2 Epilli 2 - Mawu a Mulluku

Okhozekella omaka enyumba ya Apwiya

¹ Vano Solomoni aasimikiza ddoomaka enyumba ya Apwiya navettho enyumbaaye yoomwene.

² Nave Solomoni ahaalemba allopwana 70,000 ootukhulla katundu, 80,000 oopwesa malluku o ellapo yamiyaango navettho 3,600 owaawehera athwaayo.

³ Vano Solomoni aarumiha mawu wa Huramu mwene a o Tiro wi, “Mukeerelle wonanko mmo mweerelleenyu ni attiitthaaka Davide vawaarumihellani miteekho ddamukunguza wi emakelle enyumbiiwa wi ekhallekemo.

⁴ Kinapaalla wi kaamakelle enyumba Apwiya Mullukwaaka. Wenko moohihiyerera kineerekovelleella wa alliwa lubani* na nthuko naphaama, buledi oopatuleya ni mikutho ddooshellelliha ohinase ni misikuwa, va masabata, va mallapo a Ehakallallo ya Wooneya wa Mweeri ni mallapo mamodda aweella voothwarani malamulo a Israele wa enthawi yoohimalla.

⁵ Enyumba kinaamakeemi enaakhalle yuullupalli vawi Mullukwaahu tti muullupalli okhwaranya milluku ddittheddene.

⁶ Koma ttaani anaawore waamakella enyumba vawi oddullu woowellesesa khonaakwakhwanella? Mi kiri aani awi ttuuwora waamakella enyumba ohiri nipuro nawoosellavo lubani vamiitthoni viwa?

⁷ Vano mukirumihelle muthu eeruso voopharani mitteko ni golide, siliva, mukuwa ni mukoko navettho eeruso ni ekuwo yabululu ni yoofiira moohiyanahiyana ni oodduwella ogoba. Akhalle vamodda ni eeruso ayo eri ni mi o Yuda ni o Yerusalemu ayo attiitthaaka Davide yakinnyalliiwa.

⁸ Mukirumihellettho matabwa a mukunguza, murompwa ni mpawa ovenyera o Lebanoni vawi kinnadduwella wi mullupa muttekwaanyu ennaphadda phaama miteekho o Lebanoni. Sika mullupa muttekwaaka enaakhalle ni mullupa muttekwaanyu

⁹ wi ekiphaddere miteekho ddawaata vawi enyumba kinapaallaami omaka tti yuullupalli ni yawunnuwa.

¹⁰ Allupa muttekwaanyu oophadda miteekho kineerewaavaha tirigu awuuputha mataani 2,000, malita 400,000 a vinyo navettho malita 400,000 a makhura.”

¹¹ Vano Huramu, mwene a o Tiro aamwaakhulla Solomoni voomulembellani kalata wi, “Ekaamba yawi Apwiya ennaakonda athwiiwa yohuukeraatthiha wi okhalle mweniiwa.

¹² Etitimihiwe Apwiya Mulluku a Israele ayo yaphatusalle oddullu ni ellapo yavatthi, ayo yamuvahille mwene Davide mwaana eezeru, oodduwella ni awiiwesesa phaama ddeko awi amake enyumba ya Apwiya ni wiimakella yeekha enyumba yoomwene

¹³ Vano koomurumiha muthu eezeru ni eeruso nnddina naye Huramuabi,

¹⁴ mwaana oyo amennya tti mutthiyana a o Dani nave attiitthinnya yaari a o Tiro. Olliye tti eeruso va mitteko dda golide, siliva, mukuwa, mukoko, malluku ni matabwa navettho eeruso ni ekuwo yabululu ni yoofiira moohiyanahiyana navettho yabafuta aphaama. Nave annawora mitteko ddittheddene ddoogoba ni opanga erive epulani munaamwinnyeenyu. Sika aphare mutteko ni mullupa muttekwaanyu, ni mullupa mutteko a apwiyaaka Davide attiitthaanyu.

¹⁵ Sika vano nirumihelleni tirigu, barele, makhura ni vinyo nnddo mwalonjenzeenyu.

¹⁶ Nave nineerophadda ddirive miteekho munapaalleenyu ovenyera o Lebanoni ni owaana wa nyu vooddimakani vamodda ni oddibellusa vanyanjani ophiya o Yopa ni oyaana o Yerusalemu.”

Waamba omaka enyumba ya Apwiya

¹⁷ Vano Solomoni aheerenga alleto attheene ayo yaari mu Israele wonanko Davide attiitthinnya khalle. Nave yaakwakhwana 153,600.

¹⁸ Sika Solomoni ahaalemba allopwana 70,000 ootukhulla katundu, 80,000 oopwesa malluku o ellapo yamiyaango navettho 3,600 owaawehera athwaayo.