1 Samuele 9 - Mawu a Mulluku

Saulo anakumana ni Samuele

¹ Vaakhalla muthu oovuwa oovenyera o nlloko na Benjamini nnddina naye Kishi, mwaana a Abiyele, mwaana a Zerori, mwaana a Bekorati, mwaana a Afiya.

² Olliyoolla aakhalla ni mwaana nnddina Saulo, musombwe ooreera. Variyari va Aisraele attheene khevaari musombwe ooreera omukhwaranya olliyoolla. Aari oorekama vawi athu amodda attheene yamukomella m'mathurini.

³ Nllapo nimodda abulu a Kishi yaarimeella. Sika aamulleella mwanaye Saulo wi, “Mukuse mullupa mutteko mmodda, mutimulle muye mwawaashaashe abulwaayo.”

⁴ Yaheeta okhwaranya ellapo yamiyaango ya Efuremu ni echigawo ya Shalisha koma wohaaphwanya. Yaheeta okhwaranya ellapo ya Shalimu koma wenkottho khayaariwo. Yaakhwaranya echigawo ya Benjamini koma kheyawaapwanyillettho.

⁵ Ephiyalle o ellapo ya Zufu, Saulo aamulleella mullupa muttekwaaye oyo aariiyena wi, “Hanko nihokollowe, woova wi attiitthi eneerohiya okhupanya dda abulu, ekhupanyeke dda hiyaano.”

⁶ Koma mullupa muttekooyo aallota wi, “M'muzindanimmu mookhalla muthu a Mulluku, muthu oyo anchichi enamuvahiiwa olemu. Ddittheddene analloteeye ddinneereya. Hankoni niye wenko. Apaalle ttuunilleella dda olendwaahuulla.”

⁷ Saulo aamukoha mullupa muttekwaayooyo wi, “Vano ninaamukuselle muthooyo tini? Yoocha naariihuna munthumbani mwahu yoomalla nave khaninna emphaso yawi ttuumwinnya muthu a Mullukooyo. Ethiyo niri ni tini?”

⁸ Mullupa muttekooyo aamwaakhullattho wi, “Kookhalla ni mwananikobiri na siliva, nineeroya navelleelle wa muthu a Mullukooyo wi anilleelle nko nineereehu naaphwanye abulwaayo.”

⁹ (Khalle o Israele muthu aayaaka wa muthu a Mulluku, wooveka ezeru allota wi, “Tiyeni niye wa oollohella.” Muthu oyo aneeriwa namallotella, khalle yamweera oollohella.)

¹⁰ Vano Saulo aamulleella mullupa muttekwaayooyo wi, “Woollota phaama. Hanko nikhwaranyeke.” Vano yaaya omuzindani nko wakhalla muthu a Mullukunko.

¹¹ Yawelliiwa mwaango oya omuzindaninko yaakumana ni anamwalli evenyeraka m'muzindanimmo, eyaaka woorika maaddi nave yahaakoha wi, “Ethiyo oollohella ari wenko?”

¹² Yahaakhulla wi, “Ee, ari wenko, tti oyo anaya muhoollo mwanyummo, akuvakani. Ttuuphiya wene m'muzindanimmu vawi ollello athu enaya yavelleelleke mukutho o nipuro noollapellamo.

¹³ Mwaavollowaka m'muzindanimmo, munaamuphwanye ahinayeewo wi ache. Athu kheyaamba ocha olliye ahinaphiye, ophiyera olliye adalisalle mukuthooyo. Eeddiiddo athu awiithaniwa eneerewaamba ocha. Vano khaweni mukumanena naanweene vaava.”

¹⁴ Vano yaavirellella ni olendwiiwa oya omuzindaninko. Yavollowiiwa yaamoona Samuele akhumaka, awaaka wa alliwaayo va ettilla yooya onipuroni noollapellawo wulle.

¹⁵ Koma oddillo, Saulo ahinaphiye, Apwiya yaamuwululella Samuele wi,

¹⁶ “Osiisello enthawi wonanko yeella kinneerewuurumihella muthu ovenyera o nlloko na Benjamini, omuzoze ni makhura a olivi vamuru vaye wooniha wi anaakhalle mwene aathwaaka, Aisraele. Aneerewaavullusa athu wa Afilisti. Kohoona ollakiwa wiwa nave kohiiwa winlla wiwa.”

¹⁷ Samuele amonne Saulo, Apwiya yaamulleella wi, “Muthu kamwaakeemoolle tti yooyo, sika anaalamulelleke athwaaka.”

¹⁸ Vano Saulo aamwaatamella Samuele vamullakoni amukoha wi, “Ethiyo owaniwa wa oollohella tti wuuwi?”

¹⁹ Samuele aamwaakhulla wi, “Oollohellooyo tti miyaano. Vano hoollani oya o nipuro noollapellawo vawi ollello munaache ni miyaano nave osiisello kineerewuulleellani ddittheddene ddiri m'murimani mwanyu nave kineerowaakhullellani wi mukhwaranyeke.

²⁰ Muhinakhupanyaka dda abulwaanyu ayo erimenlle mallapo mararu evirallaalla vawi yaaphwanyeya khalle. Ethiyo ttaani Aisraele enamupaallesesiiwa? Khohiyo weyaano ni nibanja nittheene na attiittho?”

²¹ Saulo ahaakhulla wi, “Mi tti a nlloko na Benjamini, nlloko ning'onong'ono variyari va malloko mattheene Aisraele. Nibanja naka tti nibanja ning'onong'ono mu nlloko na Benjamini. Kaambiiwa tini munakillotelleenyu ddawi ddiidda?”

²² Vano Samuele aamukusa Saulo ni mullupa muttekwaayoolle, evollowa muchipindani yuullupalli, awinnya mapuro ooriiheya mwa athu attheene yiithaniwe. Athu attheene vamodda yaari 30.

²³ Vano Samuele amulleella awaapeya ddoocha wi, “Waana wuno enthuli ya enama elle kawinnyalleemiille. Kahuulleella valle wi ohiye vakhwipi.”

²⁴ Awaapeya ddoochoolle aakusa mweto wa enama awuvelleella wa Saulo. Nave Samuele aallota wi, “Akhella enama kuuvitthenlleemi, cha, kaambiiwa kahuuhiyera vakhwipi wi va enthawi yeella oche ni athu ayo kawiithanilleemi.” Saulo aacha ni Samuele nllapo nenno.

²⁵ Yakitthalliiwa ovenyera o nipuro noollapellawo eya yavollowa m'muzindani, Saulo yaamwanddellellella bedaaye vaddullu va enyumba ya Samuele.

²⁶ Vano Saulo aakonille vaavo. Oyaaka ni osa Samuele amwiithana Saulo vaddullumvo wi, “Venya, kuuvelleelle, kuuhiye mvo.” Saulo aavenya. Olliye ni Samuele yaatimulla oya omusewuni.

Samuele anamuzoza Saulo

²⁷ Ephiyalle omalireni a muzindooyo, Samuele aamulleella Saulo wi, “Omulleelle mullupa muttekwaawooyo ahoolle. Weyaano wiimelle vang'ono wi kuulleelle mawu evenyere wa Mulluku. Mullupa muttekoolle aahoolla.”