2 Akorinto 6 - Mawu a Mulluku

¹ Sika voopharani mutteko vamodda ni Mulluku, ninnuuvekani nyuwaano mwaakhenlle echisomo ya Mulluku wi ehikhalle yoohikhalla ni mutteko.

² Vawi Mulluku anallota wi, “Enthawi kaganizalleemi ddawuukondella, kaawaakhullella, nllapo naphiyalliiwa wi kuuvulluse, kahuukavihera.” Ngiiwani! Ella sika enthawi yaphaama, ollello sika nllapo noovullusiwa!

³ Khaninapaalla wi arive muthu aphwanyelle muttekwaahu yoonanara. Sika ninneeseesa wi nihihiye yoolepheliha va ettilla ya arive muthu.

⁴ Koma mu erive ello ninooniha wi niri oorumeyella a Mulluku. Vawi ninnavillella ddookhupanyiha, ddoohoosa, ddookatamiha,

⁵ vawuukuthiwani, voohiyiwani mundende, vootthukumanelliwani, voopharani mutteko moollipa, voohikonani ni voohichani.

⁶ Koma hiyaano nohooniha wi tti oorumeyella a Mulluku vookhallani aweella murima, eezeru, oovillella ni ooreera murima, vookhallani ni Munepa Waweella ni echikondi yawoona,

⁷ voollalleyani othenga wawoona ni vookhallani ni masiva a Mulluku. Echilungamo sika ezida ddahu ddoowanella ni ddawiitetezella.

⁸ Ninnavahiwa olemu ni onyaambusiwa ninnallotelliwa epewe ni othokoziwa. Ninnooniwa wonanko awoottha naari nillotaka ddawoona.

⁹ Ninnooniwa wonanko oohidduwanyeya naari nidduwanyeyaka ni athu attheene, wonanko nookhwa naari niri ni okumi, wonanko noollakiwa naari nihiiphiwe.

¹⁰ Ninnooniwa wonanko oomoriha ethakaraka naari enthawi ddittheddene nihakallallaka, wonanko oohoowa naari naaweeriha athu anchichi okhalla eeyuuma, wonanko oohikhalla ni ello naari niri ni ddeko ddittheddene.

¹¹ Akhwaaka ookondiwa a o Korinto, ninnuulleellani mwawiiweya nave nohuuhiyani vamurimani wunchichi.

¹² Khe hiyaano nihinuuhiyani vamurimani vahu koma nyuwaano sika muhinanihiya vamurimani vanyu.

¹³ Vano kinallota ni nyuwaano wonanko muri anaaka. Munihiyettho vamirimani vanyu!

Muhaattaneke ni athu oohikhulupilila

¹⁴ Muhaattaneke ni athu oohikhulupilila. Echilungamo ni yoonanara ddinaathaanane mwawiidde? Epiphi ni owala ddinaathaanane mwawiidde?

¹⁵ Khrisitu ni Satana eniiwanane mwawiidde? Ookhulupilila ni oohikhulupilila enaphwanaphwana mwawiidde?

¹⁶ Enyumba ya Mulluku enaattane ni mafano mwawiidde? Vawi hiyaano tti enyumba ya Mulluku Ookumi. Mulluku yeekhaaye aallota wi, “Kineerokhalla mwa alliwa, nave kineereweeteeta variyari viwa. Kineerokhalla Mullukwiiwa, nave alliwa beneerokhalla athwaaka.”

¹⁷ Nave vano Apwiya Mulluku enallota wi, “Khumani variyari viwa nave muhipwesererane ni yaayo. Muhittannye ello yooripihiwa, nave kineerowaakhellani.

¹⁸ Kineerokhalla Attiitthaanyu, nave muneerokhalla anaaka aallopwana ni aatthiyana. Apwiya Mulluku Amasiva Mattheene sika enallota ddenndda.”