2 Akorinto 1 - Mawu a Mulluku

¹ Ovenyera wa miyaano Paulo, murummwa a Khrisitu Yesu mu opaalla wa Mulluku nave ovenyera wa mwanamunnihu Timoteo. Ninalembella mpingo wa Mulluku o Korinto ni wa athu attheene a Mulluku mu echigawo ettheene ya Akaiya.

² Echisomo ni murendelle ddoovenyera wa Mulluku Attiitthiihu ni Apwiya Yesu Khrisitu ddikhalle ni nyuwaano.

Paulo anamuthokoza Mulluku

³ Hankoni nimutitimihe Mulluku Attiitthiiwa a Apwiihu Yesu Khrisitu, Attiitthiihu a ethakaraka, Mulluku ookhurumusa murima wunchichi!

⁴ Mulluku annanikhurumusa murima mu ddoohoosa ddahu ddittheddene wi niworettho waakhurumusa murima akhwiihu ayo eri mu ddoohoosa ddoohiyanahiyana moollikana ni mmo hiyaano nakhurumuselliweehu murima.

⁵ Moollikana ni mmo ninahosiwelleehu wunchichi mwa Khrisitu, emoddamoddave yeeyo ni ninnakhurumusiwa murima wunchichi mwa Khristooyo.

⁶ Ninnahoowa wi mukhurumusiwe murima nave muvullusiwe. Hiyaano naakhurumusiwa murima, nyuwaano muneerokhurumusiwattho murima ni ovahiwa masiva oovillella ddoohoosa nnddottho ninavillelleehu.

⁷ Sika otiyera wahu mwa nyuwaano tti woohitikheya. Ninnadduwella wi Mwaahoosiwa wonanko hiyaano muneerokhurumusiwattho murima wonanko hiyaano.

⁸ Asinnihu ni arokorihu, ninaaka mudduwelle dda ddoohoosa noonilleehu mu echigawo ya Asiya.* Ddoohoosa ddahu ddaari dduullupalli ohiyana ni masivaahu. Nave khanaadduwella wi apaalle nineerokhalla ni okumi.

⁹ Naganiza wi nineerolamuliwa wi niiphiwe. Koma nndda ddaheereya wi nihiiroromelleke weekhiihu koma nimuroromelleke Mullukuve oyo anaavenyiha athu ookhwa.

¹⁰ Aanivullusa ovenyera o ddawoopiha dda okhwa nave aneeronivullusattho nave etiyerellwaahu eri mwa olliye wi aneeronivullusattho wiilli.

¹¹ Nyuwaano munaphwanella munikaviherekettho voovekellani. Vano athu anchichi eneeromuthokoza Mulluku ekaamba yoonidalisa vawaakhullellani mavekellwaahwaalla.

Ekaamba yamukukureyihalle Paulo ohokollweella o Korinto

¹² Ninnakotella wi yawuupusella murimaahu ennanisimikizella wi naakhalla moolungama ni moororomelleya makamaka nakhalleehu ni nyuwaano. Khanaawerille nndda oweella mu ezeru dda athu koma oweella mu echisomo ya Mulluku.

^13-14 Nnuulembellani ddennddove munaaworeenyu weerenga ni wiiwesesa. Nave naari vano munniiwesesa vang'ono, kinatiyera wi muwiiwesesa mookwakhwanella omamallihello. Wawi va Nllapo na Apwiihu Yesu Khrisitu muneeronikotella wonanko mmo ninuukotelleehuni.

¹⁵ Kaasimikiza dda ddeko ddittheddenenndda wi vawaamba kapaalla owa wa nyuwaano wi mudalisiwe ni owa waka wiilli.

¹⁶ Vawi kaganizalle wi kiwe wa nyuwaano kaayaaka o echigawo ya Masedoniya navettho kaawaakawo wi kaakhelle nikavihero noovenyera wa nyuwaano na olendwaaka wooya o Yudeya.

¹⁷ Ethiyo munaganiza wi kaganizeemi ddenndda ngaadduwella keereemi? Ethiyo apaalle kinooneya wonanko muthu, awaakhullella ni okhoota enthawi emoddave yeeyo?

¹⁸ Mulluku tti oororomelleya, sika eyo kuulleelleemini kheyaari waakhullella ni okhoota enthawi emoddave yeeyo.

¹⁹ Vawi Yesu Khrisitu, mwaana a Mulluku oyo aallalleyiwe variyari vanyu ni Sila, Timoteo ni miyaano khe awaakhullella ni ookhoota enthawi emoddave yeeyo. Koma mwa olliye mookhalla waakhullella enthawi ddittheddene,

²⁰ vawi oweella mwa olliye ddoolonjeza dda Mulluku ddinnakwakhwanihiwa. Ella sika ekaambiiwa nineereehu Amen oweella mwa Yesu Khrisitu wi nimutitimihe Mulluku.

²¹ Tti Mulluku oyo anikeraatthihalle hiyaano ni nyuwaano mu eyaattano ni Khrisitu. Tti Mulluku yooyo anizozille,

²² vookeraatthihani echizindikirwaaye va hiyaano navettho voohiyani Munepa Waweella m'mirimani mwahu wonanko echikole.

²³ Mulluku tti mbonaaka, annadduwella murimaaka! Kaaganiza wi kihihokollweellewo o Korinto wi kihivirellelle wuuvoriihani murima.

²⁴ Hiyaano khaninuulamulani yoophwanella nyuwaano okhulupilila vawi ninnadduwella wi nyuwaano tti oohitikheya mu echikhulupililo. Koma ninaphara mutteko ni nyuwaano wi muhakallalle.