1 Samuele 8 - Mawu a Mulluku

Athu o Israele enamupaalla mwene

¹ Samuele uulluvanlle, ahaatthoolla anaaye okhalla oweeruza a Aisraele.

² Mwanaye awaamba aari Yowele, aneepiilli aari Abiya. Alliwaalla yeeruza o Beeresheba.

³ Koma anamwanaalla kheyaarina makhallello aphaama wonanko a attiitthiiwa. Yaanahapuwella o ddoonanara, enathwara opindula. Yaanaakhella ddamukaphwani, yaaneeruza millatu mookhoromaniha.

⁴ Vano attekweene a Aisraele yaatthukumana eya wa Samuele o Rama,

⁵ emulleella wi, “Nyu mohuulluvalla nave aniinyu khenattakihera makhallellwaanyu. Vano munithoollelle mwene wi anilamulelleke wonanko ddineerella mitundu ddimodda dda athu.”

⁶ Mawu yaalla awi, “Nivaheni mwene ni oohoollellaahu” kheyaamuhakallallihalle Samuele. Ella sika ekaambiiwa avekenlleeye wa Apwiya.

⁷ Apwiya yaallota ni Samuele wi, “Wiiwellelle ddittheddene nnddo athwaayo enuulleelliiwa. Khenuukhoota weyaano koma miyaano. Khenapaalla wi kikhalle mweniiwa.

⁸ Waambeella nllapo kaakhumihalleemi o Iguputo ophiyera ollello ddaweera ddiwa tti ddookikhootave miyaano nave enarumeyella milluku ddimodda. Vano naweenettho enaweerella ddennddo.

⁹ Sika owiiwellelle nnddo enuulleelliiwa. Koma waachenjeze wunchichi nave waalleelle makhallello a mwene anaawaalamulellekooyo.”

¹⁰ Sika Samuele ahaalleella athu attheene ayo yamupaalla mwenaalle nnddo yamulleelle Apwiya.

¹¹ Aallota wi, “Nndda sika mwenaanyu anaaweerellekeeyeni, aneerekowaakhani aniinyu aallopwana wi ekhalle akhoto, amodda oowella vamagaretanaaye, amodda avakavalonaaye nave amodda oothamaka vahoollo va magaretaayo.

¹² Amodda aneeroweera wi ekhalle oolamulella akhoto ma 1,000 nave amodda ma 50. Nave amodda enaallimeke m'matani mwaye ni ohata ddoollimiwannddo, ohana ezida ddakhoto ni ezipangizo dda magereta akhoto.

¹³ Aneerewaakusa aniinyu aatthiyana wi yamweekelleke makhura awunkhella, yamwaapeyelleke yoocha ni buledi.

¹⁴ Aneerowaakhani emata ddanyu ddaphaama, ddampesa ni dda olivi ni winnya enduna ddaye.

¹⁵ Aneerowaakhani ddaneekhumi dda tirigwaanyu ni dda mpesaanyu ni owinnya akapitawaaye ni enduna ddaye.

¹⁶ Aneerowaakhani allupa muttekwaanyu aallopwana ni aatthiyana, aneerowaakhani eng'ombe ddanyu ddooneneva ni abulwaanyu wi addiphariheke mitteko ddaye.

¹⁷ Aneerowaakhani yaneekhumi ya eziweto ddanyu nave nyuwaano munaakhalle akaporwaaye.

¹⁸ Enthawi yeeyo yaphiya, muneerewinlla moomoriha ethakaraka wi Apwiya yuuvulluseni ekaamba ya mwene oyo munawiitthoollelleenyu koma Apwiya khewaapellani maaru.”

¹⁹ Koma athwaayo yaakhoota wiiwellella mawu a Samuele. Yaallota wi, “Iyaayi! Hiyaano ninamupaalla mwene oonilamulella.

²⁰ Ninapaalla wi naheenettho nikhalle wonanko mitundu ddimodda ddittheddene nave mwenaahu aneeruzeke, anihoollelleke woowana ekhoto.”

²¹ Samuele iiwalleeye mawu mattheene a athwaayo, ahaalleella Apwiya.

²² Vano Apwiya yaamulleella Samuele wi, “Owiiwellelle nnddo enallotiiwa nave owinnye mwene.” Vano Samuele ahaalleella Aisraelaayo wi, “Attheene rowani owaninyu.”