2 Epilli 18 - Mawu a Mulluku

Namallotella Mikaya anamuchenjeza Ahabu

¹ Yehoshafati aakhalla ni eyuuma yinchichi nave aanavahiwa olemu. Vano yaakeraatthiha mwiiwanano wa okwati ni nibanja na Ahabu.

² Viviralle miyakha ddimodda Yehoshafati aaya wa Ahabu o Samariya. Ahabu ahiipha enkhosa ni eng'ombe ddinchichi omwiiphella Yehoshafati ni athu aariiyena voomukopani wi allipane ni muzinda wa Ramoti Giliyadi.

³ Ahabu mwene a o Israele aallota wa Yehoshafati mwene a o Yuda wi, “Ethiyo oneerothaanana ni miyaano o Ramoti Giliyadi?” Olliye ahaakhulla wi, “Mi kiri ni nyuwaano nave athwaaka tti aanyu. Hiyaano ninaakhalle ni nyuwaano vakhotoni.”

⁴ Nave Yehoshafati aallota wa mwene a o Israele wi, “Vawaamba muveke ezeru wa Apwiya.”

⁵ Vano mwene a o Israele ahaatthukumaniha anamallotellaaye 400 aakoha wi, “Ethiyo niye nawane ekhoto ni Ramoti Giliyadi apaalle kihiyeewo?” Anamallotellaayo yaamwaakhulla wi, “Khaweni vawi Mulluku aneerowuvelleella muzindooyo m'mattani mwanyu.”

⁶ Koma Yehoshafati aakoha wi, “Ethiyo khaavo namallotella mmodda a Apwiya wi nivekewo ezeru?”

⁷ Ahabu aamulleella Yehoshafati wi, “Ookhallavo Mikaya mwaana a Imila. Koma kinniitanana kaambiiwa khanallotella ddaphaama dda miyaano, erive enthawi ddoonanarave.” Yehoshafati aamwaakhulla wi, “Ohilloteke ddiiddo.”

⁸ Vano Ahabu ahiithana emodda mwa enduna ddaye ayilleella wi, “Khawe wamwiithane Mikaya mwaana a Imila awe wuno mwawaakuva.”

⁹ Enthawi yeeyo mwene a o Israele ni mwene Yehoshafati a o Yuda yaakeraatthi m'mipandoni ddiwa ddoomwene ewanre ddoowara ddiwa ddoomwene va nipuro noomuuputhellavo tirigu va mullako wa Samariya. Nave anamallotella attheene yaallotella vamiitthoni va mamwenaayo.

¹⁰ Vano Zedekiya mwaana a Kenana ahiihanella manyaka amikoko allota wi, “Apwiya enallota wi, ‘Ni ddenndda muneerewaagonjihella Asiriya ophiyera yoonongeyille.’ ”

¹¹ Anamallotella attheene yaallotella emoddamoddave wi, “Khaweni o Ramoti Giliyadi nave muneeropambana. Apwiya ewuuvelleella muzindooyo m'mattani mwa amwene.”

¹² Amithenga olle ayiille woomwiithana Mikaya aamulleella wi, “Ngoonani, enallota anamallotella attheene enaallotella amwene ddaphaama. Sika nanyeenettho mullotelle emoddamoddave. Mullotelleke ddaphaama.”

¹³ Koma Mikaya aallota wi, “Kinimallupella vamiitthoni va Apwiya wi kinaallote nnddo Mullukwaaka anaakilleelleeye.”

¹⁴ Vano aphiyalle wa amwene yaamulleella wi, “Mikaya, ethiyo hiyaano nawane ekhoto o Ramoti Giliyadi apaalle kihiyeewo?” Olliye ahaakhulla wi, “Khaweni, muneeropambana, athwaayo eneerovelleelliwa wa nyuwaano.”

¹⁵ Koma mwenooyo yaamukoha wi, “Ethiyo kuullupellihe okavi wi okilleelle ddawoona mu nnddina na Apwiya?”

¹⁶ Mikaya ahaakhulla wi, “Kaawoona Aisraele attheene emwareyelle va miyaango wonanko enkhosa ddoohikhalla ni mbusa.” Sika Apwiya yaallota wi, “Yaalla khenna pwiiwa owaahoollella. Arive muthu ayeeke owaniwa mwamurendelle.”

