2 Akorinto 4 - Mawu a Mulluku

Eyuuma ya Munepa mu mino

¹ Mulluku mu echifundwaaye oonivaha mutteko yoolla wi niphare, sika vano khenitathilla murima.

² Noohiya ddaweera ddawiipittheya ni ddoowulliha muru nave ddaweera ddahu khe ddawoottha apaalle waanganyera mawu a Mulluku. Koma ninnallalleya ddawoona vaweella wiitetheella wonanko omboni wa arive muthu ni vamiitthoni va Mulluku.

³ Vawi othenga waphaama ninallalleyeehu khe wookhuweya koma onakhalla wookhuweya wa ayo ehinavullusiwe.

⁴ Khenakhulupilila kaambiiwa mulluku oonanara a ellapo yavattheella oheeriha mirima ddiwa wi ddihooneke. Sika khenawora woona omolleella wa othenga waphaama wa ntitimiho na Khrisitu oyo anaphwanaphwana ni Mulluku.

⁵ Vawi ninallalleyeehu khe dda hiyaano koma ninallalleya dda Yesu Khrisitu wi tti Apwiya. Nave hiyaano wi tti oorumeyellaanyu ekaamba ya Yesu.

⁶ Mulluku aallotille wi, “Owala omolleelle ovenyera mwiipiphini.” Tti Mulluku mmoddamoddave yooyo enre owala waye wi omolleelle m'mirimani mwahu wi onivahe odduwella dda ntitimiho na Mulluku noomolleella va ekhove ya Khrisitu.

⁷ Nave hiyaano nirina eyuuma ya Munepa niri wonanko mino wi noonihe wi masiva muullupalli tti a Mulluku, ohiri a hiyaano.

⁸ Ovenyera embali ddoohiyanahiyana ninnakatamihiwa koma oohinyingallelliwa, ninnakayikihiwa koma khaninatathilla murima.

⁹ Ninnahoosiwa koma oohitathilliwa ni Mulluku. Nave naari ninnavoreyiwa, khaninoonongeya.

¹⁰ Enthawi ddittheddene ninneetana okhwa wa Yesu m'mwiillini mwahu wi okumaayettho wooneye m'mwiillini mwahu.

¹¹ Mu okumaahu muttheene ninnoopopihiwa ni okhwa ekaamba ya Yesu wi okumaayettho wooneye mwa hiyaano.

¹² Hiyaano nahaakhullella woopopihiwa ni okhwa wi nyuwaano mukhalle ni okumi.

¹³ Mawu a Mulluku eni, “Kaallota kaambiiwa kaakhulupilila.” Vookhallani ni murima yooyottho wookhulupilila, ninnallotattho kaambiiwa ninnakhulupilila.

¹⁴ Ninnadduwella wi Mulluku, oyo aavenyihalle Apwiya Yesu, aneeronivenyihattho hiyaano wonanko mmo eerilleeye ni Yesu nave ni onikusellattho vamiitthoni vaye vamodda ni nyuwaano.

¹⁵ Ddittheddenendda tti ekaamba ya nyuwaano wi echisomo ya Mulluku yaaphiyere athu anchichi wi vikhalle othokoza wunchichi wi Mulluku atitimihiwe.

Okhalla mu echikhulupililo

¹⁶ Ekaamba ya yeella hiyaano khaninatathilla murima. Naari miilli ddahu dduntaka vang'ono vang'ono, mirima ddahu ddinnakhallihiwa ddanaanweene nllapo ni nllapo.

¹⁷ Nave ddookatamiha dding'onong'ono ninooneehu mvanndda ddineeroniphwanyella ntitimiho nuullupalli ni noohimalla, nookhwaranya ddookatahihannddo.

¹⁸ Vawi mirima ddahu ddiri va ddeko ddoohooneya ohiri va ddeko ddawooneya. Ddeko ddawooneya tti ddoomalla koma ddeko ddoohooneya tti ddoohimalla.