2 Akorinto 8 - Mawu a Mulluku

Ovelleella wa mipingo

¹ Asinnihu ni arokorihu, ninapaalla wi mudduwelle dda echisomo ya Mulluku eyo yavahiwe m'mipingoni o echigawo ya Masedoniya.

² Yaheesiwa wunchichi ni ddoohoosa yoonilliiwa koma ohakallalla wiwa waari wuullupalli. Nave yaavelleella mwawoollowa matta naari eri oohoowa wunchichi.

³ Kinimuusimikizellani wi yaavelleella moollikana ni ophwanya wiwa naarittho ohiyana ni ophwanya wiwa.

⁴ Moohiwatiheriwa, yaaniveka moosimikiza wi ekhallena ekari yowaavaha athu a Mulluku o Yerusalemu.

⁵ Ddaari ddookhwaranya nnddo natiyerelleehu! Vawaamba yahiivelleella weekhiiwa wa Apwiya nave vatulli viwa, mu opaalla wa Mulluku, yahiivelleella wa hiyaanottho.

⁶ Sika naamuveka Tito, oyo aambille mutteko yoolla wi uukavihereni omalliha mutteko waphaamoolla.

⁷ Mookhalla ni ddittheddene ddawaata, mu echikhulupililo, mu ddoollota, moodduwella ddeko, mu ntthitti nanyu nittheene ni mu echikondaanyu va hiyaano. Sika vano moonesese wi mookhalla ni ddawaata m'muttekoni waphaamoolla.

⁸ Nginallota yeella moolamula. Koma vawoonihani ntthitti na athu amodda voovahani, kinaaka koone echikondaanyu yaarimi eri yawoona.

⁹ Munnadduwella echisomo ya Apwiihu Yesu Khrisitu yawi addeera oohoowa ekaamba ya nyuwaano naari aari eeyuuma wi aweereni nyuwaano eeyuuma oyeella mu ohoowa waye.

¹⁰ Muyakha omanlle mwahaamba muttekoolla nave mwaheera ddenndda moopaalla mwanyu. Sika vano kinaganiza wi tti waphaama wa nyuwaano wi

¹¹ mumallihe mutteko waphaamoolla. Mukhalle ni ntthitti nenno mwaambilleenyuna voovahani moollikana ni ophwanya wanyu.

¹² Mwakhalla ni ntthitti noovelleella, Mulluku aneerewaakhella emphaso ddanyu moollikana ni nnddo muriinyuna ohiri moollikana ni nnddo muhiinnaanyu.

¹³ Nginapaalla wi nyuwaano oovaha muhooweke nave oovahiwaayo ehihooweke koma kinapaalla wi attheene muphwanaphwaneke.

¹⁴ Nave vawi mookhalla ni ddawaata va enthawi yeella, tti waphaama wi mwaakavihere allupa oohoowa. Sika, nyuwaano mwahoowa, alliwa yakhalla ni ddawaata, eneerewuukaviherani. Sika vineerokhalla ophwanaphwana.

¹⁵ Ddoolembiwattho mu mawu a Mulluku wi, “Ayo yatthukumanihalle ddinchichi, kheddaahanlle nave ayo yatthukumanihalle vang'ono, kheyaayelleelle.”

Tito ni akhwaaye

¹⁶ Ninnamuthokoza Mulluku voomuvahani Tito ntthitti nowuukaviherani wonanko hiyaano!

¹⁷ Khaakhullenlle oveka wahuve koma ekaamba ya ntthitti naye aaganiza khalleve owa wa nyuwaano moohiwatiheriwa.

¹⁸ Noomurumiha vamodda ni mwanamunnihu oyo anavahiwa olemu m'mipingoni ddittheddene ekaamba ya muttekwaaye woollalleya othenga waphaama.

¹⁹ Nave waanjerera vaavo, ootthoolliwa ni mipingo wi anithware voototellani ddoovelleella ddanyu ekaamba ya ntitimiho na Apwiya navettho wi noonihe wi ninnasimikiza okavihera.

²⁰ Khaninapaalla wi muniphwanyelle yoonanara va mmo nineetihereehu ddoovelleella.

²¹ Yoolingaahu tti weera ddaphaama, ohiri va miitthove va Apwiya komattho vamiitthoni va athu.

²² Vano ninamurumiha mwanamunnihu mmodda vamodda ni alliwaayo. Noomweesa olliyooyo enthawi ddinchichi nave nohoona wi annakhalla ni ntthitti nookavihera. Nave vawi annaroromella wunchichi mwa nyuwaano, ookhalla ni ntthitti nuullupalli nawi akavihere.

²³ Ollota dda Tito, yoolla tti mukhwaaka oopharana mutteko ni miyaano wuukaviherani nyuwaano. Asinnaka amodda ayo eneeta ni olliyooyo erumiwe ni mipingo nave enamutitimiha Khrisitu.

²⁴ Sika moonihe echikondaanyu wa alliwaayo wi mipingo ddittheddene ddisimikize dda yeella ni odduwella wi ninnallota ddawoona nawuukotellakani.