mwanyu. Nave muwoonelleke Apwiya epambanaka ekhoto munipuroni mwanyu, nyu athu a o Yuda ni Yerusalemu.’ Muhoove nave muhitathille murima, osiisello khaweni mwawanena nave Apwiya enorokhalla ni nyu.”

¹⁸ Vaavo Yehoshafati aakokhora nave athu attheene a o Yuda ni Yerusalemu yaakokhora ellapella vamiitthoni va Apwiya.

¹⁹ Nave Alevi, edduullu dda Kohati ni Kora ddahiimella wi ddaatitimihe Apwiya Mulluku a Israele mookhuwa wunchichi.

²⁰ Vano yaavenya ohinase eya yavollowa mu echipululu ya o Tekowa. Yakhumamwiiwa Yehoshafati ahiimella allota wi, “Nyu athu a o Yuda ni a mu Yerusalemu, apelleni maaru! Aroromelleni Apwiya Mullukwaanyu nave muneerokhalla ni masiva. Aroromelleni anamallotella nave muneeropambana.”

²¹ Vano aakohilleeye ezeru athwaayo, ahaatthoolla amodda wi ewiipelleke ni waatitimiha Apwiya mu ottekweeniiwa nave yaaya vahoollo va mulloko wa akhoto ellota wi, “Athokozeni Apwiya, vawi echikondiiwa yoohisintheya tti ya o enthawi yoohimalla.”

²² Yaambille wiipa ni ollapella, Apwiya yahaareya musampha Aamoni, Amowabu ni athu a o mwaango wa Seiri ayo yawiille wi ellipane ni Ayuda mwawi yahaagonjiha athu attheene.

²³ Aamoni ni Amowabu yahaawukila athu a o mwaango wa Seiri nave yahaagonjiha. Vatulli viwa yahaamba wiiphana anayaayove.

²⁴ Nave Ayuda ephiyalle va mutunda wa o chipululu yaaweha nko waari athu anchichi nave yahoona mitembo ddiri millumillu vawi khaarivo avulluwalle.

²⁵ Vano Yehoshafati ni athwaaye yaphiyalliiwa wi ekuse ddawaakha yaaphwanya eziweto ddinchichi, katundu, ddoowara navettho ddeko ddoowallamella mutengo. Yaakusa ddeko ddinchichi mwawi ddimodda kheyaaworille odditukhulla. Yahaakha ddekonnddo mallapo mararu kaambiiwa ddahaata.

²⁶ Nllapo naneesese, yaatthukumana va ntapo na Beraka nave wenko yahaatitimiha Apwiya. Sika ekaambiiwa nipuronno ninaromolliwa wi Beraka ophiyera ollello.

²⁷ Vano athu attheene a o Yuda ni Yerusalemu moohoollelliwa ni Yehoshafati yaahokollowa moohakallalla vawi Apwiya yahaahakallalliha vawaagonjihani adaniiwa.

²⁸ Yaaphiya o Yerusalemu yiipaka magitala, azeze ni mapallapata eyaaka enyumba ya Apwiya.

²⁹ Nave moomwene mattheene yaamoova Mulluku yiiwalliiwa wi Apwiya yahaawanella ekhoto wa adaniiwa a o Israele.

³⁰ Sika mwaakhalla murendelle mu omwene muttheene wa Yehoshafati vawi Mulluku aamuvaha murendelle virive veko.

Omalla wa olamulello wa Yehoshafati

³¹ Vano Yehoshafati ahaamba olamulella o Yuda. Olliye avollowille omwene ari ni miyakha 35 nave aalamulella o Yerusalemu miyakha 25. Amennya yaari Azuba, mwaana a Shili.

³² Yehoshafati aathwara echisanzo yaphaama ya attiitthinnya, khaahiyalle ddennddo. Aaneera echilungamo vamiitthoni va Apwiya.

³³ Komave mapuro oollapellamo mafano kheyaavenyihallevo, athu yaari ehinavelleelle mirima ddiwa wa Mulluku a makhollwiiwa.

³⁴ Vano mitteko ddimodda ddittheddene dda Yehoshafati ovenyera vawaamba ophiyera wookomella wiwa ddaalembiwa mu epilli ya Yehu, mwaana a Hanani, eyo eri mu nibukhu na epilli ya mamwene a o Israele.

³⁵ Vatulli viwa Yehoshafati mwene a o Yuda ahiiwanana ni Ahaziya mwene a o Israele oyo eera ddoonanara.

³⁶ Ahiiwanana voopangani esitima ddooyaana o Tarishishi nave yaddipangille o Eziyoni Gebere.

³⁷ Vano Eliyezere mwaana a Dodavahu a o Maresha aallotella ddoomunanara Yehoshafati wi, “Ekaamba yawi mohiiwanana ni Ahaziya, Apwiya eneerewoononga nnddo mupangilleenyu.” Sika esitimannddo ddahoonongeya, kheddaaphiyalle o Tarishishi.