2 Epilli 19 - Mawu a Mulluku

Namallotella Yehu anamuhumullulla Yehoshafati

¹ Yehoshafati mwene a o Yuda aahokollweella owaniwa o Yerusalemu mwamurendelle.

² Koma Yehu mwaana a oollohella Hanani aakhuma wi akumanena nave aamukoha mwene Yehoshafati wi, “Ethiyo tti woopaalleya waakavihera athu oochimwa ni waakonda ayo enawiita Apwiya? Ekaamba ya yeella osha murima wa Apwiya wohuumorellani.

³ Komave ddookhallavo ddimodda ddaphaama mweerilleenyu vawi mwahoononga mafano a Asherimu mwiillaponimmu nave munnamullapella Mulluku ni murimaanyu muttheene.”

Yehoshafati anapotokosattho mallapello

⁴ Yehoshafati akhalla o Yerusalemu nave aanaweetella athu ovenyera o Beeresheba ophiya o ellapo yamiyaango ya Efuremu ni waahokollosella wa Apwiya Mulluku a makhollwiiwa.

⁵ Ahaatthoolla athu aweeruza mwiillaponimmo m'mizindani ddittheddene dda Yuda, orive muzinda.

⁶ Nave aallota wa aweeruzaayo wi, “Muganizereke phaama ddaweera ddanyu vawi khemuneeruza mu nnddina na muthu koma na Apwiya nave eri ni nyu mwaaweeruzaka.

⁷ Vano muwooveke Apwiya. Muganizeke va nnddo muneerekeenyu vawi Apwiya Mullukwaahu tti oolungama nave khenaweha ekhove apaalle waakhella ddamukaphwani.”

⁸ Mu Yerusalemu Yehoshafati ahaatthoolla Alevi ni allupa mukutho ni oohoollella mabanja a Israele wi yeeruzeke mu nnddina na Apwiya ni okamulla millatu dda athu a o Yerusalemu.

⁹ Ahaavaha malangizo awi, “Muphareke mitteko ddanyu moowoova Apwiya ni moororomelleya ni murimaanyu muttheene.

¹⁰ Vakhalla mullatu wa abalaanyu ayo enakhalla m'mizindani ddiwa, apaalle mullatu wawiipha apaalle woohiiwellella malamulo ni malangizo apaalle ddookamulla ddimodda, mwaalangizeke wi ehichimweke vamiitthoni va Apwiya. Sika Apwiya kheyuushellani murima ni abalaanyu. Mweereke ddiiddo wi muhichimwe.

¹¹ Nave ngoonani, Amariya mullupa mukutho muullupalli sika anuuhoollellekeni mu ddaweereya ddittheddene dda Apwiya. Nave Zebadiya mwaana a Ishmaele enduna ya Yuda sika anaawehereke ddittheddene dda mwene. Nave Alevi eneerewuurumeyellani monga akapitawo. Mweereke ddenndda moollipa murima nave Apwiya eneerokhalla ni oolungama.”