1 Yohane 2 - Mawu a Mulluku

Khrisitu oonikaviheraahu

¹ Kinuulembellani nyuwaano, anaaka wi muhichimweke. Koma mmodda achimwa, nookhalla ni oonipepesella wa Attiitthiihu, sika Yesu Khrisitu, oolungama.

² Nave ddoonanara ddahu ddinnakhululukelliwa oweella mwa Yesu Khrisitu mwaneena nave ohiri machimwaahuve koma ni machimo a arive muthu.

³ Niiwellella malamulo a Mulluku, sika ninnasimikiza wi ninnamudduwella.

⁴ Ayo enallota wi ennamudduwella koma kheniiwellella malamulwaaye, tti awoottha nave mwa alliwaayo yawoona kheyaamo.

⁵ Koma attheene ayo eniiwellella mawaaye, ddawoona, alliwa tti athu ayo echikondiiwa ya va Mulluku yeeriwe wi ekhalle yaphaama. Mmu sika ninadduwellelleehu wi niri mu eyaattano ni Mulluku.

⁶ Ayo enallota wi erive mu eyaattano ni Mulluku enaphwanella ekhalleke wonanko mmo Yesu Khrisitu akhallelleeye.

Lamulo nanaanweene

⁷ Akhwaaka ookondiwa, lamulonna kinuulembelleemini tti nakhalle. Lamulo nakhallenna muriinyuna ovenyera vawaamba tti othenga mwiiwalleenyu.

⁸ Koma lamulo kinuulembelleemini vano tti na naanweenettho nave yawooniiwa ennooneya mwa Khrisitu navettho mwa nyuwaano. Vawi epiphi enimamalla nave owala wawoona onnamolleella.

⁹ Ayo enallota wi eri mu owala koma enawiita asinniwa ni arokoriwa, eri mwiipiphini enthawi yeella.

¹⁰ Ayo enaakonda asinniwa ni arokoriwa enakhalla mu owala nave kheyiivo emodda mwa alliwaayo enaawaakwakwatuwihe.

¹¹ Koma ayo enawiita asinniwa ni arokoriwa eri mwiipiphini. Eneeta mwemmo nave khenadduwella nko enayeewawo kaambiiwa epipheeyo yooripiha miitthwiiwa.

¹² Kinuulembellani nyuwaano, anaaka vawi machimwaanyu aakhululukiwa ekaamba ya Khrisitu.

¹³ Kinuulembellani nyuwaano makhollo kaambiiwa munnamudduwella oyo arivo ovenyera vawaamba. Kinuulembellani nyuwaano asombwe kaambiiwa moomugonjiha Oonanaroolle.

¹⁴ Kinuulembellani nyuwaano anaaka kaambiiwa munnaadduwella Attiitthaanyu. Kinuulembellani nyuwaano makhollo kaambiiwa munnamudduwella oyo arivo ovenyera vawaamba. Kinuulembellani nyuwaano asombwe kaambiiwa mookhalla ni masiva nave mawu a Mulluku eri mwa nyuwaano nave moomugonjiha Oonanarooyo.

¹⁵ Muhikondeke ellapo yavatthi apaalle erive ello ya mu ellapo yavattheeyo. Mwaakondaka ellapo yavatthi, echikondi ya Attiitthiihu kheri mwa nyuwaano.

¹⁶ Erive ello enakhalla mu ellapo yavatthi wonanko minkhella ddoonanara, ddoopaalla dda athu ni nnddo enooniiwa ni erive ello ya mu ellapweella eyo athu enakotelliiwa, ddittheddenenndda khaddinavenyera wa Attiitthiihu koma ddinavenyera mu ellapo yavatthi.

¹⁷ Ellapo yavatthi ni erive ello eri mwemmo eyo athu enakhallelliiwa munkhella ennamalla koma ayo eneera ddoopaalla dda Mulluku ennakhalla ni okumi woohimalla.

Mudani a Khrisitu

¹⁸ Anaaka, enthawi yoomalliha yohaatamella! Mwaalleelliwa wi Mudani a Khrisitu animawa. Koma vano adani a Khrisitu ahooneya khalle, sika vano ninnadduwella wi enthawi yoomalliha yohaatamella.

¹⁹ Athu yaalla yavenyenre mwa hiyaano koma yaathawamo nave ella sika ekaambiiwa yavenyilliiwa variyari vahu; yaakhanlleke a eyaattanwaahu, yeerokhalla ni hiyaano. Nave yaavenyavo wi vidduwanyeye wi attheenaayo kheyaari a hiyaano.

²⁰ Nave nyuwaano mwaakhalla ni Munepa Waweella woohelliwa va nyuwaano ni Khrisitu sika attheenenyu munnadduwella yawoona.

²¹ Kinuulembellani ohiri kaambiiwa khamunadduwella yawoona koma kaambiiwa mwaadduwella khalleve navettho munnadduwella wi yawoona khenavenyera mu ddawoottha.

²² Vano awoottha ttaani? Tti ayo enallota wi Yesu khe Mesiya.* Athu yaayo tti adani a Khrisitu, enaakhoota Attiitthinnya ni Mwaaneene.

²³ Vawi attheene enamukhoota Mwaana enaakhootattho Attiitthinnya. Ayo enamwaakhella Mwaanooyo aakhallattho ni Attiitthinnya.

²⁴ Vano simikizani wi othenga mwiiwalleenyu ovenyera vawaamba okhalleke m'murimani mwanyu. Othenga yooyo wakhalla m'murimani mwanyu, sika muneerokhalla mu eyaattano ni Mwaana ni Attiitthinnyaayo.

²⁵ Khrisitu aalonjeza onivaha okumi woohimalla.

²⁶ Kinuulembellani dda ayo enapaalla owoottotthani.

²⁷ Nave Khrisitu oohella munepaaye va nyuwaano. Munepaaye onnavirellella okhalla mwa nyuwaano, sika khamunamupaallattho mmodda wi uuhuddiheni. Vawi munepaaye annuuhuddihani erive ello nave nnddo anahuddiheeye tti ddawoona, ohiri ddawoottha. Vano mwiiwellelleke ehuddiho ya Munepooyo ni okhallave mu eyaattano ni Khrisitu.

²⁸ Ddawoona, anaaka, mukhallekeve mu eyaattano ni olliyooyo wi ooneya nineerokhalla oollipa murima nave khaniipittha ekaamba yoowulliwa muru vamiitthoni vaye va Nllapo anaweeye.

²⁹ Munnadduwella wi Khrisitu tti oolungama. Vano munaphwanella mudduwelle wi arive muthu ari oolungama ayariwe ni Mulluku.