2 Akorinto 3 - Mawu a Mulluku

Oorumeyella a echipangano yanaanweene

¹ Ethiyo niniitetheellattho weekhiihu? Apaalle ninnapaalla kalata otetheella wa nyuwaano apaalle ovenyera wa nyuwaano wonanko athu amodda?

² Nyuwaano sika kalataahu ootetheella, oolembiwa m'murimani mwahu wi arive muthu adduwelle ni weerenga.

³ Nyuwaano muri wonanko kalata oolembiwa ni Khrisitu oorumihiwa ni hiyaano. Khalembiwe ni inki apaalle owakiwa vamallukuni koma ni Munepa a Mulluku a Okumi m'mirimani dda athu.

⁴ Ninallota yeella kaambiiwa oweella mwa Khrisitu ninnasimikiza yeella vamiitthoni va Mulluku.

⁵ Kheyiivo erive ello enaaneerihe ollota wi hiyaano ninnawora ophara mutteko yoolla koma masiva yaalla enavenyera wa Mulluku.

⁶ Tti olliye aaneerihalle wi niwore orumeyella echipangano yanaanweene yoovenyera mwa Munepa ohiri mwa lamulo noolembiwa. Vawi lamulo noolembiwa ninniipha koma Munepa annavaha okumi.

⁷ Malamulo a Mose yawakiwe vamallukuni nave yawiille mwa ntitimiho. Naari owala wa ekhove ya Mose wamalliiwa, waari wamasiva wawi athu a o Israele kheyaaworille owehave va olliyooyo. Malamulo yaalla, ayo eniipha, yaarimi ewiille ni ntitimiho nenno,

⁸ nave ntitimiho nookhalla ni ddeko ddoovenyera wa Munepa tti nawunnuwa mwawiidde!

⁹ Lamulo naweeruza athu wi yiiphiwe naarimi niri ni ntitimiho nave ntitimiho na echipangano yanaanweene nno nnaalungamiha athu niri nawunnuwa mwawiidde!

¹⁰ Sika lamulo noomalla masiva ekaamba ya ntitimiho nawunnuwa.

¹¹ Vawi lamulo ninamalla naarimi niwaaka ni ntitimiho nave ntitimiho na echipangano yanaanweene eyo eri yoohimalla ninaakhalle nawunnuwa mwawiidde!

¹² Kaambiiwa nookhalla ni etiyerello yeella, khaninoova voollalleyani othenga.

¹³ Hiyaano khe wonanko Mose, oyo akhunenlle ekhovaaye ni ekuwo wi athu a o Israele ehoone owala wa ekhovaaye voomallani vang'ono vang'ono.

¹⁴ Mulluku ahummiha mirima ddiwa nave ophiyera vano mirima ddiwa ddookhunelliwa ni ekuwo erive enthawi malamulo a Mose yaaweerengaka wa alliwaayo. Ekuwo yeeyo enakhunuulliwa oweella mwa Khrisitu.

¹⁵ Ophiyera vano, malamulo a Mose yaaweerengiwaka, ekuwo yeella ennakhuneella mirima ddiwa.

¹⁶ Koma ekuweeyo ennakhunuulliwa muthu arukunuwella wa Apwiya.

¹⁷ Vano, Apwiya mu etima yeella tti Munepa nave mvo vinakhalla Munepa wa Apwiya vookhalla ottaphuwa.

¹⁸ Hiyaano attheene ninnoona ntitimiho na Apwiya nihikhunenlle ekhove ddahu. Munepa wa Apwiya annanitthattusa wi niphwanaphwane ni olliyooyo okhalla ni ntitimiho nawunnuwa.