2 Akorinto 11 - Mawu a Mulluku

Paulo ni amurummwa awoottha

¹ Waaweerokhalla waphaama mwakaakhullenlleke naari kiri ookarangeya vang'ono. Kinimuuvekani wi mweere ddiiddo!

² Kinnuukhallellani ehache, wonanko mmo Mulluku anakhallelleeye. Nyuwaano muri wonanko namwalli oyo kimutomelihalleemi wi atthelliwe ni mullopwana mmoddave, sika Khrisitu yeekhave.

³ Koma kinoova wi maganizwaanyu enaavirikanyihiwe nave wi muneerohiya wiivelleella wanyu woororomelleya wa Khrisitu wonanko mmo Heva aallekiweeye ni olleka woochenjera wa enowa.

⁴ Vawi nyuwaano munnamwaakhullella moohakallalla muthu mmodda oyo anawa wa nyuwaano nave amullalleya Yesu mmodda, oohiyana ni Yesu naamullalleyilleehu. Nave munnaakhullella munepa mmodda ni othenga mmodda oohiyana ni Munepa ni othenga mwaakhenlleenyu ovenyera wa hiyaano!

⁵ Kinaganiza wi amurummwaanyu, ayo munaweereenyu uullupalli, khekikhwaranya miyaano.

⁶ Apaalle miyaano nginna eruso yoollota koma kookhalla ni eruso yoodduwella. Vawi noowoonihani yeella phaamaddene enthawi ddittheddene ni mu ddeko ddittheddene.

⁷ Ngawuullivellihalleni erive ello kallalleyeemi othenga waphaama wa nyuwaano. Kahiiyeviha meekhaaka wi nyuwaano munnuwihiwe. Ethiyo wenngu waari ochimwa?

⁸ Kaphareemi mutteko variyari vanyu, kaallivelliwa ni mipingo ddimodda. Wonngu waari wonanko waakha wi kuurumeyelleni.

⁹ Nave enthawi ettheene kaariimi ni nyuwaano ngawuuhoosilleni ni nikavihero kapaalleemi makobiri. Asinnaka ni arokoraka oovenyera o Masedoniya yaakivaha ddeko kapaalleemi. Khalle ngawuukatamihalleni navettho muhoollommo nguukatamihani!

¹⁰ Ekaamba yawoona ya Khrisitu eri mwa miyaano, kinimasimikiza wi khaavo muthu oyo mu ezigawo ddittheddene dda Akaiya anaahiihe okotella waka wa ddenndda.

¹¹ Ethiyo kinallota ddiidda kaambiiwa nginuukondani? Mulluku annadduwella wi kinnuukondani.

¹² Kineerovirellella weera nndda kineereemi vano wi amurummwa amoddaayo ehiphwanyellevo mpata wookota voollotani wi ennaphara mutteko wonanko hiyaano.

¹³ Yaayo tti amurummwa awoottha ayo enoottha dda muttekwiiwa nave eddeelliha weekhiiwa wi yooneyeke wonanko amurummwa awoona a Khrisitu.

¹⁴ Khaddihiyo ddoottikhiniha vawi naari Satana annaddeera wi ooneyeke wonanko mungelo oomoolleella!

¹⁵ Sika khehiyottho yoottikhiniha wi oomurumeyellaaye yaaddeeriha wi yooneyeke wonanko oorumeyella oolungama. Koma voomallihella viwa eneerewaakhella yoophwanella ddaweera ddiwa.

Ddoohoosa dda Paulo va orumeyella waye

¹⁶ Kinaaka killote wiilli wi arive muthu ahiganize wi miyaano tti ookarangeya. Koma mwaarimi muganizaka ddiiddo, mukaakhelle wonanko ookarangeya nave mukihiye kikote vang'ono.

¹⁷ Kinalloteeminndda vano khe ddoovenyera wa Apwiya koma kinallota mookota wonanko ookarangeya.

¹⁸ Nave vawi athu anchichi enakotella ddeko dda omuthu, nameenettho kineereweera emoddamoddave yeeyo.

¹⁹ Vawi nyuwaano muri eezeru munnaavillella ookarangeya moohakallalla!

²⁰ Munnamwaakhullella arive muthu anuuhoosani apaalle wuuchellani ddaanyu apaalle anuullekani apaalle anuuvevullani apaalle anawuukuthani owiitthoni.

²¹ Kinnawulliwa muru wi killote wi hiyaano naari oofooka wi neere ddeko ddennddo. Koma yeehina ekotelle wonanko ookarangeya, miyaanottho kineerokotella kaallotaka wonanko ookarangeya.

²² Ethiyo alliwaayo tti Aheberi? Miyaanottho tti Muheberi. Ethiyo alliwaayo tti Aisraele? Miyaanottho tti Muisraele. Ethiyo alliwaayo tti edduullu dda Abrahamu? Miyaanottho tti edduullu ya Abrahamu.

²³ Ethiyo alliwaayo tti oorumeyella a Khrisitu? Kinallota wonanko ookarangeya koma miyaano tti oorumeyella ookhwaranya alliwaayo! Koophara mutteko moollipa ohiyana ni alliwaayo. Mowaakhwaranya alliwaayo koohiyiwa mundende wiilliwiilli, koowashulliwa wunchichi nave wiilliwiilli kaari vakhuviru okhwa.

²⁴ Ayuda yaakiwashulla otthanu ni miwashullo 39.

²⁵ Kahuukuthiwa ni ekopo oraru nave kaavokhiwa malluku omodda. Va olendwaaka oraru wa vamaaddini ekallawa ddaanaphweeya nave omodda kaakhalla m'maaddini nllapo nimodda otthaana ni mahiiyu.

²⁶ Va olendwaaka munchichi kaanakumana ni ddawoopiha dda maaddi oosefukella, allupaawiiya, Ayuda akhwaaka ni athu ayo ehiri Ayuda. Mwaakhallattho ddawoopiha mumizindani, muhakani, mu enyanja yoowallamella navettho ddoovenyera wa ookhulupilila awoottha.

²⁷ Kaanaphara mutteko moollipa nave wiilliwiilli ngaakona. Kaanavolliwa ettalla ni nthona nave wiilliwiilli ngaarina yoocha. Kaanariryiwa nave ngaarina yoowara.

²⁸ Vowaanjererani yeeyo, nllapo ni nllapo murima onnakivoreya vookhupanyellani mipingo ddittheddene.

²⁹ Muthu mmodda afooka miyaanottho kinnafooka, muthu mmodda achimwa, kinnaddalliwa ni ethakaraka.

³⁰ Kaphwanella okota, kinaakotelleke ddeko ddinooniha mmo kifookelleemi.

³¹ Mulluku, Attiitthiiwa a Apwiya Yesu ennadduwella wi miyaano nginallota ddawoottha. Nnddina naye nidalisiwe enthawi yoohimalla.

³² Kaariimi o Damasiko, enduna yuullupalli ya mwene Areta yahaahiya oowehera va millako dda muzinda wi ekimake miyaano.

³³ Koma kaahiyiwa m'mutaangani kikitthihelliwa vasirini nave sika kaavulluwa wa mwenooyo.