2 Akorinto 12 - Mawu a Mulluku

Ddoolloha ni ddawuupullulla dda Paulo

¹ Kinaphwanella okota naari kihiphwanyillevo ello yaphaama. Sika vano kineerollota dda ddoolloha ni dda wuupullulla ddoovenyera wa Apwiya.

² Kinnamudduwella ookhulupilila mmodda aamullopwana oyo aakusiwe oya oddullu miyakha khumi ni misese ddivirallennddo (nginadduwella wi nndda ddaheereya apaalle ddaari ddoolloha, anadduwella tti Mullukuve).

^3-4 Kinnadduwella wi mullopwanooyo aakusiwa oya o Paradizo (wiillittho, nginadduwella wi nndda ddaheereya apaalle ddaari ddoolloha, anadduwella tti Mullukuve). Nave wenko ahiiwa ddeko ddoohilloteya, ddeko ddoohaakhullelliwa wi muthu addillote.

⁵ Sika kineeromukotella mullopwana yoolla nave ngiikotella meekhaaka koma ddekove ddinooniha ofooka waka.

⁶ Naari keeki kikote ngaakhalle ookarangeya kaambiiwa kaalloteke ddawoona koma nginakotella kaambiiwa kinapaalla arive muthu akivahe olemu va ddeko anooneeye ni wiiwa ovenyera wa miyaano.

⁷ Kaavahiwa yookatamiha mu omuthwaaka wi kihiinyarulleke ekaamba ya ddawuupullulla koonilleemi. Kinakhalla wonanko kinimuukuthiwa ni oorumiwa a Satana wi kihikoteke.

⁸ Kaavekella wa Apwiya oraru wi avenyihevo yeella.

⁹ Koma ahaakhulla wi, “Echisomwaaka sika enapaalleya mwa weyaano vawi masivaaka enunnuwa wakhalla oofooka.” Vano koohakallalla ni murimaaka muttheene wi kikotelleke dda ofooka waka wi masiva a Khrisitu enooneya mwa miyaano.

¹⁰ Kinnahakallalla ni ddoollova, ddoovevulliwa, ddookhupanyiha, ddoohoosa ni ddookatamiha ekaamba ya Khrisitu. Vawi kakhalla oofooka, vano kinakhalla amasiva.

Okhupanya wa Paulo va Akorinto

¹¹ Kineera wonanko ookarangeya koma tti nyuwaano mwakiwatihenre. Nyuwaano sika muphwanenlle okitetheella. Vawi naari kiri oohikhalla ni mutteko, amurummwaanyu uullupallaalle khenakikhwaranya miyaano.

¹² Kaarimi ni nyuwaano, mookhurumusa murima kaheera ezizindikiro, ddoottikhiniha ni ddeko ddamasiva ddawooniha wi miyaano tti murummwa.

¹³ Ethiyo tti tini keerelleemi mipingo ddimodda kihiweerelleemini, ohiya wi nguukatamihalleni vawuuvekani nikavehero na makobiri? Kinuuvekani wi mukikhululukelle yoonanara yeella.

¹⁴ Vano kookhozeka wi kiwe wa nyuwaano enthawi yaneeraru koma ngiwa kuukatamihani. Miyaano kinuupaallani nyuwaano, ohiri makobiraanyu. Vawi anamwani khenaphwanella waasungella makhollwiiwa eyuuma koma makhollo sika enaphwanella waasungella aniiwa eyuuma.

¹⁵ Kineerohakallalla ovelleella ddaaka ddittheddene ni meenettho wi kuukavihereni. Nave ethiyo kaawuukondakani wunchichi, nyuwaano mukikondeke vang'ono?

¹⁶ Vano munnaakhullella wi miyaano nguukatamihalleni. Koma athu mmodda enallota wi miyaano tti awoottha nave kahuupharani mwawuullekani.

¹⁷ Ethiyo kahuullekani oweella mwa athu amodda ayo kaarumihalleemi wa nyuwaano?

¹⁸ Kaamuveka Tito wi awe wa nyuwaano nave kaamurumiha mwanamunnihu mmodda wi athaananena. Tito khuullekilleni nyuwaano. Olliye ni miyaano neera ni munepa woophwanaphwana ni makhallello oophwanaphwana.

¹⁹ Apaalle munaganiza wi enthawi ettheene ninakhallella wiiteteza weekhiihu vamiitthoni vanyu. Khe ddiiddo! Koma ninallota mu eyaattano ni Khrisitu vamiitthoni va Mulluku. Nave akhwiihu ookondiwa, erive ello ninallota wi nuullipiheni.

²⁰ Kinoova wi kawa kinuuphwanyeni muri oohiyana ni mmo kinapaallelleemi wi mukhalle nave munaakiphwanye kiri oohiyana ni mmo munapaallelleenyu wi kikhalle. Kinoova wi kinaaphwanye okangana, ehache, osha murima wiiddivella, epewe, miseche, wiitukhulla ni waanganyera.

²¹ Kinoova wi kawattho Mullukwaaka aneerokiwulliha muru vamiitthoni vanyu nave kineerowinllella athu anchichi ayo yachimmwe nave khenarukunuwe murima o machimwiiwa, minkhella ddoonanara ni oraruwa.