2 Epilli 15 - Mawu a Mulluku

Asa anakhoza mallapello

¹ Munepa a Mulluku aamukitthella Azariya mwaana a Odedi

² nave aakumana ni Asa allota wi, “We Asa, kaapelle maaru, nyu Ayuda ni Abenjamini attheene, Apwiya eri ni nyuwaano enthawi ddittheddene mwaawaaroromellaka. Mwaawaashaashaka muneerewaaphwanya koma mwaahiya eneerewuuhiyani.”

³ Vawi wa enthawi yoorekama Aisraele kheyaarina Mulluku awoona nave kheyaarina mullupa mukutho owaahuddiha navettho kheyaarina malamulo,

⁴ koma mvo yaariiwa mu ddookatamiha nave erukunuwa, ewaashaasha Apwiya Mulluku a Israele, yahaaphwanya.

⁵ Enthawi yeeyo khewaari murendelle wa oyo akhuma apaalle ovollowa vawi ddookatamiha ddahaamorella athu attheene yakhalla mwiillaponi.

⁶ Athwaayo yaakawaneya, mutundu mmodda waawukilana ni mmodda nave muzinda mmodda ni mmodda vawi Mulluku ahaahoosa moohiyanahiyana.

⁷ Koma nyu, llipani murima! Mattaanyu ehifooke vawi muneerothuviwa ekaamba ya muttekwaanyu.

⁸ Asa iiwalle ollotella wa Azariya mwaana a Odedi, aallipa murima nave aavenyihawo mafano oonanara o ellapo ettheene ya Yuda ni ya Benjamini. Aavenyihawottho mafano o mizinda nndde aakhilleeye o ellapo yamiyaango ya Efuremu nave aapotokosa nikuwa na Apwiya nno naari vahoollo va nikhote na enyumba ya Apwiya.

⁹ Nave ahaatthukumaniha Ayuda attheene ni Abenjamini navettho athu anchichi a o Efuremu, Manase ni Simeoni ayo yakhalliiwana wonanko alleto vawi yaathawella wa olliye ovenyera o Israele yoonilliiwa wi Apwiya Mullukwaaye yaari ni olliye.

¹⁰ Nave yatthukumanille o Yerusalemu va mweeri waneeraru wa muyakha wa 15 wa omwene wa Asa.

¹¹ Nllapo nenno yaavelleella mikutho wa Apwiya ovenyera o ddeko yaakhilliiwanndde monga eng'ombe 700 ni enkhosa 7,000.

¹² Nave yaheera echipangano wi yaallapelleke Apwiya Mulluku a makhollwiiwa ni murimiiwa muttheene ni okumiiwa muttheene.

¹³ Nave yahiiwanana wi oyo ahinaallapelleke Apwiya Mulluku a Israele iiphiweke, mung'onong'ono apaalle muullupalli, mullopwana apaalle mutthiyana.

¹⁴ Yaallupella vamiitthoni va Apwiya mookhuwa ni mapallapata nave ni manyaka.

¹⁵ Nave Ayuda attheene yaahakallalla ni ollupellanngu vawi yaallupella, yaawaashaasha ni murimiiwa muttheene nave Apwiya yaaphwanyeya. Vano yahaavaha murendelle virive veko.

Mitteko ddimodda dda Asa

¹⁶ Mwene Asa ahaavenyiha omwene amunne, Maaka ekaamba yawi yaapanga nifano na Asherimu. Olliye aanoononga nifanonno anipwesa, anoosa o ntapo na Kidroni.

¹⁷ Olliye khaavenyihalle mapuro oollapellamo mafano o Israele komave Asa aari oororomelleyesesa mu enthawi ettheene ya okumaaye.

¹⁸ Nave aawaana o enyumba ya Mulluku ddoovelleella ddaye ni dda attiitthinnya dda siliva, golide ni eziwiya ddimodda.

¹⁹ Nave khewaarittho ekhoto ophiyera muyakha wa 35 mu olamulello wa Asa.