1 Timoteo 2 - Mawu a Mulluku

Ollapella wa mpingo

¹ Vawaambellella kinuuvekani nyuwaano wi yeeriweke mavekello ooveka ni oomuthokoza Mulluku ekaamba ya athu attheene,

² mamwene ni attheene ayo enalamulella wi nikhalle ni okumi woomaalleya ni wamurendelle, voomutitimihani ni ollapella Mulluku.

³ Vawi ella tti yaphaama nave tti yawaakhelleya vamiitthoni va Mulluku oovullusaahu,

⁴ oyo anapaalla wi athu attheene evulluwe nave ephiye voodduwellani yawoona.

⁵ Vawi viri Mulluku mmoddave ni namunkhoswe mmoddave variyari va Mulluku ni athu, muthu yoolla tti Khrisitu Yesu,

⁶ oyo iivelleelle yeekhaaye wi amoopolle arive muthu. Woopollanngu sika omboni waavelleelliwe va enthawi yoophwanellella.

⁷ Ella sika ekaambiiwa katthoollelliweemi okhalla oollalleyaaye ni murummwa oowahuddiha athu ayo ehiri Ayuda mawu a echikhulupililo yawoona. Nginoottha, kinallota ddawoona.

⁸ Kinapaalla wi allopwana evekelleke m'mapuroni muttheene ni owelliha muddullu matta aweella moohivaanyihana apaalle moohikangana.

⁹ Kinapaallalattho wi atthiyana ewareke moolemu ni mweezeru ni moophwanellella, ohiri ni meehi oolluwa apaalle wiireeriha ni golide apaalle malluku ni malaya oowallamella mutengo,

¹⁰ koma yiireeriheke ni mitteko ddaphaama ddoophwanella atthiyana ayo enamullapella Mulluku.

¹¹ Atthiyana emaalleyeke voohudderani nave ni wiiwellella ottheene.

¹² Miyaano nginaakhullella wi mutthiyana amuhuddiheke apaalle omulamulelleke mullopwana koma amaalleyeke.

¹³ Vawi Adamu sika aambille ophatusiwa, vutulli vene Heva.

¹⁴ Khahiyo Adamu aallekiwe koma mutthiyana sika aallekiwe akhalla oochimwa.

¹⁵ Koma mutthiyana anaavullusiwe vawaayarani anamwani, avirellella okhalla mu echikhulupililo, echikondi, weella murima ni moophwanellella.