1 Samuele 4 - Mawu a Mulluku

Afilisti enaakha nibokosi na echipangano

¹ Mawu a Samuele yaaphiya wa Aisraele attheene. Vano Aisraele yaaya yawanaka ekhoto ni Afilisti. Yaamaka misasa ddiwa o Ebenezeri nave Afilisti yamakille o Afeki.

² Afilisti yahaatthatta akhotwiiwa moowehana ni Aisraele. Nave yaawana ekhoto moollipa vawi yahaagonjiha Aisraele. Afilisti yaawiipha Aisraele 4,000 va nipuro noowanella ekhoto.

³ Yavulluwallaayo ephiyalle omisasani wulle oohoollella a Aisraele yaallota wi, “Kaambiiwa tini Apwiya yaakhullenlliiwa wi Afilisti enigonjihe? Hankoni nakuse nibokosi na echipangano na Apwiya o Shilo wi Apwiya ekhalle ni hiyaano ni onikavihera waagonjiha adanaahwaalle.”

⁴ Vano yahaaruma athu oya o Shilo wookusa nibokosi na echipangano na Apwiya Amasiva Mattheene ayo enakhalla va akerubi.* Anamwani a Eli, Hofini ni Finehasi yaaya nimodda ni nibokosinne omisasani ddakhotonndde.

⁵ Nibokosi na echipangano na Apwiya naphiyalliiwa omisasani wulle, Aisraele yahaamba okhuwa moollipiha ophiyera ethaya yaatikheya.

⁶ Afilisti yiiwalle onyakulla wa okhuwanko yaallota wi, “Ethiyo okhuwa moollipiha omisasani dda Aheberinko tti wa tini?” Yahiiwa wi nibokosi na echipangano na Apwiya noophiya omisasaninko.

⁷ Afilistaayo yahoova vawi yaallota wi, “Woophiya milluku omisasani wahu.” Nave yaallota wi, “Otulli ori ni hiyaano vawi ovenyera khalle ello yawi ddiidda khenaneereyelleke.

⁸ Niri mu ddoohoosa! Ttaani anaawore onivullusa wa milluku ddamasivanndda? Ddennddathi tti milluku nndde ddawiiphalle Aiguputo ni millilli dda orive mutundu muchipululuni mulle.

⁹ Nyu Afilisti, llipani murima, khallani amasiva vawi mwaaheera ddiiddo Aheberi eneeronirukunusa wi nikhalle akaporwiiwa wonanko alliwa yakhallelliiwa akaporwaahu.”

¹⁰ Afilistaalle yaawana ekhoto moollipa nave yahaagonjiha Aisraelaalle ophiyera amodda yaathawella owaniwa, akhoto ookwakhwana 30,000 a Aisraele yahiiphiwa.

¹¹ Nibokosi na echipangano na Mulluku nahaakhiwa nave anamwani eelli a Eli, Hofini ni Finehasi yahiiphiwattho.

Okhwa wa Eli

¹² Muthu mmodda a nlloko na Benjamini aathawa okhotoninko aphiya o Shilo nllapo nenno. Aari aahullalle ddoowara ddaye nave ahiihella ethaya m'muruni wooniha wi anamoriwa ethakaraka.

¹³ Aphiyalle, aamuphwanya Eli akeraatthille vampandoni museresere mwa musewu miittho eri omusewuni, akhupanyaka dda nibokosi na echipangano. Muthoolle allotilleeye nnddo ddeereyille okhotoni wulle athu anchichi a mutawoni mulle yahinlla.

¹⁴ Eli iiwalle winlla wulle aakoha wi, “Ethiyo ntapha nenna yeereyille tti tini?” Vano aaya mwawaakuva wa Eli wi amutthopoollelle.

¹⁵ Enthawi yeella Eli aari uulluvanlle nave ari ni miyakha 98, ahiworaka woona naari vang'ono.

¹⁶ Muthoolle aamulleella Eli wi, “Mi kinavenyera okhotoni. Kithawillewo ollello vaava.” Eli aamukoha wi, “Ekhoto eri mwawiidde, mwanaka?”

¹⁷ Olliye ahaakhulla wi, “Aisraele ahaathawa Afilisti nave athu awiiphiwa tti anchichi. Aniinyu eellaalle, Hofini ni Finehasi ahiiphiwa, nibokosi na echipangano na Apwiya nohaakhiwa.”

¹⁸ Vano yaromonlliiwa dda nibokosi na echipangano na Apwiya, Eli aamora ni ekotho ovenyera vampandoni vaye vakhuviru ni mullako. Ahiintthakeya nikohi akhwa vawi aari awuulluvalla nave ooneneva wunchichi. Aari aahoollelle Aisraele wookwakhwana miyakha makhumi masese.

Okhwa wamwaara Finehasi

¹⁹ Enthawi yeeyo mwaara Finehasi aakhalla ni erukullu nave aari vakhuviru wiithuuwa. Iiwalleeye ddawi nibokosi na echipangano na Apwiya nohaakhiwa, Eli, attiitthinnya a mamune ni mamuneene aakhwa, aakokhora amuyara mwaana vawi ddoovoreya voomuyarani mwaana ddaamuphiyera.

²⁰ Vawi mutthiyanoolle aari vakhuviru okhwa, atthiyana oomukavihera yaamulleella wi, “Ohoove, woomuyara mwaana aamullopwana.” Koma olliye khaawaakhullalle naari opwathawo.

²¹ Vano mwaanooyo aamuvaha nnddina nawi Ikabodi, ottaphullella wi, “Ntitimiho noovenyawo wa Aisraele!” Eerille ddiiddo kaambiiwa nibokosi na echipangano na Apwiya naari naakhiwe nave ekaamba ya okhwa wa attiitthinnya a mamune ni mamuneene.

²² Mawaaye yaari yaayo awi, “Ntitimiho noovenyawo wa Aisraele vawi nibokosi na echipangano na Apwiya nohaakhiwa.”