1 Samuele 29 - Mawu a Mulluku

Davide ookhootiwa ni Afilisti

¹ Afilisti yaatthukumaniha milloko ddakhoto ddiwa o Afeki. Naalliwanittho Aisraele yaamaka misasa ddiwa ddakhoto wiihimeni ya o Yezireele.

² Mamwene a Afilisti yahoonlliiwa ni akhoto m'millokoni dda athu 100 ni m'millokoni dda athu 1,000, Davide ni athwaaye yahanlle mutulli ni Akishi.

³ Vano mamwene Aafilistaalle yaakoha wi, “Aheberaalla enaashawo tini wuno?” Akishi ahaakhulla wi, “Ollathi tti Davide, oorumeyella a Saulo mwene a Aisraele. Olliyoolla ookhalla ni miyaano mallapo manchichi apaalle keerehina muyakha. Ovenyera aweelleeye ophiyera ollello kheyiivo machimo ayo kimonneemina.”

⁴ Koma Afilistaayo yaamusimwella Akishooyo emulleella wi, “Mumuhokollose muthooyo wi ahokollweelle o etawoni eyo mumwinnyalleenyu. Khathaanana ni hiyaano okhotoninko vawoovani wi aneeronirukunuwella ni owana ni hiyaano. Muthu yoolla ttuuddaattaniha mwawiidde ni apwiyaaye? Ttuuddaattaniha voowiiphani athu eri vaavaalla.

⁵ Ollathi tti Davide olle athu yamwiinelliiwa ni omwiipella wi, ‘Ee Saulo oowiipha athu 1,000, koma Davide awiiphalle athu 10,000.’ ”

⁶ Akishi aamwiithana Davide amulleella wi, “Kinimallupella vamiitthoni va Apwiya Ookumi, weyaano wookhalla oororomelleya wa miyaano nave orumeyella wawo m'millokoni ddakhoto wookiddivella wunchichi. Kheyiivo yoolakwa kuuphwannyemina waambeella nllapo nenne wawiilleewe wuno ophiyera ollello. Koma mamwene mamodda khenuupaalla.

⁷ Sika hokollowa naanweene vaava. Rowa ni murendelle woova wi mamwene a Afilisti eneerewuunanariwella.”

⁸ Davide aamukoha Akishi wi, “Ethiyo kichimwalle tini? Apaalle moophwanya machimo oovenyera wa mi oorumeyellaanyu, waambeella valle kaambeelleemi wuupharellani mutteko ophiyera ollello. Vano yookilepheliha tti tini owana ekhoto ni adani a apwiyaaka amwene?”

⁹ Akishi aamwaakhulla Davide wi, “Koodduwella wi weyaano tti aphaama wonanko mungelo a Mulluku. Koma mamwene mamodda a Afilisti ellotille wi weyaano ohithaanane ni hiyaano okhotoni.

¹⁰ Vano ovenye ohinase ni allupa mutteko a apwiya ayo wawiilleewena. Mutimulle nndduwa nakhuma.”

¹¹ Sika Davide ni athu ayo aariiyena yaatimulla ohinase enahokollweella mu ellapo ya Afilisti. Koma Afilisti yaavirellella yaphiya o Yezireele.