¹⁷ Mwene a o Israele aamukoha Yehoshafati wi, “Ethiyo Nguulleelle wi yoolla khawa akillotella ddaphaama koma ddoonanarave?”

¹⁸ Vano Mikaya aallota wi, “Sika iwellellani mawu a Apwiya. Mi kaawoona Apwiya ekeraatthille va mpandwiiwa woomwene ni angelo attheene yiimenlle onnattanatta ni wuunyotthoni wiwa.

¹⁹ Apwiya yaakoha wi, ‘Ethiyo ttaani anaamulleke Ahabu mwene a o Israele wi iiphiwe o Ramoti Giliyadi?’ Mmodda allota ddimodda mmodda ddimodda.

²⁰ Vaavo munepa mmodda waaphiya vakhuviru ni Apwiya ollota wi, ‘Mi kineerooya kamulleke.’ Vano Apwiya yaawukoha wi, ‘Onaamulleke mwawiidde?’

²¹ Munepooyo waawaakhulla wi, ‘Kinaya kalloteke ddawoottha oyeella mwa anamallotellaaye attheene.’ Sika Apwiya yaallota wi, ‘Weera ddiiddo, oneeropambana. Khawe wamulleke.’

²² Nave Apwiya aahiya munepa wawoottha mwa anamallotellaanyu attheene wi yoottheke koma Apwiya aallotella wi otulli oneerewuumorellani.”

²³ Vano Zedekiya, mwaana a Kenana, aaphiya vakhuviru amuukutha Mikaya vanramani, amukoha wi, “Ethiyo munepa a Apwiya avenyille mwawiidde mwa miyaano allota ni weyaano?”

²⁴ Mikaya ahaakhulla wi, “Oneerodduwella va nllapo nno onaayeewe wiipitthe mu echipinda yamuwari.”

²⁵ Vano Ahabu, mwene a o Israele aallota wi, “Muphareni Mikaya mumuyeena wa Amoni, muullupalli a muzinda ni wa Yowashi mwaana a mwene.

²⁶ Mwaalleelle wi mwene anallota wi, ‘Muhiyeni muthoolla mu endende nave mumvaheke ddoocha ni maaddi vang'ono ophiyera kihokollowillewo phaama.’ ”

²⁷ Mikaya aallota wi, “Mwahokollowawo phaama sika wi Apwiya khellotille oweella mwa miyaano.” Nave aavirellella wi, “Nyu athu attheene, iwani killotilleeminndda!”

Okhwa wa Ahabu

²⁸ Vano mwene Ahabu a o Israele ni mwene Yehoshafati a o Yuda yaaya o Ramoti Giliyadi.

²⁹ Mwene a o Israele aamulleella Yehoshafati wi, “Mi kineeroddiipitthiha vooyaani okhotoninko koma we oware ddoowara ddawo ddoomwene.” Sika mwene a o Israele aaddiipitthiha attheenaayo eya okhotoni.

³⁰ Vano mwene a o Siriya ahaalamula athu aweetiha magareta wi ehiwane ekhoto ni arive muthu, mung'onong'ono apaalle muullupalli koma ni mweneve a o Israele.

³¹ Vano oohoollella akhoto a va magaretaayo yamoonilliiwa Yehoshafati yaallota wi, “Ddawoona, olla sika mwene a o Israele.” Sika yaahokollowa wi ewanena koma Yehoshafati ahaamba winlla mookhuwa Apwiya emukavihera nave Mulluku ahaavenyihawo akhotwaayo.

³² Nave oohoollellaalle yamoonilliiwa wi khe mwene a o Israele, yaahokollowa oohimwiikariha.

³³ Koma muthu mmodda aakunga muuraaye avokha mpaamba mooshisha amuhomana mwene a o Israele mookumanella mwa malaya amukoko akhoto. Vaavo mwenooyo aamulleella muthu oowella va nigareta naye wi, “Rukunuwa nave okivenyihevo va nipuro na ekhotonna vawi koophoreya.”

³⁴ Nllapo nenno ekhoto yahunnuwa wunchichi mwawi mwenoolle yamuhiyalle akeraatthille mu nigareta mwaye moowehana ni Asiriya ophiyera aakhwa misikuwa.