2 Epilli 1 - Mawu a Mulluku

Solomoni anaveka ezeru

¹ Solomoni mwaana a Davide aakeraatthiha omwenaaye nave Apwiya Mullukwaaye aari ni olliye nave aamunnuwiha wunchichi.

² Solomoni aallota ni Aisraele attheene, oohoollella akhoto, aweeruza, oohoollella Aisraele attheene navettho oohoollella a mabanja.

³ Nave Solomoni ni athu attheene yatthukumana o nipuro namallapello o Gibiyoni. Musasa wamutthukumano wa Mulluku oyo Mose oorumeyella a Apwiya amakilleeye muchipululuni waari vaavo.

⁴ Koma Davide aawaana nibokosi na echipangano na Apwiya ovenyera o Kiriyati Yearimu aphiyana o nipuro nko akhozilleeye vawi aanitthipellella musasa o Yerusalemu.

⁵ Waanjerera vaavo, nikuwa namukuwa nno Bezalele mwaana a Uri, mwaana a Huri animakilleeye naari wenko vahoollo va musasa wa Apwiya. Nave Solomoni ni athu attheene yatthukumanille yaanaallapella Apwiya.

⁶ Nave Solomoni aawella o nikuwa namukuwa vamiitthoni va Apwiya nno naari va musasa wamutthukumano avelleella mikutho ddooshellelliha ddinchichi.

⁷ Mahiiyu yaayo Mulluku ahooneyella wa Solomoni amulleella wi, “Veka eyo onapaalleewe nave kineerewuuvaha.”

⁸ Nave Solomoni aallota wa Mulluku wi, “Mwaawooniha echikondi yuullupalli ni yoohisintheya wa attiitthaaka Davide nave mookivollochiha omwene munipuroni mwiwa.

⁹ Nyu Apwiya Mulluku, akhullellani wi mwalonjezilleenyu wa attiitthaaka Davide ekwakhwanihiwe vawi mookikhalliha mwene owaalamulella athu awaata wonanko nthupi na va ellapo yavatthi.

¹⁰ Vano mukivahe ezeru ni odduwella wi kaahoollelle phaama athwaanywaalla vawi vaahikhalla ezerunnddo ttaani anaawore waalamulella athwaanyu awaata ddiiddaalla?”

¹¹ Mulluku aamwaakhulla Solomoni wi, “Ella sika yaari m'murimani mwawo nave khovekille katundu, eyuuma, olemu apaalle wi adanaawo ekhwe naari oveka wi okhalle ni okumi woorekama koma ovekille ezeru ni odduwella wi waalamulelleke athwaaka ayo kuuvahilleemini.

¹² Ezeru ni odduwella kineerewuuvaha. Kineerewuuvahattho eyuuma, katundu ni olemu omukhwaranya arive mwene we ohinakhallewo apaalle muhoollo mwawo.”

Eyuuma ni olamulello wa mwene Solomoni

¹³ Vano Solomoni aavenyawo o nipuro namallapello o mwaango wa Gibiyoni nko waari musasa wamutthukumano nave aahokollweella o Yerusalemu alamulella Israele.

¹⁴ Vano Solomoni aatthukumaniha magareta ni athu aweetiha akavalo akhoto nave aaddihiya mu muzinda. Magaretaayo yaarivo 1,400 nave athu aaweetiha akavalo akhoto yaarivo 1,200. Ahaahiya amodda o mizinda nko wakhalla akhoto ni amoddattho vakhuviru ni mwene a o Yerusalemu.

¹⁵ Vano Solomoni aheeriha wi mu Yerusalemu mukhalle siliva ni golide awaata wonanko malluku. Aheerihattho wi mukunguza waate wonanko namukuyu a mutapo muhito mwa miyaango dda Yuda.

¹⁶ Solomoni aanaakulla akavalo ovenyera o Iguputo ni o Kuwe. Amalonda a Solomoni sika yaakulla akavalo yaalla ovenyera o Kuwe.

¹⁷ Nigareta nimodda na o Iguputo nakulliwa makobiri asiliva 600 nave kavalo mmodda akulliwa makobiri asiliva 150. Vatulli viwa amalonda a mwene yaanaakulliha magareta ni akavalo wa mamwene a Ahiti ni a o Siriya.