1 Yohane 3 - Mawu a Mulluku

Anamwani a Mulluku

¹ Ngoonani mmo Attiitthiihu enanikondelliiwa wawi ninnaromolliwa anamwani a Mulluku. Ddawoona hiyaano tti anaaye. Ellapo yavatthi khenanidduwella kaambiiwa khenamudduwella Mulluku.

² Akhwaaka ookondiwa, vano hiyaano tti anamwani a Mulluku koma khenadduwanyeya eyo ninaakhalleehu. Koma ninnadduwella wi Khrisitu ooneya, ninaakhalle oophwanaphwana ni olliye kaambiiwa ninaamoone wonanko mmo ariiye.

³ Arive muthu anatiyera yeella mwa Khrisitu anaddeelliha yeekhaaye wonanko mmo Khrisitu ariiye aweella.

⁴ Arive muthu oyo anachimwa khaniiwellella malamulo a Mulluku kaambiiwa ochimwa tti ohiiwellella malamulo.

⁵ Munnadduwella wi Khrisitu ahooneya wi avenyihe machimo nave wi mwa olliye machimo kheyaamo.

⁶ Sika arive muthu anakhalla mu eyaattano ni Khrisitu khanavirellella ochimwa. Koma oyo anavirellella ochimwa khanamoone Khristu apaalle khanamudduwelle.

⁷ Anaaka, mmodda ahiwoottottheni! Oyo aneera yoolungama tti oolungama, wonanko mmo Khrisitu ariiye oolungama.

⁸ Oyo anavirellella ochimwa anakhalla a Satana kaambiiwa Satana aachimwa ovenyera vawaamba. Mwaana a Mulluku ahooneya ekaamba ya yeella wi oononge eyo yeeriwe ni Satana.

⁹ Ayo eyariwe mwa Mulluku khenavirellella ochimwa vawi mmiddo wa Mulluku ori mwa alliwaayo. Nave kaambiiwa Mulluku sika Attiitthiiwa, khewora ovirellella ochimwa.

¹⁰ Nngu sika ohiyana wa anamwani a Mulluku ni anamwani a Satana, attheene ehineera echilungamo apaalle ehinaakonda amodda khe anamwani a Mulluku.

Mukondaneke

¹¹ Othenga mwiiwalleenyu ovenyera vawaamba tti wawi, ninaphwanella wi nikondaneke.

¹² Nihikhalle wonanko Kaini oyo aari a Oonanaroolle nave aamwiipha mwanamunne Abele. Kaini aamwiiphelle tini? Tti ekaamba yawi ddeko eerilleeye ddaari ddoochiwa nave ddeko mwanamunne eerilleeye ddaari ddoolungama.

¹³ Sika, asinnaka ni arokoraka, muhittikhineke athu a va ellapo yavatthi yaawiitakani.

¹⁴ Ninnadduwella wi noohiyana ni okhwa nave noophiya mu okumi kaambiiwa ninnaakonda asinnihu ni arokorihu. Ayo ehinakondana aakhallave vatthi va masiva a okhwa.

¹⁵ Attheene ayo enawiita amodda tti awiipha nave munnadduwella wi mwa awiipha khamuri okumi woohimalla.

¹⁶ Ninnadduwella wi echikondi tti tini kaambiiwa Khrisitu aapaalla okhwa ekaamba ya hiyaano. Navettho hiyaano ninaphwanella nipaalleke okhwa ekaamba ya asinnihu ni arokorihu!

¹⁷ Athu eeyuuma yamoona mwanamunniwa apaalle murokoriwa oohoowa nave emummella murima, kheworattho ollota wi ennamukonda Mulluku.

¹⁸ Anaaka, echikondaahu ehikhalleke ya mawuve ni ddoollotave koma enaphwanella ekhalleke echikondi yawoona, eyo enooneya ni ddaweereya.

Ollipa murima vamiitthoni va Mulluku

¹⁹ Vano naawaakondaka amodda ninnadduwella wi ninakhalla mu yawoona. Navettho mmu sika ninakhalleehu oollipa murima vamiitthoni va Mulluku.

²⁰ Naari murimaahu waanivaanyihaka, ninnadduwella wi Mulluku tti muullupalli ohiyana ni murimaahu nave wi annadduwella erive ello.

²¹ Sika vano, akhwaaka ookondiwa, murimaahu waahinivaanya nineerollipa murima vamiitthoni va Mulluku.

²² Erive ello ninavekeehu ninnaakhella kaambiiwa ninniiwellella malamulwaaye ni weera eyo enamuhakallalliha.

²³ Eyo analamuleeye tti yawi nimukhulupilileke Mwanaye Yesu Khrisitu nave nikondaneke, wonanko mmo aanilamulalleeyettho.

²⁴ Ayo eniiwellella malamulo a Mulluku ennakhalla mu eyaattano ni Mulluku nave Mulluku annakhalla mu eyaattano ni alliwaayo. Nave ekaamba ya Munepa oyo Mulluku anivahilleeye, ninnadduwella wi Mulluku annakhalla mu eyaattano ni hiyaano.