2 Akorinto 7 - Mawu a Mulluku

¹ Akhwaaka ookondiwa, ddoolonjeza ddittheddenenndda ddaheeriwa wa hiyaano. Sika vano hankoni neellihe nnddo ddinaripiha mwiillaahu ni munepaahu nave hankonittho nikhalle aweella mu ddittheddene voomoovani Mulluku.

Ohakallalla wa Paulo

² Munihiye vamurimani vanyu. Khanaamweerelle arive muthu yoonanara navettho khanaamunanarihalle naari omulleka arive muthu.

³ Nginallota yeella wi kiweereni oochimwa. Koma wonanko mmo kallotilleemi khalle, nyuwaano tti ookondiwa wunchichi wa hiyaano, sika enthawi ddittheddene munnakhalla m'murimani mwahu, vookumini naari vookhwani.

⁴ Kinnallota moohoova ello navettho kinnuukotellani! Mu ddoohoosa ddahu ddittheddene kinnallipa murima wunchichi navettho kiri oohakallalla ni murimaaka muttheene.

⁵ Naari naphiyalleehu o Masedoniya khanaawiithuuwalle. Ddoohoosa ddaari virive veko. Vaakhalla okangana ni athu amodda navettho woova m'mirimani ddahu.

⁶ Koma Mulluku oyo anallipiha murima wookhumuwa, aanillipiha murima hiyaano va owa wa Tito.

⁷ Kohiyo owa wayeve wanillipihalle murima komattho vawiiwani mmo mwaamullipihelleenyu murima. Aanilleella dda munkhellaanyu munchichi woopaalla okoona miyaano ni okiteteza ni ethakaraka ddanyu va miyaano. Sika vano kiri oohakallalla ni murimaaka muttheene.

⁸ Vawi naari kalataaka aari uuvorihalleni murima, miyaano nginoonavo ello wi kaamulemba. Kahoonavo ello va enthawi yeeyo koma ohiri ollello kaambiiwa uuvorihalleni murima va enthawi yooyeva.

⁹ Koma vano koohakallalla, ohiri kaambiiwa kahuuvoriihani murima koma kaambiiwa ovoreya murima wanyu waheeriha wi murukunuwe murima. Ovoreya murimanngu wavenyera wa Mulluku wi muhinanarihiwe ni hiyaano mu erive ello.

¹⁰ Vawi ovoriiwa murima woovenyera wa Mulluku onnarukunusa murima wi ovullusiwe nave khaavo muthu anaakhalle ni ethakaraka ni ovoriiwa murima wenko. Koma ovoriiwa murima woovenyera wa athu onnawaana okhwa.

¹¹ Ngoonani nnddo mwaakhenlleenyu ovenyera mwa ddoovoriiha murima ddoovenyera wa Mulluku. Mwaakhalla antthitti, mwahiiteteza wunchichi, mwamushella murima mwanamunninyu olle achimwalle, mwaarurumuseya, mwaakikhallella munkhella wi mukoone navettho mwaapaalla wunchichi omullaka mwanamunninyu olle achimwalle. Mohooniha mu ddeko ddittheddenenndda wi khamunna yoonanara.

¹² Sika naari kamulembille kalata yoolle, khe ekaamba ya muthu oochimooyo apaalle oyo eerelliwe ddoonanara. Koma kamulembille kalatooyo wi muddoone weekhiinyu vamiitthoni va Mulluku mmo wunnuwa wa ntthitti nanyu okhallelliiwa va hiyaano.

¹³ Ella sika ekaambiiwa ninallipihiweehu murima. Khe ollipihiwa murimave komattho ohakallalla wa Tito waanihakallalliha kaambiiwa nyuwaano mwaamukeraatthiha murima.

¹⁴ Kaamulleella wi kinnuukotellani nave nginawulliwekevo muru ekaamba ya nyuwaano. Naanuulleellani ddawoona enthawi ddittheddene navettho mwa emoddamoddave yeeyo okotella wahu mwanyuwaano wa Tito wahooniha wi tti wawoona.

¹⁵ Sika vano echikondaaye wa nyuwaano tti yuullupalli, anuupuwelleeye mmo mwiiwellelleenyu navettho mwamwaakhenlleenyu moovelleella olemu wunchichi.

¹⁶ Kinnahakallalla wi kinnuuroromellani mu erive ello.