2 Epilli 11 - Mawu a Mulluku

Ollotella wa Shemaya

¹ Rehobowamu aphiyalleeye o Yerusalemu ahaatthukumaniha akhoto ootthoolliwa 180,000 a nlloko na Yuda ni na Benjamini wi yawane ni malloko a o Israele wi ehokollose omwene wa Rehobowamu mwaana a Solomoni.

² Koma mawu a Apwiya yaawa wa namallotella Shemaya wi,

³ “Wamulleelle mwene Rehobowamu mwaana a Solomoni a o Yuda ni athu attheene a malloko a Yuda ni a Benjamini ni attheene oohallaayo wi,

⁴ ‘Mi Apwiya kinallota wi muhiwane ni abalaanyu, Aisraele. Arive muthu ahokollweelle owaniwa vawi ddeereyillenndda tti ddoovenyera wa miyaano.’ ” Sika yahiiwellella mawu a Apwiya nave yaahokollweella owaniwa.

Rehobowamu anallipiha mizinda

⁵ Rehobowamu aakhallave mu Yerusalemu nave aamaka mizinda dda mipanda ddootetezellana Yuda,

⁶ monga Betelehemu, Etamu, Tekowa,

⁷ Betezuri, Soko, Adulamu,

⁸ Gati, Maresha, Zifi,

⁹ Adoraimu, Lakishi, Azeka,

¹⁰ Zora, Ayaloni ni Hebroni. Mizinda ddamipanda ddittheddenennddo ddaari o Yuda ni o Benjamini.

¹¹ Aallipiha mipandannddo nave ahaahiyamo oohoollella akhoto. Aahiyamottho yoocha, makhura ni vinyo.

¹² Nave aahiyamo ddawiitetezellana ni mavaka m'mizindani ddittheddene nave aaddillipiha. Mmu sika alamulelleeye muzinda wa Yuda ni Benjamini.

Owa wa allupa mukutho ni Alevi o Yuda

¹³ Allupa mukutho ni Alevi ayo yaari mu ellapo ya Israele ettheene yahiiwananana Rehobowamu ovenyera o mapuro mattheene nko yakhalliiwa.

¹⁴ Vawi Alevi yaahiya mapurwiiwa oochihellamo eziweto nave yaaya o Yuda ni o Yerusalemu ekaamba yawi Yerobowamu ni anaaye yaari yaahiihalle mutteko wookhalla allupa mukutho a Apwiya

¹⁵ nave ahaatthoolla allupa mukutho aayeaaye wi erumeyelleke mapuro oollapellamo mafano monga a anankhoro musaanaapuri ni a musaanaang'ombe ayo aapangilleeye.

¹⁶ Vano ayo yapaalla waarumeyella Apwiya Mulluku a Israele ni murimiiwa muttheene yahaathwara allupa mukutho ni Alevaalle ovenyera o malloko mattheene a Israele oya o Yerusalemu woovelleella mukutho wa Apwiya Mulluku a makhollwiiwa.

¹⁷ Nave yaallipiha omwene wa Yuda nave wa miyakha miraru yaamwiiwellella Rehobowamu, mwaana a Solomoni vawi va miyakha mirarunnddo yaathwara echisanzo ya mwene Davide ni Solomoni.

Nibanja na Rehobowamu

¹⁸ Rehobowamu aamutthella Mahalati mwaana a Yerimoti, mwaana a Davide. Nave amennya yaari Abihaili mwaana a Eliyabu mwaana a Yese.

¹⁹ Nave mutthiyanooyo aamuyarella Yeushi, Shemariya ni Zahamu.

²⁰ Nave vatulli viwa aamutthellattho Maaka mwaana a Abishalomu oyo amuyarelle Abiya, Atai, Ziza ni Shelomiti.

²¹ Rehobowamu aamukondesesa Maaka mwaana a Abishalomu okhwaranya awariye amodda ang'onong'onwaayo. (Aatthenlle atthiyana 18 nave aari ni awariye ang'onong'ono 60. Aari ni anamwani aallopwana 28 ni aatthiyana 60).

²² Nave Rehobowamu aamutthoolla Abiya mwaana a Maaka wi akhalle oohoollella a anamwani aallopwana a mwene vawi amuganizera wi avollowe omwene munipuroni mwaye.

²³ Vano aheera mweezeru nave ahaakeraatthiha anaaye aallopwana mu ezigawo ddittheddene dda Yuda ni Benjamini m'mizindani ddittheddene dda mipanda ddoollipa. Aanaavaha ddoocha yinchichi ni owaashella atthiyana anchichi.