2 Epilli 16 - Mawu a Mulluku

Asa anakumana ni ddookatamiha ovenyera wa Aisraele

¹ M'muyakha wa 36 wa olamulello wa Asa, Baasha mwene a o Israele ahaambiha owana ekhoto ni Yuda, allipiha muzinda wa Rama m'malireni wi aahiihe athu ovollowa apaalle okhuma mu ellapo ya Asa a o Yuda.

² Vano Asa aamukusa siliva ni golide oyo ahanlle moosungellamo eyuuma mu enyumba ya Apwiya ni mu enyumba yoomwene addirumiha wa Benihadadi, mwene a o Siriya oyo akhalla o Damasiko nave aallota wi,

³ “Vikhalle mwiiwanano variyari va miyaano ni weyaano wonanko mmo attiittho ni attiitthaaka yiiwananelliiwa. Ngoona, kohuurumihella emphaso ddasiliva ni ddagolide. Oye wamallihe mwiiwananwaawo ni Baasha, mwene a o Israele, wi aavenyihemo akhotwaaye mu echigawaaka.”

⁴ Mwene Benihadadi ahaakhullella ddallotiwe ni Asa. Sika ahaaruma oolamulella ekhoto ni akhotwiiwa wi yawane ekhoto mu mizinda dda o Israele. Nave yaagonjiha mizinda dda Iyoni, Dani, Abele Maimu ni mizinda ddittheddene dda o Nafutali ddoosungellamo katundu.

⁵ Vano Baasha iiwalleeye ddenndda aahiya ollipiha muzinda wa Rama nave aahiya muttekooyo.

⁶ Vano mwene Asa ahaaphara Ayuda attheene nave yaavenyihawo malluku ni miteekho nnddo Baasha allipiheeyena muzinda wa Rama. Ddenndda Baasha aaddiphariha mutteko voomakellani mipanda m'mizindani dda Geba ni Mizipa.

⁷ Enthawi yeeyo namallotella Hanani aawa wa Asa mwene a o Yuda amulleella wi, “Ekaamba yawi mwaroromelle va mwene a o Siriya, ahaaroromella Apwiya Mullukwaanyu, mulloko wa ekhoto wa mwene a o Siriya wohuuthawellani.

⁸ Ethiyo Akushi ni Alibiya kheyaari akhoto anchichi ookhalla ni magareta ni athu aweetiha akavalo awaata? Koma ekaamba yawi mwaaroromella wa Apwiya, yahaavelleella wa nyuwaano.

⁹ Miittho a Apwiya ennoona ddittheddene dda va ellapo yavatthi wooniha masiviiwa wa athu ayo enaaroromella. Nyu mookarangeyathi. Vano ekaamba ya yeella waambeella ollello munaakhallelleke owana ekhoto.”

¹⁰ Vaavo Asa aamushella murima oollohellooyo nave aamumaka amuhiya mundende. Nave enthawi yeeyo Asa ahaahoosa athu amoddattho.

Okhwa wa Asa

¹¹ Vano ddaweera dda Asa ovenyera vawaamba ophiyera vamakomihero ddoolembiwa mu nibukhu na epilli ya mamwene a o Yuda ni Israele.

¹² Muyakha wa 39 wa olamulellwaaye Asa ahaamba ovoriiwa ereta ya manyallo nave ereteeyo yaavirellella komave khaawaashaasha Apwiya koma akaviheriwa ni amasenga.

¹³ Sika Asa aakhwa muyakha wa 41 wa olamulellwaaye nave aavitthiwa ni makhollwaaye.

¹⁴ Yamuvitthalle m'mahame ayo iisemelleeye mu muzinda wa Davide. Mutembwaaye yawukonaatthihalle mu nibokosi mmo mwaari ddawunkhella ddoohiyanahiyana nnddo ddapangiwe ni athu eeruso. Vano yaaviddeella munllo wawoopiha omuvaha olemu.