1 Samuele 5 - Mawu a Mulluku

Nibokosi na echipangano ninaahoosa Afilisti

¹ Afilisti yaakhilliiwa nibokosi na echipanganonno, yaanitukhulla ovenyera o Ebenezeri ophiyana o Ashidodi.

² Vano yaanikusa yanihiya mu enyumba ya Dagoni, mullukwiiwa vakhuviru ni Dagonooyo.

³ Osaka wene athu a o Ashidodi evenyaka ohinase yaamoona Dagoni iikuhalle moopopheya ekhovaaye vatthi vahoollo va nibokosi na echipangano na Apwiya. Vano athwaayo yaamuvenyiha emwiimesa vanipuroni vaye.

⁴ Koma osaka wene ohinase, evenyille yaamoonattho Dagonoolle iikuhalle moopopheya ekhovaaye vatthi vahoollo va nibokosi na echipangano na Apwiya. Murwaaye ni mattaaye ddaari ddiphaddeyiille ddimorenlle vatthi va mullako. Dagonooyo ahanllena mwiillive.

⁵ Ella sika ekaambiiwa allupa mukutho a Dagoni ni athu attheene enavollowa mu enyumba ya Dagoni ehinanyingallelliiwa vatthi va mullako va enyumba o Ashidodi, ophiyera ollello.

⁶ Vano Apwiya yahaallaka athu a o Ashidodi mwawoopiha. Alliwa ni athu a ellapo ddawaatamanana yahaallaka ni etthuku.

⁷ Athu a o Ashidodi yoonille mmo ddeko ddakhallelliiwa, yaallota wi, “Nibokosi na echipangano na Apwiya na Aisraelenna nihikhalle ni hiyaano vawi Apwiyiiwa aanillaka mwawoopiha hiyaano ni mullukwaahu, Dagoni.”

⁸ Vano yaawiithaniha mamwene mattheene matthanu a Afilisti yaakoha wi, “Neerena tini nibokosi na echipangano na Apwiya a Aisraele?” Athwaayo yahaakhulla wi, “Nibokosi nenna ninirumihe o Gati.” Vano yaarumiha nibokosi na echipanganonno wenko.

⁹ Koma ephiyallena o Gati, Apwiya yahaallaka, yahaahoosa mwawoopiha athu a m'muzindanimmo, anamwani ni attekweeneene vawi athu attheenaayo etthuku ddahaakhuma mwiilli muttheene.

¹⁰ Vano yaarumiha nibokosi na echipanganonno o Ekeroni koma naphiyiiwa o Ekeroni athu a wenko yahinlla wi, “Aaniwiihella nibokosi na echipangano na Mulluku a Aisraele wi aniiphihe hiyaano ni aniihu.”

¹¹ Sika vano yaawiithanattho mamwene mattheene a Afilisti wi etthukumane, ellota wi, “Venyihanivoni nibokosinna, munihokolloselle nko navenyeriiwawo, woova wi ninaaniiphe ni athwaahu.” Vawi mwaakhalla woova wuullupalli m'muzindani mutthemwenemmo. Apwiya yaanaallaka mwawoopiha athu a wenko.

¹² Athu ayo yahikhwille yaahoowa wunchichi ni etthuku nave winlla wa athu a m'muzindanimmo waaphiya oddullu.