2 Epilli 14 - Mawu a Mulluku

Mwene Asa anaagonjiha Akushi

¹ Vano Abiya aakhwa avitthiwa ni makhollwaaye mu muzinda wa Davide. Nave Asa mwanaye sika avollowille omwene munipuroni mwaye. Mu olamulello wa Asa ellapo yaakhalla va murendelle wa miyakha khumi.

² Nave Asa aheera ddaphaama ni ddoolungama vamiitthoni va Apwiya Mullukwaaye.

³ Vano aavenyihawo makuwa mattheene eelleto ni woononga mapuro oollapellamo mafano nave aakumulla apoto oopatuleya ni winttaka mafano a Asherimu.

⁴ Nave ahaalamula athu a o Yuda wi yeereke nnddo yapaalla Apwiya Mulluku a makhollwiiwa navettho wi yiiwellelleke malamulo ni malangizwiiwa.

⁵ Ahoonongattho mizinda ddittheddene dda o Yuda ni okumulla mapuro oollapellamo ni makuwa awoosellavo lubani.* Sika ekaambiiwa omwenooyo waariiwa mu murendelle mu olamulellwaaye.

⁶ Aamaka mizinda ddamipanda mu Yuda vawi ellapweeyo yaari mwamurendelle. Miyakha ddennddo mwiillaponimmo khamwaari ekhoto vawi Apwiya yaamuvaha murendelle.

⁷ Nave aallota wa athu a o Yuda wi, “Hankoni nimake mizinda ddenndda nave niddaapheellihe ni esiri ni nttattha, millako ni mikoko ddoollipa. Ellapweella tti yaahu ekaamba yawi naavekille Apwiya Mullukwaahu. Noheera enapaalliiwa nave yoonivaha murendelle erive embali.” Sika yaamaka ddenndda nave ddaanaweetella phaama.

⁸ Mwene Asa aakhalla ni akhoto 300,000 ovenyera o Yuda ookhalla ni ddawiitetezellana ni mavaka nave athu 280,000 oovenyera o Benjamini ayo yaari ni ddawiitetezellana ni miira. Attheenaalla yaari akhoto amasiva.

⁹ Vano Zera Mukushi aawa wi awane ekhoto ni alliwa ari ni akhoto 1,000,000 ni magareta 300 nave yaaphiya o Maresha.

¹⁰ Vano Asa aatimulla wi akumanena nave attheenaayo yaatthattana embali ddittheddene wi ewane ekhoto va ntapo na Zefati o Maresha.

¹¹ Nave Asa aakhuwella wa Apwiya Mullukwaaye wi, “Nyu Apwiya, khaavottho mmodda monga nyuwaano awi ttuunikavihera hi oofooka owana ni akhoto amasiva. Nyu Apwiya Mullukwaahu, nikavihereni vawi ninnuuroromellani. Niwiille wi niwane ni akhotwaalla mu nnddina nanyu, muhaakhullelle wi mmodda uugonjiheni.”

¹² Vano Apwiya yahaagonjiha Akushi vamiitthoni va Asa ni va athu a o Yuda nave Akushaayo yaathawa.

¹³ Asa ni athwaaye yaawiikariha ophiya o Gerari nave Akushi attheenaayo yahiiphiwa ekaamba yawi yagonjihiwe ni Apwiya ni akhotwiiwa. Nave Ayuda yaatukhulla ddawaakha okhotoni ddinchichi.

¹⁴ Vano yahoononga mizinda ddittheddene ddaaphenlle Gerari vawi woova woovenyera wa Apwiya wahaamorella. Yahaakha mizinda ddittheddene ni katundu muttheene.

¹⁵ Vano yaakumulla makholla mattheene a eziweto yaakha enkhosa, epuri ni ekamira* ddinchichi nave yaahokollweella o Yerusalemu.