1 Samuele 3 - Mawu a Mulluku

Apwiya enallota ni Samuele

¹ Musomboolle Samuele aanaarumeyella Apwiya moomukavihera Eli. Mallapo yaayo mawu a Apwiya kheyiiweya nave masomphenya kheyooneya wiilliwiilli.

² Nllapo nimodda mahiiyu, Eli oyo miitthwaaye yahiwora woona, aakonaatthi muchipindani mwaye.

³ Samuele aari akonaatthillettho vakhuviru ni nibokosi na echipangano mu enyumba ya Apwiya. Enthawi yeeyo enyali ya Mulluku yaari ehinathiime.

⁴ Apwiya yaamwiithana Samuele. Nave Samuele ahaakhulla wi, “Aa!”

⁵ Vano aavenya athamakella wa Eli allota wi, “Koowa, kohiiwa wiithana.” Koma Eli aallota wi, “Ngiwiithanille khawe wakonaatthi.” Samuele aaya akonaatthi.

⁶ Vano Apwiya yaamwiithanattho Samuele. Samuele aavenya aya wa Eli allota wi, “Koowa, kohiiwa wiithana.” Eli amulleella wi, “Mwanaka ngiwiithanille, khawe wakonaatthi.”

⁷ Samuele aari ahinaadduwelle Apwiya nave ahinaadduwelle mawu a Apwiya.

⁸ Apwiya emwiithannettho waneeraru Samuele aaya wa Eli allota wi, “Koowa kohiiwa wiithana.” Vano Eli aadduwella wi tti Apwiya ayo enamwiithana.

⁹ Sika aamulleella wi, “Khawe wakonaatthi. Wiiwa wiithanattho waakhulle wi, ‘Apwiya llotani, mi mullupa muttekwaanyu kinniiwa.’ ” Sika Samuele aaya akonaatthi.

¹⁰ Apwiya yaawa yiimella vaariiye, emwiithana wonanko yamwiithanelliiwa vawaamba valle, “Samuele! Samuele!” Samuele ahaakhulla wi, “Llotani, mi mullupa muttekwaanyu kinniiwa.”

¹¹ Vano Apwiya yaallota wa Samuele wi, “Enthawi ehanlle vang'ono wi keere ello emodda mu Israelemmu vawi arive muthu anaawiiwe yeeyo aneerorurumuwa.

¹² Kineeromullaka Eli ni nibanja naye nittheene moollikana ni mmo kallotilleemi ovenyera vawaamba ophiyera vamamallihello.

¹³ Koomuchenjeza Elooyo wi kiri vakhuviru omullaka ni nibanja naye nittheene wa enthawi yoohimalla ekaamba ya ddoonanara nnddo yakeerelliiwa. Eli aanadduwella koma khaavaanyiha.

¹⁴ Vano kinimallupella wi mullatu wa vanibanjani vaye khomalla. Naari avelleelle mukutho ni ddoovelleella ddimodda.”

¹⁵ Samuele aakona ophiyera ohinase. Aavenya ahulla machiwi a enyumba ya Apwiya. Ahoova omulleella Eli dda masomphenyaalle.

¹⁶ Koma Eli aamwiithana wi, “Samuele, mwanaka.” Nave Samuele ahaakhulla wi, “Aa!”

¹⁷ Vaavo aamukoha wi, “Apwiya yuulleelle tini? Ohinakhuwa erive ello. Apwiya yuullake mwawoonjerera wakhuwa ello emodda woohikilleella va nnddo yuulleelliiwa.”

¹⁸ Sika Samuele aamulleella ddittheddene nave khaakhuwalle erive ello. Eli aallota wi, “Yaayo sika Apwiya, yeere eyo enaaddivella.”

¹⁹ Apwiya yaakhalla ni Samuele enthawi ettheene unnuweeye. Vawi erive ello alloteeye yaaneereya.

²⁰ Aisraele attheene ovenyera o Dani ophiya o Beeresheba yaadduwella wi Apwiya yaamutthoolla Samuele wi akhalle namallotella.

²¹ Apwiya yaavirellella odduupullulla weekhiiwa o Shilo. Yaanallota ni Samuele nave olliye aanallota ni Aisraele attheene.