2 Atesalonika 1 - Mawu a Mulluku

¹ Ovenyera wa hiyaano Paulo, Silivano ni Timoteo. Ninaalembella athu a mpingo wa o Tesalonika ayo eri a Mulluku Attiitthiihu ni Apwiya Yesu Khrisitu.

² Echisomo ni murendelle ddoovenyera wa Mulluku Attiitthiihu ni Apwiya Yesu Khrisitu ddikhalle ni nyuwaano.

³ Asinnihu ni arokorihu, ninaphwanella wi nimuthokozeke Mulluku ekaamba ya nyuwaano enthawi ddittheddene. Tti woopaalleya weera ddiiddo kaambiiwa echikhulupilwaanyu ennunnuwannuwa navettho okondana wanyu onnaata.

⁴ Ella sika ekaambiiwa hiyaano ninalloteehu ddawuukotellani mu mipingo dda Mulluku. Ninnallota dda mmo munavillelleenyu ni okhulupilila naari mukatamihiwaka navettho muhoosiwaka.

⁵ Ddittheddenenndda ddinasimikizella wi echiweruzo ya Mulluku tti yawoona wi mwaphwanyeye muri oophwanella ovollowa mu omwenaaye oyo munahoosiwelleenyu.

⁶ Mulluku tti oolungama ndithu, aneerewaallaka ayo enuuhoosani.

⁷ Nave nyuwaano munahoosiwa aneerewuuvahani wiithuuwa vamodda ni hiyaano. Aneere ddenndda Apwiya Yesu yooneya ovenyera oddullu vamodda ni angelwaaye amasiva,

⁸ nave ni mallumi amunllo wi aallake ayo ehinamudduwella Mulluku nave ayo ehiniiwellella othenga waphaama wa Apwiihu Yesu.

⁹ Yaayo eneerollakiwa ni woonongiwa woohimalla ni waamwallaniha vamiitthoni va Apwiya ni ntitimiho naye ni masivaaye,

¹⁰ va nllapo anaweeye wi aakhelle ntitimiho ovenyera wa athwaaye aweella ni oriiheya ovenyera wa attheene enakhulupilila. Nyuwaano muneerokhallattho ni yaayo kaambiiwa mookhulupilila othenga olle nuulleelleeyeni.

¹¹ Ella sika ekaambiiwa ninuuvekellelleehuni enthawi ddittheddene wi Mullukwaahu aweereni nyuwaano oophwanellella okumi oyo aawiithanelleeyeni. Ninavekattho wi ni masivaaye akwakhwanihe minkhella ddanyu ddaweera ddaphaama ni ddaweera mutteko wa echikhulupililo,

¹² wi nnddina na Apwiihu Yesu nititimihiwe mwa nyuwaano ni nyuwaano mwa alliwaayo moollikana ni echisomo ya Mullukwaahu ni ya Apwiya Yesu Khrisitu.