2 Epilli 12 - Mawu a Mulluku

Aiguputo enahella ekhoto ellapo ya Yuda

¹ Vano Rehobowamu akeraatthihalle ni ollipiha olamulellwaaye olliye ni Aisraele attheene yahaamba ohiiwellella malamulo a Apwiya.

² Muyakha waneetthanu wa omwene wa Rehobowamu, mwene Shishaki a o Iguputo awa wi amuhelle ekhoto Yerusalemu ekaamba yawi kheyaaroromelleya vamiitthoni va Apwiya.

³ Shishaki aawa ni magareta akhoto 1,200 ni athu aweetiha akavalo 60,000. Nave athwaaye yaari ooheerengeya ayo awiilleeyena ovenyera o Iguputo, Libiya, Sukimu ni Kushi.

⁴ Nave ahaakha mizinda dda mipanda dda Yuda eya yaphiya o Yerusalemu.

⁵ Vano namallotella Shemaya aawa wa Rehobowamu ni wa oohoollella a o Yuda ayo yatthukumanille o Yerusalemu ekaamba ya Shishaki nave ahaalleella wi, “Apwiya enallota wi, ‘Nyu khemunakipwatha miyaano, vano nameenettho nguupwathani nave kinuuvelleellani m'mattani mwa Shishaki.’ ”

⁶ Nave oohoollella a Israele ni mwene yahiiyeviha ellota wi, “Apwiya tti oolungama.”

⁷ Vano Apwiya yoonille wi athwaayo ahiiyeviha, mawu a Apwiya yaawa wa Shemaya ellota wi, “Athwaalla ahiiyeviha vano ngiwoononga koma kineeremaavullusa nave ngiwushella murima muzinda wa Yerusalemu mwawi Shishaki khawoononga.

⁸ Komave eneerokhalla akaporwaaye wi edduwelle opaalleya wookirumeyella ohiyana ni waarumeyella mamwene a va ellapo yavatthi.”

⁹ Vano Shishake mwene a o Iguputo aawa wi amuhelle Yerusalemu ekhoto. Ahaakha eyuuma ya o enyumba ya Apwiya ni ya o enyumba yoomwene. Aakusa ddeko ddittheddene naarittho ezishango ddagolide nnddo mwene Solomoni apangilleeye.

¹⁰ Vatulli viwa mwene Rehobowamu ahoopa ezishango ddamukuwa nave aawinnya akapitawo a alonda a va mullako wa enyumba yoomwene.

¹¹ Enthawi ddittheddene mwenoolle aavollowaka mu enyumba ya Mulluku alondaalle yaanatukhulla ezishangonnddo nave vatulli viwa yaanaddihokollosella mu echipinda ya alonda.

¹² Vano iiyevihalleeye, owalli wa Apwiya khewaamoonongille mwawi ddaanamweetella phaama Yuda.

Omwene wa Rehobowamu moophadda

¹³ Vano mwene Rehobowamu aakeraatthiha omwenaaye mu Yerusalemu nave aalamulella. Aari ni miyakha 41 aambeeye olamulella nave aalamulella miyakha 17 mu Yerusalemu, muzinda oyo yatthoollille Apwiya variyari va malloko mattheene a Israele wi yaallapellekewo. Amennya yaari Naama Muamoni.

¹⁴ Nave aheera yoonanara vawi murimaaye khewaapaalla owaashaasha Apwiya.

¹⁵ Ethiyo mitteko ddittheddene dda Rehobowamu ovenyera vawaamba ophiyera omamallihello, kheddaalembiwe mu epilli ya Shemaya namallotella ni ya Ido oollohella? Vaakhalla ekhoto yoohimalla variyari va Rehobowamu ni Yerobowamu.

¹⁶ Rehobowamu aakhwa nave aavitthiwa ni makhollwaaye mu muzinda wa Davide. Nave Abiya mwanaye aavollowa omwene munipuroni mwaye.