2 Epilli 13 - Mawu a Mulluku

Mwene Abiya anawana ekhoto ni Yerobowamu

¹ Muyakha wa 18 wa omwene wa Yerobowamu, Abiya mwaana a Nebati aavollowa omwene o Yuda.

² Olliye aalamulella o Yerusalemu miyakha miraru. Amennya yaari Mikaya mwaana a Uriyele. Vano vaakhalla ekhoto variyari va Abiya ni Yerobowamu.

³ Abiya aawa ni mulloko wakhoto woollipa murima wa athu ootthoolliwa 400,000. Yerobowamu aawaana akhotwaaye 800,000 wi ewane ni Abiya nave yaari amasiva navettho ootthoolliwa.

⁴ Vano Abiya ahiimella va mwaango wa Zemaraimu oyo ori o ellapo yamiyaango ya Efuremu nave aallota wi, “We Yerobowamu ni Aisraele attheene iwani kinalloteeminndda.

⁵ Ethiyo khemunadduwella wi Apwiya Mulluku a Israele aavelleella omwene wa Israele wa Davide ni anaaye wa enthawi yoohimalla vaweerani echipangano yoohitathiya?

⁶ Koma Yerobowamu mwaana a Nebati oorumeyella a Solomoni mwaana a Davide ahaawukila apwiyaaye.

⁷ Vano athu amodda oohikhalla ni mutteko yaatthukumana wa olliye emunyaambusa Rehobowamu mwaana a Solomoni ari mung'onong'ono ni oohillipa murima wi ttuullipanana athwaalle.

⁸ Vano nyuwaano munaganiza ddoollipana ni omwene wa Apwiya wi muwaakhe ovenyera wa anamwani a Davide vawi nyu muri anchichi nave mookhallana mafano a asaanaang'ombe agolide uupangelleni Yerobowamu wi ekhalle milluku ddanyu.

⁹ Ethiyo nyu khemwaawiikarihalle allupa mukutho a Apwiya, anamwani a Aroni ni Alevi mwiitthoollella allupa mukutho wonanko mmo eneerella athu amodda amwiillaponimmo? Arive muthu anawa wi iivelleelle yeekha ni nankhoro a eng'ombe apaalle anankhoro atthanu ni eelli a enkhosa annakhalla mullupa mukutho a ddeko nnddo ddihiri milluku.

¹⁰ “Koma wa hiyaano, Apwiya sika Mullukwaahu nave khanaawaahiyalle. Allupa mukutho ayo enaarumeyella Apwiya tti anamwani a Aroni nave Alevi ennaakaviherattho.

¹¹ Ennavelleella wa Apwiya mikutho ddooshellelliha orive ohinase ni orive misikuwa. Ennoosa lubani* na nthuko naphaama nave ennamuhiyattho buledi oovelleella va tebulo a golide aphaama navettho ennapwatha yoohiyavo enyali yagolide wi enyali ddiwa ddikhareke orive misikuwa vawi ninniiwellella nnddo enanilamula Apwiya Mullukwaahu koma nyu mohaahiya.

¹² Vano ngoonani! Mulluku ari ni hiyaano nave allupa mukuthwaaye eri vaava ni mapallapatiiwa, aakhozeka wi ewiipe oniithana wi niwane ekhoto ni nyuwaano. Nyu Aisraele, muhillipane ni Apwiya Mulluku a makhollwaanyu vawi khamupambana.”

¹³ Vano Yerobowamu ahaarumiha akhotwaaye wi yawane ni akhoto a Ayuda ovenyera muhoollo nave akhoto awiipitthaayo yavenyera mutulli mwiwa.

¹⁴ Ayuda erukunuwalle, yahoona ekhoto muhoollo ni mutulli mwiwa vano yaakhuwella wa Apwiya nave allupa mukutho yahiipa mapallapatiiwa.

¹⁵ Vaavo akhoto a Ayuda yaakhuwa moollipiha nave Apwiya yaamugonjiha Yerobowamu ni Aisraele attheene vamiitthoni va Abiya ni Ayuda.

¹⁶ Aisraele yahaathawa Ayuda koma Mulluku ahaavelleella m'mattani mwiwa.

¹⁷ Abiya ni athwaaye yahaagonjiha Aisraelaayo ewiipha akhoto amasiva 500,000.

¹⁸ Sika Aisraele yaagonjihiwa enthawi yeeyo nave Ayuda yaapambana kaambiiwa yahaaroromella Apwiya Mulluku a makhollwiiwa.

¹⁹ Vano Abiya aamwiikariha Yerobowamu amwaakha mizinda dda Betele ni mizi ddiwa, Yashana ni mizi ddiwa navettho Efuroni ni mizi ddiwa.

²⁰ Yerobowamu khaahokolloselliwe olamulellwaaye enthawi ya Abiya nave Apwiya yaamullaka nave aakhwa.

²¹ Koma Abiya masivaaye yaavirellella waata nave ahaatthella atthiyana khumi ni asese nave akhalla ni anamwani aallopwana 22 ni aatthiyana 16.

²² Vano mitteko ddittheddene dda Abiya, makhallellwaaye ni ddoollota ddaye ddoolembiwa mu epilli ya namallotella Ido.