2 Akorinto 8 - Mawu a MullukuOvelleella wa mipingo 1 Asinnihu ni arokorihu, ninapaalla wi mudduwelle dda echisomo ya Mulluku eyo yavahiwe m'mipingoni o echigawo ya Masedoniya. 2 Yaheesiwa wunchichi ni ddoohoosa yoonilliiwa koma ohakallalla wiwa waari wuullupalli. Nave yaavelleella mwawoollowa matta naari eri oohoowa wunchichi. 3 Kinimuusimikizellani wi yaavelleella moollikana ni ophwanya wiwa naarittho ohiyana ni ophwanya wiwa. 4 Moohiwatiheriwa, yaaniveka moosimikiza wi ekhallena ekari yowaavaha athu a Mulluku o Yerusalemu. 5 Ddaari ddookhwaranya nnddo natiyerelleehu! Vawaamba yahiivelleella weekhiiwa wa Apwiya nave vatulli viwa, mu opaalla wa Mulluku, yahiivelleella wa hiyaanottho. 6 Sika naamuveka Tito, oyo aambille mutteko yoolla wi uukavihereni omalliha mutteko waphaamoolla. 7 Mookhalla ni ddittheddene ddawaata, mu echikhulupililo, mu ddoollota, moodduwella ddeko, mu ntthitti nanyu nittheene ni mu echikondaanyu va hiyaano. Sika vano moonesese wi mookhalla ni ddawaata m'muttekoni waphaamoolla. 8 Nginallota yeella moolamula. Koma vawoonihani ntthitti na athu amodda voovahani, kinaaka koone echikondaanyu yaarimi eri yawoona. 9 Munnadduwella echisomo ya Apwiihu Yesu Khrisitu yawi addeera oohoowa ekaamba ya nyuwaano naari aari eeyuuma wi aweereni nyuwaano eeyuuma oyeella mu ohoowa waye. 10 Muyakha omanlle mwahaamba muttekoolla nave mwaheera ddenndda moopaalla mwanyu. Sika vano kinaganiza wi tti waphaama wa nyuwaano wi 11 mumallihe mutteko waphaamoolla. Mukhalle ni ntthitti nenno mwaambilleenyuna voovahani moollikana ni ophwanya wanyu. 12 Mwakhalla ni ntthitti noovelleella, Mulluku aneerewaakhella emphaso ddanyu moollikana ni nnddo muriinyuna ohiri moollikana ni nnddo muhiinnaanyu. 13 Nginapaalla wi nyuwaano oovaha muhooweke nave oovahiwaayo ehihooweke koma kinapaalla wi attheene muphwanaphwaneke. 14 Nave vawi mookhalla ni ddawaata va enthawi yeella, tti waphaama wi mwaakavihere allupa oohoowa. Sika, nyuwaano mwahoowa, alliwa yakhalla ni ddawaata, eneerewuukaviherani. Sika vineerokhalla ophwanaphwana. 15 Ddoolembiwattho mu mawu a Mulluku wi, “Ayo yatthukumanihalle ddinchichi, kheddaahanlle nave ayo yatthukumanihalle vang'ono, kheyaayelleelle.” Tito ni akhwaaye 16 Ninnamuthokoza Mulluku voomuvahani Tito ntthitti nowuukaviherani wonanko hiyaano! 17 Khaakhullenlle oveka wahuve koma ekaamba ya ntthitti naye aaganiza khalleve owa wa nyuwaano moohiwatiheriwa. 18 Noomurumiha vamodda ni mwanamunnihu oyo anavahiwa olemu m'mipingoni ddittheddene ekaamba ya muttekwaaye woollalleya othenga waphaama. 19 Nave waanjerera vaavo, ootthoolliwa ni mipingo wi anithware voototellani ddoovelleella ddanyu ekaamba ya ntitimiho na Apwiya navettho wi noonihe wi ninnasimikiza okavihera. 20 Khaninapaalla wi muniphwanyelle yoonanara va mmo nineetihereehu ddoovelleella. 21 Yoolingaahu tti weera ddaphaama, ohiri va miitthove va Apwiya komattho vamiitthoni va athu. 22 Vano ninamurumiha mwanamunnihu mmodda vamodda ni alliwaayo. Noomweesa olliyooyo enthawi ddinchichi nave nohoona wi annakhalla ni ntthitti nookavihera. Nave vawi annaroromella wunchichi mwa nyuwaano, ookhalla ni ntthitti nuullupalli nawi akavihere. 23 Ollota dda Tito, yoolla tti mukhwaaka oopharana mutteko ni miyaano wuukaviherani nyuwaano. Asinnaka amodda ayo eneeta ni olliyooyo erumiwe ni mipingo nave enamutitimiha Khrisitu. 24 Sika moonihe echikondaanyu wa alliwaayo wi mipingo ddittheddene ddisimikize dda yeella ni odduwella wi ninnallota ddawoona nawuukotellakani. |
The Bible in Elhomwe © The Bible Society of Malawi, 2019.
Bible Society of Malawi