2 Akorinto 13 - Mawu a Mulluku

Ochenjeza woomalliha

¹ Vano ella tti enthawi yaneeraru kinaweemi wa nyuwaano. Mawu a Mulluku eni, “Orive mullatu osimikizelliweke ni amboni eelli apaalle araru.”

² Va olendwaaka waneepiilli kahaachenjeza khalleve athu oochimwaayo ni athu amodda attheene. Nave vano kinimuuchenjezani wiilli wi kawa khaavo anaathawe ollakiwa.

³ Ella tti echizindikiro munapaalleenyu wi Khrisitu anallota oweella mwa miyaano. Olliye khe oofooka vaweerani ni nyuwaano koma annooniha masiva variyari vanyu.

⁴ Naari aari oofooka vootthomeyiwani vamutandani vano tti ookumi oweella mu masiva a Mulluku. Hiyaanottho tti oofooka wonanko olliyooyo koma vaweerani ni nyuwaano ninakhalla ni okumi oweella mwamasiva a Mulluku wonanko olliyooyo.

⁵ Muddeeseke ni oddeeruza weekhiinyu wi moone mwaarimi mukhallaka mu echikhulupililo. Ddawoona munnadduwella wi Khrisitu Yesu ari mwa nyuwaano koma mwaari muhiri ddiiddo sika moolephela.

⁶ Kinnatiyerella wi muneerodduwella wi hiyaano tti oohilephela.

⁷ Ninnavekella wa Mulluku wi muhichimweke. Khahiyo wi hiyaano nnooniha wi tti aphaama koma wi mweereke ddaphaama naari amodda enoonaka wonanko oolephela.

⁸ Vawi khaniwora weera ddennddo koma ddennddove ddinakavihera yawooneeyo.

⁹ Ninnahakallalla wi hiyaano naafookaka nyuwaano munnakhalla ni masiva. Nave ninnavekellattho wi mukhalle aphaama wunchichi.

¹⁰ Kinamulemba kalatoolla kihinaphiye wi kaphiya kihikhalle oowalli voopharihani mutteko olamulello oyo Apwiya yakivahilliiwa. Olamulello yoolla tti wawuullipihani ohiri wawuumwarani.

Ollochella woomalliha

¹¹ Asinnaka ni arokoraka, hallani phaama! Mullipihelleke okhalla aphaama wunchichi, mwiiwellelleke nnddo kinuuvekeemini, mwiiwananeke mmodda ni mukhwaaye, mukhalleke m'murendelleni. Vano Mulluku a echikondi ni murendelle aneerokhalla ni nyuwaano.

¹² Muvahaneke mooni mwa echikondi ya ookhulupilila.

¹³ Athu a Mulluku attheene ennuuvahani mooni.

¹⁴ Echisomo ya Apwiya Yesu Khrisitu, echikondi ya Mulluku ni eyaattano ya Munepa Waweella ddikhalle ni nyuwaano attheene.