1 Samuele 7 - Mawu a Mulluku

¹ Athu a o Kiriyati Yearimu yaaya yakusa nibokosi na echipangano na Apwiya eyaana o enyumba ya Abinadabu vamwaangoni. Yaamupatula mwanaye, Eleazara wi akhalle oowehera nibokosinno.

Samuele anaahoollella Aisraele

² Nibokosi na echipangano na Apwiya naakhalla o Kiriyati Yearimu enthawi yoorekama, miyakha 20. Enthawi ettheeneella Aisraele attheene yaanawinllella Apwiya wi yaakavihere.

³ Vano Samuele ahaalleella Aisraele attheene wi, “Mwaapaallaka ohokollweella wa Apwiya ni murimaanyu muttheene, muvenyihe milluku ddeelleto ni dda Ashitaroti variyari vanyu. Murimaanyu muttheene okhalle va Apwiya ni waarumeyella alliwave. Mweeddiiddo eneerewuuvullusani wa Afilisti.”

⁴ Vano Aisraele yaavenyihavo milluku dda Abaala ni Ashitaroti, yaamba waallapella Apwiya.

⁵ Vano Samuele aallota wi, “Atthukumaniheni Aisraele attheene a o Mizipa nave miyaano kineerewuuvekellani wa Apwiya.”

⁶ Vano yaatthukumana o Mizipa. Yaarika maaddi enawiithella vatthi mooveka wi Apwiya yaakhululukelle enahalla ocha* nllapo nittheene. Yaanallota wi, “Nohaachimwella Apwiya.” Tti o Mizipa nko Samuele eeruzelleeyewo millatu dda Aisraele.

⁷ Afilisti yiiwalle wi Aisraele aatthukumana o Mizipa, mamwene a Afilisti yaaya wi yawanena ekhoto. Aisraele yiiwalle ddenndda yahoova.

⁸ Vano Aisraele yaamulleella Samuele wi, “Muhinahiya onivekellella wa Apwiya Mullukwaahu wi anivulluse wa Afilistaalla.”

⁹ Vano Samuele aamukusa mwaanaankhosa awaamwa amwiipha amuphaddaphadda amuvelleella amututha wa Apwiya mukutho wooshellelliha. Ahaavekellella Aisraele wa Apwiya nave Apwiya yaamwaakhulla

¹⁰ Samuele avelleellaka mukutho wooshellelliha Afilisti yaaphiya vakhuviru wi ewane ni Aisraele. Koma Apwiya yaawoopopiha Afilistaayo ni mawu ookhalla wonanko ogugudeya wa murimu woovenyera oddullu, ahaasimelliha nave yaathawa vamiitthoni va Aisraele.

¹¹ Vano Aisraele yaakhuma o Mizipanko enawiikariha Afilistaayo, waakhwaranyiha o Betakera, ewiiphaka m'musewuni mutthemwene.

¹² Enre ddiiddo, Samuele aakusa nlluku aniimesa variyari va Mizipa ni Shene aninnya nnddina nawi Ebenezeri ottaphullella wi, “Nlluku na nikavihero,” Vawi aallota wi, “Ophiyera ollello Apwiya ennanikavihera.”

¹³ Sika Afilisti yaagonjihiwa nave kheyaawiille evollowattho mu ellapo ya Aisraele. Apwiya sika yallipana ni Afilisti enthawi ettheene Samuele aariiye mukumi.

¹⁴ Mizinda nnddo Afilisti yaakhilliiwa khalle ddaahokolloselliwa wa Aisraele ovenyera o Ekeroni ophiya o Gati. Nave Aisraele yaavullusa ellapwiiwa m'mattani mwa Afilisti. Vakhallattho murendelle variyari va Aisraele ni Aamori.

¹⁵ Samuele ahaahoollella Aisraele okumaaye muttheene.

¹⁶ Orive muyakha Aakhalla ni olendo wowaapheella oya o Betele, Giligala ni o Mizipa. Anaweeruzamo Aisraele mutthemwenemmo.

¹⁷ Eeddiiddo aanahokollowella o Rama vawi sika waari owaniwa. Wenkottho aanaweeruzawo Aisraele nave ahaamakellawo Apwiya nikuwa.