1 Samuele 31 - Mawu a Mulluku

Okhwa wa Saulo ni anaaye

¹ Afilisti yaawanattho ni Aisraele nave Aisraele yahaathawa Afilisti koma anchichi yahiiphiwa vamwaangoni wa Gilibowa.

² Afilisti yaawiikariha Saulo ni anaaye nave yaawiipha anaaye araru, Yonatani, Abinadabu ni Malikishuwa.

³ Ekhoto yaamunnuwella Saulo nave athu oovokha mipaamba yaamuhoma wawi aahoowa wunchichi ni oovokha mipaambaayo.

⁴ Nave Saulo aamulleella ootukhulla ezida ddaye ddakhoto wi, “Hullulla nsupada nawo, okihomena, woova wi oohiphaddiwa ttuukihoma nave ttuukittheelliha.” Koma ootukhulla ezidooyo, aakhoota vawi aamoova. Sika Saulo aakusa nsupada naye, amorellavo.

⁵ Ootukhulla ezida oonille wi Saulo ookhwa nayeene aamorellattho va nsupada naye akhwa vamodda ni olliye.

⁶ Sika Saulo, anaaye araru, ootukhulla ezida ni akhotwaaye anchichi yaakhwella nimodda nllapo nenno.

⁷ Aisraele ayo yaari ekhopella emodda ya ntapo na Yezireele owaaka amodda yaari ekhopella emodda ya Yordani, yoonilliiwa wi Aisraele aathawa nave Saulo ni anaaye aakhwa, yaahiya mizinda ddiwa ethawa. Vano Afilisti yaaphiya enakhallamo.

⁸ Osaka wene Afilisti yaawa wi yaakhe dda athu awiiphiwaayo nave yaamuphwanya Saulo ni anaaye araru ekhwenlle vamwaangoni wa Gilibowa.

⁹ Yaamuphadda muru Saulooyo, emwaakha ezida ddaye ddakhoto nave yahaarumiha amithenga mu ellapo ettheene ya Afilisti wi yavuwihe wa athu ni milluku ddiwa.

¹⁰ Vano yahiiyaatthi ezida ddaye ddakhoto mu enyumba ya Ashitaroti mullukwiiwa nave yaatthomeya mutembwaaye vasirini va etawoni ya Betesheani.

¹¹ Nave athu a o Yabeshi Giliyadi yiiwalle ddittheddene Afilisti yamweerelliiwa Saulo,

¹² allopwana attheene oollipa murima yaatimulla yeeta ni mahiiyu yavenyihavo mutembo wa Saulo ni mitembo dda anaaye vasirini ya Betesheani. Ewiillena mitembonnddo o Yabeshi, yaaddihella munllo.

¹³ Vatulli viwa yaakusa makhuviiwa yaavittha vatthi va muteekho mung'onong'ono wabwemba o Yabeshi nave yaahalla ocha* wa mallapo matthanu ni meelli.