2 Akorinto 5 - Mawu a Mulluku

¹ Vawi ninnadduwella wi musasa olla ninakhalleehumo wakumulliwa, oyo tti mwiillaahu wa va ellapo yavatthimva, Mulluku aneeronivaha enyumba yoohimalla oddullu eyo ayikhozilleye.

² Vano vookhallani m'musasanoolla, munkhellaahu tti munchichi wi niwarihiwe enyumbaahu yoddullweeyo.

³ Sika nawarihiwa ni yeeyo khanikhalla epwillimwinddi.

⁴ Ninakhalleehu m'misasani dda ellapo yavattheella, ninniipullella ni okhupanya, khe wi ninapaalla ohiya mwiillaahu wa ellapo yavattheella koma ninapaalla wi niwarihiwe mwiilli wooddullu wi okhwa emiryiwe ni okumi.

⁵ Mulluku sika anikhozenre ello yeella nave aanivaha munepaaye wonanko echikole.

⁶ Sika ninnallipa murima wunchichi enthawi ddittheddene. Ninnadduwella wi nakhalla owaani m'mwiillini wa ellapo yavattheella ninnarekamellana ni owaani wa Apwiya.

⁷ Vawi okumaahu onahoollelliwa ni echikhulupililo, ohiri ddeko ddawooneya ni miittho.

⁸ Ninnallipa murima wunchichi koma Waaweerokhalla phaama okhumamo m'mwiillini mwahummu ni okhalla owaani ni Apwiya.

⁹ Ninnapaallesesa waahakallalliha, ohiyana ni erive ello, vatthimva naari oddullunko.

¹⁰ Vawi hiyaano attheene ninaphwanella ophiyera vamiitthoni va Khrisitu wi neeruziwe ni olliyooyo. Arive muthu aneerothuviwa moollikana ni erive ello eerilleeye, yaphaama apaalle yoonanara.

Waattanihiwa ni Mulluku oweella mwa Khrisitu

¹¹ Ninnadduwella wi tti woophwanella owoova Apwiya nave ninneeseesa waakopa athu amodda wi yaathwarelle Apwiyaayo. Mulluku annanidduwella phaama hiyaano nave kinnaganiza wi munnanidduwellattho hiyaano m'murimani mwanyu.

¹² Khaniniitetheella weekhiihu wa nyuwaano koma ninapaalla wuuvahani ekaamba yaphaama wi munikotelleke hiyaano wi mwawore owaakhulla ayo enakotella ddawooneya ni miittho ohiri dda m'murimani mwiwa.

¹³ Naari nooneyaka wonanko athu oohiphara muru niri ddiidda wi nimutitimihe Mulluku. Komattho naari nooneyaka wonanko eezeru niri ddiidda ekaamba yawuukaviherani nyuwaano.

¹⁴ Ninalamuliwa ni echikondi ya Khrisitu vawi ninnasimikiza wi muthu mmodda aakhwa ekaamba ya athu attheene, sika attheene yaakhwana.

¹⁵ Nave Khrisitu aakhwa ekaamba ya attheene wi ayo eri ni okumi khenaphwanella ekhalleke ni okumi mwaweekhiiwa koma wa oyo aakhwille ni ovenyihiwa wa ookhwa ekaamba ya alliwaayo.

¹⁶ Waambeella vano ophiyera muhoollo khaninamweeruzattho arive muthu moollikana ni omuthu. Naari khalle naamweeruza Khrisitu moollikana ni omuthu koma vano khanineera ddiiddo.

¹⁷ Arive muthu ari mu eyaattano ni Khrisitu, tti yoophatuwa yanaanweene, ddakhalle ddoomalla, ddanaanweene ddoophiya.

¹⁸ Ddittheddenenndda ddineeriwa ni Mulluku, oyo oweella mwa Khrisitu aanattaniha ni yeekhaaye. Nave aanivaha mutteko woowaattaniha athu amodda ni olliyooyo.

¹⁹ Sika Mulluku ahaattana ni ellapo yavatthi ettheene oweella mwa Khrisitu nave khaawerengelle machimwiiwa. Nave aaniinya othenga wawi nikhalleke mwawaattana wi niwullalleye.

²⁰ Vano hiyaano tti akazembe a Khrisitu nave Mulluku annuuvekani oweella mwa hiyaano. Vano ninnuuvekani munipuroni mwa Khrisitu wi mwaattanihiwe ni Mulluku.

²¹ Khrisitu khaarina machimo koma Mulluku aamweesa wonanko oochimwa ekaamba ya hiyaano wi mu eyaattano ni Khrisitu nikhalle oolungama vamiitthoni va Mulluku.