1 Samuele 6 - Mawu a Mulluku

Ohokolloselliwa wa nibokosi na echipangano o Israele

¹ Nibokosi na echipangano naakhalla mu ellapo ya Afilisti miyeri mitthanu ni miilli.

² Vano Afilisti yaawiithana allupa mukuthwiiwa ni athu amakhanga yaakoha wi, “Ninaaweerena tini nibokosi na echipanganonna? Nilleelleni, ninaanihokollose mwawiidde?”

³ Alliwa yahaakhulla wi, “Mwapaalla onihokollosa nibokosinna muhinirumihe noohikhalla ni ello. Koma naari ddikatamihalle, munirumihe ni yoovelleella wi ekhalle mukutho wookhululukella machimo. Mweeddiiddo muneerochirihiwa nave muneerodduwella ekaamba eyo Apwiya yuuhooselliiwani.”

⁴ Nave yaakoha wi, “Ethiyo mukutho wookhululukella ddoochimooyo okhalle wawiidde?” Alliwa yahaakhulla wi, “Okhalle maphwanaphwaniho a golide a etthuku dditthanu ni amuthoro atthanu, moophwanaphwana ni mamwene a Afilisti. Vawi mullilli yoolla waari va nyuwaano nave va mamwenaanyu.

⁵ Vano mupange maphwanaphwaniho a etthuku ni a amuthoro ayo enoononga mwiillaponi mwanyu nave mumutitimihe Mulluku a Aisraele. Mwaamodda eerohiya wuullakani nyuwaano ni milluku dda mwiillaponi mwanyu.

⁶ Muhinakhalla awumma murima wonanko Aiguputo ni mweniiwa Farao. Ethiyo Aiguputwaayo Apwiya yaallakille kheyaawaakhullelle Aisraele wi eroweke nave kheyaarowille?

⁷ Vano nyuwaano potokosani nigareta nanaanweene nave mukuse eng'ombe piilli ddawaamwiiwa nnddo ddihinakokekevo nigareta. Mumakellelle eng'ombennddo onigaretani koma asaaniiwa mwaahiye owaninyu

⁸ Vano mukuse nibokosi na echipanganonno munihiye munigaretani, vakhwipi viwa muhiyevo nibokosi na ddeko ddagolide nndde munarumiheenyu wa Apwiya wi ddakhalle mukutho wookhululukella machimo. Mweeddiiddo muhiye nigaretanno niyeeke nko onaayeke eng'ombe.

⁹ Vano muniweheke nigaretanno nakusa musewu wa owaniwa ophiya o Beteshemeshi sika wi tti Apwiya a Aisraele yaniwiihelle ddookatamiha. Koma ddaaheereya ddiiddo nineerodduwella wi khehiyo alliwa yanillaka, waarimoona okhalla otullaahu.”

¹⁰ Afilisti yahiiwellella malangizwaalle. Yaakusa eng'ombe piilli ddawaamwiha eddimakellella onigaretani, yaawallella asaaniiwa munikhollani.

¹¹ Yaahiya nibokosi na echipanganonne owaaka nibokosi naamithoro agolide maphwanaphwaniho a etthuku munigaretani.

¹² Vano eng'ombenndde ddaheeta moothwara musewu muullupalli wooya o Beteshemeshi, ddinllaka. Khaddaarukunuwelle wuunyotthoni apaalle onnattanatta, mamwene a Afilisti yaari eddithwaraka vatulli viwa, ophiyera m'malireni a Beteshemeshi.

¹³ Enthawi yeeyo athu a o Beteshemeshi yaari emuhataka tirigu mutapo. Yanoonilliiwa nibokosi na echipanganonno yaahakallalla wunchichi.

¹⁴ Nigaretanne naaphiya omata wa Yoswa o Beteshemeshi, niimella wenko. Wenko waakhalla nlluku nuullupalli. Athu a mutawoni yeella yaanitthalla nigaretanne enitthattusa ekhuni, eddiipha, eddiphaddaphadda eng'ombenndde eddivelleella wa Apwiya wonanko mukutho wooshellelliha.

¹⁵ Alevi yaari ekitthihallemo nibokosi na echipangano na Apwiyanne owaaka nibokosi nimoddanne mwaari ddeko ddagolidenndde. Eddiikaatthi vanllukuni valle. Nllapo nenna athu a o Beteshemeshi yaavelleella mukutho wooshellelliha ni mikutho ddimodda wa Apwiya.

¹⁶ Mamwene matthanu Aafilistaalle yaanoona ddittheddenendda. Nave yaahokollweella o Ekeroni nllapo nenno.

¹⁷ Maphwanaphwaniho eetthuku ddagolide, nndde Afilisti yavelleelliiwa mukutho ddooveka okhululukelliwa wa Apwiya, ddiimellella mizinda mitthanu: Ashidodi, Gaza, Ashikeloni, Gati ni Ekeroni.

¹⁸ Maphwanaphwaniho a amuthoro agolide yahaavelleella moollikana ni echiwerengero ya mizinda dda Afilisti nndde ddaari dda mamwene matthanwaalle. Ddimodda ddaakhalla ni mipanda, ddimodda khaddaarina. Nlluku nuullupalli nne vahiyiwe nibokosi na echipanganonne, m'matani mwa Yoswa o Beteshemeshi, nookhallavove ophiyera ollello.

¹⁹ Apwiya yaawiipha athu 70 o Beteshemeshi kaambiiwa yaatthurumella mu nibokosi na echipanganonne. Nave amodda yahinlla vawi Apwiya yaawiipha anchichi vamiitthoni viwa.

Nibokosi na echipangano o Kiriyati Yarimu

²⁰ Vano athu a o Beteshemeshi yaallota wi, “Ttaani anaawore wiimella vamiitthoni va Apwiya Mulluku Aweella? Nave nibokosi na echipanganonna ninaaye wuuwi wi nivenyewo wuno?”

²¹ Vano yaarumiha othenga wa athu a o Kiriyati Yearimu waalleella wi, “Afilisti aahokollosa nibokosi na echipangano na Apwiya, waawoni munikuse muyeena owaninyunko.”