2 Akorinto 9 - Mawu a Mulluku

Ddoovelleella o Mpingo wa o Yerusalemu

¹ Tti woohipaalleya wi miyaano kuulembelleni dda ddoovelleella ddanyu wa athu a Mulluku o Yerusalemu.

² Kinnadduwella ntthitti nanyu voovelleellani nave kohuukotellani nyuwaano wa athu a o Masedoniya. Kaallota wi, “Asinnihu ni arokorihu o Akaiya yaakhozeka ovelleella waambeella muyakha omanlle.” Ntthitti nanyu noheeriha anchichi a yaayo wi evelleellettho.

³ Vano kinamurumiha Tito ni athu eelli amodda kaambiiwa kinapaalla wi mukhozeke wonanko mmo kallotelleemi wa athu a o Masedoniya vawi nndda ddineerewooniha wi wuukotellani waka waari wawoona. Nave nyuwaano mukhozeka ni nikavihero nanyu wonanko mmo kallotelleemi.

⁴ Nave athu oovenyera o Masedoniya yaphiya ni miyaano nave ephwanya wi khamunakhozeke, nineerowulliwa muru vawuuroromellani navettho nyuwaano muneerowulliwa muru wunchichi ekaamba ya yeella.

⁵ Sika kaaganiza wi waari woopaalleya wi kimuveke Tito ni athu eellaalla wi ewe wa nyuwaano kihinaphiye wi ekhozekelle emphaso mwalonjezilleenyu. Sika eneerokhoziwa moovallallella nave ddineerewooniha wi munavelleella moopaalla mwanyu ohiri ekaamba yoowatiheriwa.

Waakhella madaliso ekaamba ya ddoovelleella

⁶ Upuwellani wi muthu anamidda mmiddo wooyeva aneerohata ddooyeva nave oyo anamidda mmiddo wawaata aneerohata ddawaata.

⁷ Vano munaphwanella muvelleelleke eyo muganizalleenyu m'murimani mwanyu, moohikhupanya apaalle moowatiheriwa vawi Mulluku anakonda oyo anavelleella moohakallalla.

⁸ Nave Mulluku annawora wuuvahani madaliso manchichi nave muneerokhalla ni ddittheddene munapaalleenyu enthawi ddittheddene naari ddookhwaranya wi mwakavihere va orive mutteko waphaama.

⁹ Mawu a Mulluku eni, “Annavelleella moohummella wa athu oohoowa, echilungamwaaye tti yoohimalla.”

¹⁰ Nave Mulluku oyo anavaha mmiddo wi omiddiwe ni yoocha wi echiwe, aneerewuuvahanittho mmiddo muttheene munapaalleenyu nave aneerewunnuwiha ni wimmiha ddoohata ddinchichi ekaamba ya woollowa matta wanyunko.

¹¹ Aneerewuulemelihani mu ddeko ddittheddene wi enthawi ddittheddene muvelleelleke mwawoollowa matta. Vano athu anchichi eneeromuthokoza Mulluku ekaamba ya emphaso ddanyu enaakhelliiwa oyeella mwa hiyaano.

¹² Vawi mutteko waphaama yoolla munaphareenyu khonakwakhwaniha ddoopaallave dda athu a Mulluku komattho onnaweeriha athu omuthokoza Mulluku wunchichi.

¹³ Nave ekaamba ya omboni wa muttekwaanyoolla, athu anchichi eneeromutitimiha Mulluku. Vawi mwaakhulupilila othenga waphaama wa Khrisitu navettho ovelleella wanyu mwawoollowa matta vookawanani ni alliwaayo ni athu amodda attheene.

¹⁴ Nave eneerewuuvekellani ni echikondi yuullupalli ekaamba ya echisomo yawaata eyo Mulluku awoonihalleeyeni.

¹⁵ Nimuthokoze Mulluku ekaamba ya emphaswaaye yoottikhiniha wunchichi.