1 Timoteo 6 - Mawu a Mulluku

¹ Attheene ayo eri akaporo yaavaheke apwiiwa olemu muttheene wi nnddina na Mulluku ni ehuddihwaahu ddihinyaambusiwe.

² Nave ayo erina apwiiwa ookhulupilila, ehaavevulle kaambiiwa tti asinniwa ni arokoriwa. Koma yaarumeyelleke phaama kaambiiwa ayo enapindula ni mitteko ddiwa, alliwattho tti ookhulupilila ni ookondiwa. Onaphwanella waahuddihe ni waallipiha murima mu ddenndda.

Ehuddiho yawoottha ni eyuuma yawoona

³ Muthu ahuddiha ddoohiyana ni ddenndda ni ohiiwanana ni mawu awoona a Apwiihu Yesu Khrisitu ni ehuddiho ya echikhulupililwaahu,

⁴ yooyo ttawiitukhulla nave khanadduwella erive ello. Nave murimaaye tti woonanara woopaalla ddoovaanyana, wenko onavenyera ehache, owana, ollotellana epewe, oganizerana ddoonanara,

⁵ ni okangana woohimalla variyari va athu oohikhalla ni ezeru apaalle yawoona. Alliwaayo eneesa wi omutitimiha Mulluku sika ettilla yoophwanyella eyuuma.

⁶ Tti ddawoona, omutitimiha Mulluku onnamphwanyiha muthu eyuuma akhalla ookwakhwanihiwa ni ello ariiyena.

⁷ Vawi khanaawiillena ello navolloweehu mu ellapo yavatthi nave khaninaworattho okusamo ello vookhumanimoni.

⁸ Sika vano nakhalla ni yoocha ni yoowara ddenndda ddinikwakhwanelle.

⁹ Nave ayo enapaalla okhalla eeyuuma eneereweesiwa nave ennamakiwa m'millapani dda minkhella ddinchichi ddoovoreya ni ddookarangeya. Ddenndda ddinnaweeriha athu ovollowa mu ddoohoosa ni ddawoononga.

¹⁰ Vawi ddinaambiha ddoonanara ddittheddene tti echikondi ya makobiri. Ekaamba ya yeella, amodda yaatathilla echikhulupililwiiwa ni wiikusella ddoovoreya ddinchichi m'murimani mwiwa.

Malamulo a Paulo wa Timoteo

¹¹ Koma weyaano muthu a Mulluku, thawa ddenndda nave othware echilungamo, omutitimiha Mulluku, echikhulupililo, echikondi, ovillella ni omaalleya.

¹² Wanana ekhoto yaphaama ya echikhulupililo, pharesesa okumi woohimalla oyo wiithanelliweewe nave wahaakhullella moohikhuwa echikhulupililwaawo vamiitthoni va amboni anchichi.

¹³ Navesttho vamiitthoni va Mulluku oyo anavaha okumi ddeko ddittheddene ni Khrisitu Yesu oyo aakhullenlle echikhulupililwaaye vamiitthoni va Pontio Pilato.

¹⁴ Kinimuulamula wi wiiwellelle malamulo yaalla moohikayikella ni moororomelleya ophiyera nllapo noophiya Apwiihu Yesu Khrisitu.

¹⁵ Mulluku yooyove ari ooriiheya ni olamulella, Mwene a mamwene ni Apwiya a apwiya, aamooniha va enthawi yoophwanellella.

¹⁶ Yooyove ari ni okumi woohimalla, anakhalla mu owala woohiphiyereya. Khaavo muthu amoonille yoolla, khaavottho muthu anaawore omoona. Wa yooyo okhalle ntitimiho ni masiva oohimalla! Amen.

¹⁷ Waalamulelle ayo eri ni eyuuma ya ddeko dda vatthimva wi ehikotelleke naari ohiya murimiiwa muttheene va eyuuma eyo eri yoohiroromelleya koma Mulluku oyo ananivaha hiyaano ddittheddene moohillivella wi nihakallallekena.

¹⁸ Waalamulelle wi yeereke ddaphaama, ekhalle ni mitteko ddaphaama ddawaata nave ekhalle ni murima woovaha ni wookonda waakawella amodda.

¹⁹ Vawi vaweerani ddiidda eneerewiisungella eyuuma eyo enaakhalle matthipello a muhoollo wi epharesese okumi oyo ori okumikumi.

²⁰ Timoteo, wehera phaama eyo ohiyeriweewe. Ohiiwelle miyaha ddoohikhalla ni mutteko ni ddoohikhalla ni omulluku, nnddo mwawoottha, ddineeriwa odduwella.

²¹ Vawi amodda ennaakhullella mooddoonihella ddenndda, sika aatathilla ettilla ya echikhulupililo. Echisomo ya Mulluku ekhalle ni weyaano.