2 Akorinto 2 - Mawu a Mulluku

¹ Sika kaaganiza wi kihiwettho wa nyuwaano wi kihuuvoriiheni murima.

² Ethiyo kuuvoriihani murima nyuwaano, anaakihakallallihe ttaani? Vawi tti nyuwaanove munawora okihakallalliha miyaano.

³ Ella sika ekaambiiwa kalembilleemi kalata wa nyuwaano. Ngaapanlle owa wa nyuwaano wi kivoriihiwe murima ni nyuwaano, athu ayo yaphwanenlle okihakallalliha. Vawi kinnadduwella wi miyaano kahakallalla sika attheenenyuttho moohakallalla.

⁴ Kahuulembellani mookatamihiwa murima ni okhupanya ni miitthori ddinchichi. Vawi yoolingaaka kheyaari yawi kuuvoriiheni murima koma yawi mudduwelle wi munnakikonda wunchichi.

Okhululukella oochimwa

⁵ Vano vakhalla muthu mmodda amuvoriihalle murima mukhwaaye koma ollota moohonjerera, khenre yeeyo wa miyaano koma wa nyuwaano attheene mwa ettilla emodda.

⁶ Muthu yoolla oollakiwa mookwakhwanella oweella mwa eyo anchichi a nyuwaano mwiiwananeenyu.

⁷ Nave vano munaphwanella wi mumukhululukelle ni omullipiha murima wi ahihiye okhulupilila ekaamba yootathilla murima.

⁸ Nave kinimuuvekani wi mumusimikizelle wi munnamukonda wunchichi.

⁹ Kahuulembellanittho kalata yoolla kaambiiwa kapaalla wi kidduwelle ni oweesani mwaari mwiiwellellaka mu ddeko ddittheddene.

¹⁰ Mwamukhululukella muthu yoolla nameenettho kinnaakhululukella. Vawi eyo kikhululukelleemi, yaari erivo ello yoopaalleya okhululukella, kinakhululukella ekaamba ya nyuwaano ni vamiitthoni va Khrisitu.

¹¹ Neereke nndda wi Satana ahiphwanyellevo ekari vawi ninnadduwella misampha ddaye.

Okhupanya wa Paulo o Troasi

¹² Kaphiyalleemi o muzinda wa Troasi wi kallalleye othenga waphaama wa Khrisitu, Apwiya yaari ehullalle khalle mullako wa mutteko wenko.

¹³ Koma ngaarina murendelle m'murimani mwaka kaambiiwa ngaamuphwanyillewo mwanamunnaka Tito. Sika kahaallaanya athu wenko nave kaaya o Masedoniya.

Ogonjiha oweella mwa Khrisitu

¹⁴ Mulluku athokoziwe! Vawi mu eyaattano ni Khrisitu Mulluku annanihoollella enthawi ddittheddene wi nigonjiheke. Navettho Mulluku ananiphariha mutteko woovuwiha ddoodduwella dda Khrisitu virive veko wonanko nthuko naphaama.

¹⁵ Vawi hiyaano niri wonanko nthuko naphaama phaama noovelleelliwa ni Khrisitu wa Mulluku, nko onavuwihiwa variyari va ayo enaavullusiwe ni ayo ehinaavullusiwe.

¹⁶ Wa ayo ehinaavullusiwe, tti wunkha wawiipha. Koma wa ayo enaavullusiwe, tti nthuko naphaama noovaha okumi. Khaya vano ttaani anaawore mutteko yoolla?

¹⁷ Hiyaano khaninaphwanaphwana ni athu amodda anchichi ayo enakusa othenga wa Mulluku wonanko tti malonda oohiwallamella mutengo koma kaambiiwa Mulluku oonirumiha hiyaano, ninavuwiha othenga mwawoona vamiitthoni vaye oweella mwa Khrisitu.