1 Timoteo 1 - Mawu a Mulluku

¹ Ovenyera wa miyaano Paulo, murummwa a Khrisitu Yesu moollikana ni olamula wa Mulluku oovullusaahu navettho Khrisitu Yesu, otiyera wahu.

² Kinamulembella wa weyaano, Timoteo, mwanakamwanaka mu echikhulupililo. Echisomo, echifundo ni murendelle ddoovenyera wa Mulluku Attiitthiihu ni Khrisitu Yesu Apwiihu ddikhalle ni weyaano.

Muchenjerekena ahuddihi awoottha

³ Kinapaalla weyaano okhalleke m'muzindani wa Efeso moollikana ni mmo kuuvekilleemi kayeemi mu echigawo ya Masedoniya. Athu amodda wenko ennahuddiha ddeko ddawoottha, sika waalamule wi ehiye.

⁴ Waalleelle wi ehiye miyaha ddoohikhalla ni mutteko ni weerenga ntthopoollo noorekama na manddina a makhollo. Ddenndda sika ddinaambiha okangana nave khaddinakavihera mutteko wa Mulluku oyo onadduwanyeya mu echikhulupililove.

⁵ Yoolinga ya wuulamula waka tti yawi waahuddihe athu okondana ovenyera m'murimani waweella ni yawuupusella murima yooreera ni echikhulupililo yawoona.

⁶ Athu amodda aahiya ddenndda nave aahollowa othwara mawu oohikhalla ni mutteko.

⁷ Enapaalla wi ekhalle ahuddihi a malamulo* a Mulluku koma kheniiwesesa naari mawiiwa ayo enasimikiziiwa.

⁸ Ninnadduwella wi malamulo tti aphaama yapharihiwa mutteko phaama.

⁹ Nave ninnadduwellattho wi malamulo khenapangelliwa athu oolungama koma a etiyamaaru ni oohiiwellella, oohimullapella Mulluku, oochimwa, oonanara ni oomwiita Mulluku ni oowiipha attiitthiiwa, ameewa ni oowiipha akhwiiwa,

¹⁰ ooraruwa, ookonana ni allopwana akhwiiwa, oowaakulla athu, oowoottha, oovelleella omboni wawoottha nave ni arive muthu aneera erive ello yoovaanyana ni ehuddiho yawoona.

¹¹ Ehuddiho yeeyo eri mu othenga waphaama wa ntitimiho ni oriiheya wa Mulluku oyo aakivahilleeye.

Anamuthokoza Mulluku ekaamba ya echifundo

¹² Kinamuthokoza Khrisitu Yesu Apwiihu oyo akivahille masiva va muttekwaakoolla. Kinamuthokozattho vookeerani oororomelleya ni okitthoolla wi kimurumeyelle,

¹³ naari khalle kaanamullotella epewe, kaanamuvevulla ni omuhoosa. Nave Mulluku aakeerella echifundo kaambiiwa ngaamukhulupililalle olliyooyo sika ngaadduwella eyo keereemi.

¹⁴ Nave Apwiihu yahiithellella echisomwiiwa yinchichi va miyaano, ekivahattho echikhulupililo ni echikondi nnddo ddiri ddahu oweella mwa Khrisitu Yesu.

¹⁵ Mawu yaalla tti oororomelleya ni oophwanellella wi yaakhelliwe wi Khrisitu Yesu aawa va ellapo yavatthi wi aavulluse oochimwa. Miyaano kiri oonanara waakhwaranya athu attheene.

¹⁶ Koma Mulluku aakeerella echifundo, miyaano oochimwa waakhwaranya athu attheene wi Khrisitu Yesu oonihe olleva waye ottheene okhalle echisanzo wa ayo enaamukhulupilile muhoollo wi yaakhelle okumi woohimalla.

¹⁷ Wa Mwene oohimalla, oohikhwa ni oohooneya oyo ari Mulluku yeekhaaye, okhalle oriiheya ni ntitimiho wa enthawi yoohimalla! Amen.

Paulo aamulamula Timoteo wi avirellellena echikhulupilwaaye

¹⁸ Timoteo, mwanaka, kinavelleella lamulonna wa weyaano moollikana ni mawu a yoollotelliwa khalle dda weyaano. Mawu yaayo yuukavihere owana ekhoto yaphaama,

¹⁹ ni opharesesa echikhulupililo ni yawuupusella murima yooreera. Athu amodda yaatathilla yawuupusella murimiiwa, sika echikhulupililwiiwa yahoonongeya.

²⁰ Amodda a yaayo tti Himeneo ni Alekizandro ayo kaallakilleemi vawaavelleellani wa Satana wi ehiye omullotella epewe Mulluku.