2 Akorinto 10 - Mawu a Mulluku

Paulo anateteza orumeyella waye

¹ Miyaano Paulo, oyo athu enakeera oomaalleya ni oolleva kakhalla ni nyuwaano koma ootokollolla karekamella, kinimuuvekani mwa meekhaaka ekaamba ya wiiyeviha ni oreera murima wa Khrisitu.

² Kinuuvekani wi muhikiwatihere okhalla ootokollolla kaphiya. Vawi kinnasimikiza wi miyaano kineerewaahumullulla moowalli athu ayo enallota wi meerellwaahu tti wonanko a athu a ellapo yavatthi.

³ Tti ddawoona wi ninakhalla mu ellapo yavatthi koma khaninawana ekhoto ya va ellapo yavatthi.

⁴ Ezida ninaphariheehu mutteko voowanani khe dda athu a va ellapo yavatthi koma tti masiva a Mulluku ayo ninaaphariheehu mutteko vawoonongani mipanda ddoollipa. Ninnaagonjiha maganizo oolleka

⁵ ni erive ello yoolepheliha athu odduwella dda Mulluku. Ninnaaphara erive maganizo wonanko kaporo wi emwiiwellelleke Khrisitu.

⁶ Nave nyuwaano mooniha wi munniiwellella ni murima muttheene, niri ookhozeka omullaka arive muthu ohiiwellella.

⁷ Onani ddawoona ddiwa. Aarimi arivo muthu anasimikiza wi tti aaye a Khrisitu, olliyooyo iimolleelle yeekha? Vawi hiyaanottho niri aaye a Khrisitu wonanko olliyooyo.

⁸ Nave miyaano nginawulliwa muru naari kikotellaka wunchichi dda olamulello oyo Apwiya enivahilliiwa, olamulello woollipiha nyuwaano ohiri woogonjiha nyuwaano.

⁹ Nginapaalla wi kooneye wonanko kinimawoopopihani ni makalataakaalla.

¹⁰ Vawi amodda enallota wi, “Makalata a Paulo tti amasiva ni oowalli. Koma akhalla ni hiyaano, anakhalla oofooka nave mawaaye tti oohikhalla ni mutteko.”

¹¹ Athu yaalla enaphwanella yiiwesese wi khuwaavo ohiyana variyari va ddeko ninaleembeehu mukalatani navenyavo ni nnddo nineereehu nawa wa nyuwaano.

¹² Khaninapaalla wiiphwanaphwaniha apaalle ollikana ni athu ayo eniitetheella weekhiiwa. Yaayo khenna ezeru! Eniiphwanihera weekhiiwa nave enaddeeruza weekhiiwa ni mafanwiwaayo!

¹³ Nave khanikotella mookhwaranya muyezwaahu koma nineerokotella mutteko oyo Mulluku aninnyalleeye wi niwuphare. Nave nyuwaano tti embali emodda ya muttekwaahu.

¹⁴ Sika khanaakhwarannye muyezwaahu nawiilleehu wa nyuwaano. Naari awaamba owaana othenga waphaama wa Khrisitu wa nyuwaano.

¹⁵ Nave khaninakotella mutteko oyo ophariwe ni athu amodda ovirellella muyezo Mulluku anivahilleeye koma ninatiyera wi echikhulupilwaanyu yunnuwe wi munivahe olemu munchichi voohivirerellani muyezo anivahille Mulluku.

¹⁶ Vano Nineerowora ollalleya othenga waphaama mu ezigawo ddimodda nko nineereehu nihikotelle mutteko waphariwe khalle.

¹⁷ Nave mawu a Mulluku eni, “Oyo anapaalla wiitukhulla, iitukhulleke ni nnddo ddeeriwe ni Apwiya.”

¹⁸ Muthu oyo aniitetheella yeekha khanaakhullelliwa koma oyo anatetheelliwa ni Apwiya.