2 Epilli 17 - Mawu a Mulluku

Omwene wa Yehoshafati

¹ Yehoshafati mwaana a Asa aavollowa omwene munipuroni mwa attiitthinnya nave aallipa murima wi awane ni Aisraele.

² Aahiya milloko dda ekhoto mu mizinda dda mipanda ddittheddene dda Yuda nave aatthipella misasa ddakhoto mu ellapo ya Yuda ni o mizinda dda Efuremu nnddo attiitthinnya yaakhilliiwa.

³ Apwiya yaari ni Yehoshafati ekaamba yawi aakhalla ni makhallello akhalle a attiitthinnya oohaallapella Abaala,

⁴ koma amullapella Mulluku a makhollwaaye, aniiwellella malamulwaaye oohithwara mmo Aisraele yakhallelliiwa.

⁵ Sika Apwiya yaawukeraatthiha omwenooyo m'mattani mwaye. Athu attheene a o Yuda yakhoma musonkho wa Yehoshafati. Sika aakhalla ni eyuuma yinchichi nave aanavahiwa olemu.

⁶ Olliye aahiya murimaaye va waathwara Apwiya. Waanjerera vaavo, aakumulla mapuro oollapellamo mafano ni mafano a Asherimu a o Yuda.

⁷ Muyakha waneeraru wa omwenaaye aaruma enduna ddaye, Benihali, Obadiya, Zekariya, Netanele ni Mikaya wi yahuddihe o mizinda dda Yuda.

⁸ Ayiillewo ni Alevi monga Shemaya, Netaniya, Zebadiya, Asahele, Shemiramoti, Yehonatani, Adoniya, Tobiya ni Tobadoniya. Alevi yaalla yaari ni allupa mukutho Elishama ni Yehoramu.

⁹ Yahuddiha o Yuda eri ni nibukhu na malamulo a Apwiya. Nave yaheetella mizinda ddittheddene dda o Yuda ehuddihaka variyari va athu.

Masiva a Yehoshafati

¹⁰ Vano moomwene mattheene yaanawoova Apwiya nave kheyaawanillettho ekhoto ni Yehoshafati.

¹¹ Afilisti amodda yaawaana emphaso wa Yehoshafati ni siliva a musonkho. Nave Arabu yaawaanattho anankhoro a enkhosa 7,700 ni anankhoro a epuri 7,700.

¹² Vano masiva a Yehoshafati yahunnuwa. O Yuda aamakawo mipanda ni mizinda ddoosungellawo ddeko

¹³ nave aakhalla ni enyumba ddoosungellamo ddeko. Aakhalla ni akhoto amasiva ni oollipa murima mu Yerusalemu.

¹⁴ Ella sika yaari echiwerengero moollikana ni mabanjiiwa. O Yuda oohoollella a athu anchichi yaari Adina oyo aari ni akhoto amasiva 300,000,

¹⁵ Yehohanani aari ni akhoto 280,000

¹⁶ ni Amasiya mwaana a Zikiri oyo iivelleelle o mutteko wa Apwiya mwa opaalla waye aari ni akhoto amasiva 200,000.

¹⁷ O Benjamini, oohoollella yaari Eliyada, akhoto amasiva, oyo aari ni akhoto 200,000 ayo yaari ni miira ni ddawiitetezellana,

¹⁸ Yozabadi oyo aari ni akhoto 180,000 ayo yaari okhozeka phaama ekhoto.

¹⁹ Yaalla sika yamurumeyella mwene woonjerera va ayo mwene aahiyalleeye mu mizinda ddamipanda mu ellapo ettheene ya Yuda.