1 Timoteo 5 - Mawu a Mulluku

Malangizo awaanjerera

¹ Ohimuhumullulleke muttekweene moomusimwella koma omukoheke wonanko attiittho. Okhalleke ni asombwe wonanko asinno.

² Okhalleke ni attekweene aatthiyana wonanko amaayo. Okhalleke ni anamwalli wonanko arokoriyo, mwa weella murima.

³ Waavaheke olemu anaamukhwelle ayo ehinna abaliiwa awaakavihera.

⁴ Koma naamukhwelle mmodda ari ni anamwani apaalle edduullu ddaye, yaayo yaambe ohuddera omurumeyella Mulluku vawaarumeyellani a mu nibanja mwiwa ni waahokollosella makhollwiiwa kaambiiwa ella tti yawaakhelliwa vamiitthoni va Mulluku.

⁵ Oyo ari naamukhwellekhwelle navettho khanna oomukavihera, akeraatthihe etiyerellwaaye mwa Mulluku navettho avirellelle ovekella otthaana ni mahiiyu wi amukavihere.

⁶ Koma naamukhwelle oyo anahakallalliha minkhella dda yeekha, ookhwa khalle naari ari ni okumi.

⁷ Waalamulelle ella wi ehikayikelliweke.

⁸ Nave mmodda aahaakaviheraka abalaaye, makamaka a munibanjani naye, olliye ookhoota echikhulupililo nave tti oonanara ohiyana ni oohikhulupilila.

⁹ Naamukhwelle oohikwakhwana miyakha 60 ahilembiwe m'mullokoni wa anaamukhwelle. Akhalle mutthiyana aatthelliwevo ni mullopwana mmoddave.

¹⁰ Nave akhalle oovuwa ni mitteko ddaphaama, mutthiyana oyo aallenlle anaaye phaama, anawaakhella alleto phaama owaniwa, anaahapiha manyallo athu a Mulluku nave anaakavihera athu ayo eri mu ddoohoosa navettho aniivelleella va mitteko ddittheddene ddaphaama.

¹¹ Koma anaamukhwelle a miyakha ddooyeva waakhooteke waalemba kaambiiwa munkhella waaphara onnaweeriha wi ehiivelleelleke mwa Khrisitu nave ennapaalla otthelliwa.

¹² Sika ennaphwanyeya oochimwa ekaamba yoohisunga lonjezano niwa nawaamba.

¹³ Waanjerera vaavo, ennahudderattho olesi, okhallella weeteeta m'mizi mwa athu amodda. Nave yoonanaresesa tti yawi ennahuddera miseche ni otthuperiwa ni ddaaneena nave ollotattho ddoohiphwanella ollotiwa.

¹⁴ Sika kinapaalla wi anaamukhwelle a miyakha ddooyeva etthelliweke, yaayareke anamwani, yeetiheke mabanjiiwa wi ehaavahe adaniihu ekari yoollota ddoonanara dda hiyaano.

¹⁵ Vawi anaamukhwelle amodda khalle yaahollowa enamuthwara Satana.

¹⁶ Nave mutthiyana ookhulupilila akhalla ni anaamukhwelle variyari va abalaaye, aakavihereke yeekhaaye. Mpingo ohillemellihiweke ni ello yeella wi owore waakavihera ayo ehinna awaakavihera.

¹⁷ Attekweene enahoollella phaama yaakhelleke olemu munchichi, makamaka ayo enaphara mutteko moollipa woohuddiha ni woollalleya.

¹⁸ Vawi mawu a Mulluku eni, “Ohimake owanoni wa eng'ombe eyo enamuuputha tirigu,” navettho “Allupa mutteko enaphwanella yaakhelle mallivellwiiwa.”

¹⁹ Ohaakhullelleke mullatu wa muttekweene, vaavove vikhanlle amboni eelli apaalle araru.

²⁰ Attekweene ayo enavirellella ochimwa, waahumullulleke vamiitthoni va attheene wi amoddaayo yooveke.

²¹ Vamiitthoni va Mulluku ni Khrisitu Yesu ni angelo ootthoolliwa kinimuulamula wi othware malamulo yaalla moohiweha ekhove apaalle mookondella.

²² Ohaakuveke wiiyaatthi matta va muthu naari ochimwa vamodda ni athu amodda. Weyaano vaweekhaawo okhalleke aweella.

²³ Ohiwiryeke maaddive koma omuwiryekettho vinyo vang'ono kaambiiwa onnavoriiwa m'mirimani wiilliwiilli.

²⁴ Machimo a athu amodda ennooneya vaweella naari ehiniipiwe mullatu koma machimo a athu amodda ennooneya voollotani mullatu.

²⁵ Emoddamoddave yeeyo mitteko ddaphaama ddinnooneya vaweella nave naari ddimodda ddihinooneye vaweella, khaddiworeya ovittheya wa enthawi yoohimalla.