1 Timoteo 4 - Mawu a Mulluku

Dda ahuddihi awoottha

¹ Nave Munepa Waweella annallota moollotesesa wi m'mallaponi oomallihella athu amodda eneerohiya echikhulupililwiiwa ni wiiwellella minepa ddoohollosa ni othwara ehuddiho dda minepa ddoonanara.

² Ehuddiho ddennddo ddinavuwihiwa ni oohoollosa awoottha ayo yawuupusella murimiiwa tti yookhwa wonanko yoosiwe ni musivello.

³ Athu yaayo enahuddiha wi khe waphaama otthella, otthelliwa apaalle ocha ddoocha ddimodda. Koma Mulluku aaphatusa ddoocha ddennddo wi ayo enakhulupilila ni odduwella yawoona, echeke vatulli va nivekello noothokoza.

⁴ Vawi ddittheddene ddoophatusiwa ni Mulluku tti ddaphaama nave ehikhallevo erive ello yookhootiwa. Erive ello yaakhelliweke ni nivekello noothokoza,

⁵ kaambiiwa enneellihiwa ni mawu a Mulluku ni nivekello.

Oorumeyella aphaama a Khrisitu Yesu

⁶ Waahuddiha ookhulupilila ddeko ddenndda, oneerokhalla oorumeyella aphaama a Khrisitu Yesu, oollelliwa ni mawu a echikhulupililo ni a ehuddiho yawoona eyo wathwanreewe.

⁷ Nave okhooteke miyaha ddoohikhalla ni mutteko ni ddoohikhalla ni omulluku. Oddollweelle weera ddoomutitimiha Mulluku.

⁸ Waddollweella weera mattheella oollipiha mwiilli wookhalla ni oreera wa vang'ono koma waddollweella weera ddoomutitimiha Mulluku wookhalla ni oreera mu ddittheddene kaambiiwa onnalonjeza okumi wa ollello ni wa muhoollo.

⁹ Mawu alla tti ororomelleya ni oophwanella waakhelliwa ni murima muttheene.

¹⁰ Vawi ninnaphara mutteko moollipihella kaambiiwa nookhalla ni etiyerellwaahu mwa Mulluku Ookumi, oovullusa athu attheene, makamaka ookhulupilila.

¹¹ Olamulelleke ni ohuddiha ddeko ddenndda.

¹² Muthu ahuuvevulle kaambiiwa ori musombwe koma okhalle echisanzo wa yaayo enakhulupilila, mu mawaawo, mu makhallellwaawo, mu echikondaawo, mu echikhulupililo ni mu weella murima wawo.

¹³ Ophiyera enthawi kinaaweemi, oweerengelleke athu mawu a Mulluku, ollalleyeke ni ohuddiha.

¹⁴ Ohivevulle emphaso eri mwa weyaano, eyo yavahiwe wa weyaano oweella mwa mawu oollotella va enthawi ya wiiyaatthi wa matta a attekweene va weyaano.

¹⁵ Mitteko ddenndda oddeereke mwawiivelleella wi athu attheene yoone wunnuwa wa orumeyella wawo.

¹⁶ Wiiwehereke weekhaawo ni owehera ehuddihwaawo. Ollipihelleke ddenndda kaambiiwa vaweerani ddenndda oneerewiivullusa weekhaawo vamodda ni yaayo enawiiwa weyaano.