1 Yohane 5 - Mawu a Mulluku

Ogonjiha wahu wa ellapo yavatthi

¹ Oyo anakhulupilila wi Yesu tti Mesiya* ayariwe wa Mulluku nave oyo anaakonda Attiitthinnya annamukondattho Mwaana.

² Naamukondaka Mulluku ni wiiwellella malamulwaaye sika ninaadduwellelleehu wi ninnaakonda anamwani a Mulluku.

³ Vawi omukonda Mulluku onattaphullella wiiwellella malamulwaaye. Nave malamulwaaye khehiyo ookatamiha,

⁴ kaambiiwa ayariwe wa Mulluku annawora ogonjiha ellapo yavatthi. Nave ninnagonjiha ellapo yavatthi ni echikhulupililo.

⁵ Ttaani anawora ogonjiha ellapo yavatthi? Tti muthu yooyove anakhulupilila wi Yesu tti Mwaana a Mulluku.

Omboni wa dda Yesu Khrisitu

⁶ Yesu Khrisitu sika aawiille ni maaddi a obatizwaaye ni nikhame na okhwa waye. Khaawiille ni maaddive koma ni maaddi ni nikhame. Nave Munepa Waweella yeekhaaye annavelleella omboni wi nndda tti ddawoona kaambiiwa Munepooyo tti awoona.

⁷ Sika vookhalla amboni araru, alla tti,

⁸ Munepa, maaddi ni nikhame. Nave ddiraru ddittheddene ddinnavelleella omboni omoddamodda.

⁹ Ninnaakhullella omboni wa athu; koma omboni wa Mulluku tti wookhwaranya wa athu nave aavelleella omboni wa dda Mwanaye.

¹⁰ Sika attheene enakhulupilila mwa Mwaana a Mulluku aakhalla ni omboni yoolla m'murimani mwiwa. Koma ayo ehinamukhulupilila Mulluku ennamweera awoottha kaambiiwa kheyaakhulupililalle omboni wa Mulluku dda Mwanaye

¹¹ Omboni yoolla tti wawi Mulluku oonivaha okumi woohimalla nave okumi yoolla onavenyera mwa Mwanaye.

¹² Oyo ari ni Mwaana ookhalla ni okumi yoolla koma oyo ahinna Mwaana a Mulluku khanna okumi.

Okumi woohimalla

¹³ Kinuulembellani nyuwaano yeella wi mudduwelle wi mookhalla ni okumi woohimalla nyu munamukhulupilila Mwaana a Mulluku.

¹⁴ Noollipa murima vamiitthoni va Mulluku kaambiiwa ninnasimikiza wi annaniiwa namuveka erive ello moollikana ni opaalla waye.

¹⁵ Annaniiwa namuveka nave kaambiiwa ninnadduwella wi nndda tti ddawoona sika ninnadduwellattho wi oonivaha nnddo namuvekilleehu.

¹⁶ Mwamoona mwanamunninyu apaalle murokorinyu eeraka machimo oohimukusella wookhwa, mumuvekelle wa Mulluku, sika wi amuvahe okumi. Alla tti yaayove machimwiiwa ehinaakusella wookhwa. Koma vookhalla machimo ookusella wookhwa nave nginallota wi mwavekelle wa Mulluku ekaamba ya yaayo.

¹⁷ Ddaweera ddittheddene ddoonanara tti machimo koma vookhalla machimo oohimukusella muthu wookhwa.

¹⁸ Ninnadduwella wi ooyariwa wa Mulluku khenavirellella ochimwa vawi Mwaana a Mulluku annaateteza nave Oonanarooyo khawora waavoreya.

¹⁹ Ninnadduwella wi niri a Mulluku naari ellapo yavatthi ettheene elamuliwaka ni Oonanarooyo.

²⁰ Ninnadduwella wi Mwaana a Mulluku oowa nave oonivaha wiiwesesa wi nimudduwelle Mulluku awoona. Ninakhalla mu eyaattano ni Mulluku awoona vawi niri mu eyaattano ni Mwanaye Yesu Khrisitu. Olla sika Mulluku awoona nave olla sika okumi woohimalla.

²¹ Anaaka, murapelleke mafano.