1 Timoteo 3 - Mawu a Mulluku

Dda oohoollella mpingo

¹ Mawaalla tti oororomelleya awi muthu aapaallaka okhalla oohoollella mpingo annapaalla mutteko waphaama.

² Oohoollella mpingo akhalleke oohikayikelliwa, akhalle ni mutthiyana mmodda, eezeru, awiihiiha, oovahiwa olemu, ookonda owaakhella alleto ni oowora ohuddiha.

³ Ahikhalle muthu oolezela apaalle amaraapwa koma oomaalleya ni ookonda murendelle nave ahikhalle ookonda makobiri.

⁴ Akhalle oodduwella weetiha nibanja naye phaama ni waallella anaaye phaama wi ekhalle awiiwellella ni oolemu mu erive ello.

⁵ Vawi muthu ahinawora weetiha nibanja naye phaama, aneetihe mwawiidde mpingo wa Mulluku?

⁶ Akhalle oowaraalla mu echikhulupililo wi ahiitukhulleke woova wi anaallakiwe wonanko mmo Satana aallakelliweeye.

⁷ Akhallekettho muthu oovahiwa olemu ni athu a otte wa mpingo wi ahinyaambusiwe woova wi anaamorelle m'musamphani wa Satana.

Oorumeyella a mpingo

⁸ Oorumeyella a mpingo enaphwanellattho ekhalle oovahiwa olemu, oororomelleya va nnddo enallotiiwa, ehilezeleke, ehikhalle a nrima na makobiri,

⁹ enaphwanella ekhalleke athu a yawuupusella murima yaphaama voopharesesani echikhulupililo eyo Mulluku uupullullalleeye.

¹⁰ Alliwattho yaambe weesiwa, vatulli viwa, erumeyelleke yaphwanyeya wi tti oohikayikiha.

¹¹ Awariwattho ekhalleke oovahiwa olemu, oohillota ddoonanara dda akhwiiwa, ekhalle awiihiiha ni oororomelleya mu ddittheddene.

¹² Oorumeyella a mpingo akhalleke ni mutthiyana mmodda, akhalle oodduwella weetiha nibanja naye phaama ni waallella anaaye phaama.

¹³ Vawi ayo enarumeyella phaama, enniikusella epilli yaphaama nave ennallipa murima mu echikhulupililo mwa Khrisitu Yesu.

¹⁴ Naarive kitiyerellaka owa owaninyunko veneva, kinimuulembellani kalatoolla.

¹⁵ Nave kaselliwa, kalatoolla aneeroowoonihani mmo muthu anaphwanelleeye okhallella mu enyumba ya Mulluku, eyo eri mpingo wookumi, opoto ni matthipello a yawoona.

¹⁶ Ndithu, ella tti yoovittheya yawoona yuullupalli ya echikhulupililwaahu yawi, “Yooyo ahuupullulliwa mu mwiilli wa muthu, Munepa aamweerella omboni wi olliye tti awoona. Nave ahooniwa ni angelo. Aallalleyiwa mwa athu a mitundu ddittheddene, aakhulupililiwa mu ellapo yavatthi ettheene, nave aawellihiwa oddullu mu ntitimiho.”