1 Samuele 28 - Mawu a Mulluku

¹ Enthawi emodda Afilisti yaatthukumaniha milloko dda akhoto ddiwa wi ddawane ni Aisraele. Vano Akishi aamulleella Davide wi, “Odduwellethi wi weyaano ni athwaawo munaaye mwakhalle ni miyaano okhotoninko.”

² Davide ahaakhulla wi, “Ddawoona, muneerewoona yeekhiinyu mmo kinaaweerelleemi, mi mullupa muttekwaanyu.” Akishi aallota wi, “Vano kineeroweera wi okhalle oowehera ooteteza mu okumaawo muttheene.”

Saulo anallota ni mutthowa wa Samuele

³ Enthawi yeella Samuele aari akhwille khalle nave Aisraele attheene emwinllelle nave emuvitthalle owaniwa o Rama. Vano Saulo aari aavenyihallewo athu oollota ni minepa owaakattho athu attheene awoombesa makhanga a mwiillaponimmo.

⁴ Vano Afilisti yaatthukumana etthipella misasa dda akhotwiiwa o Shunemu, Saulo nayeenettho ahaatthukumaniha Aisraele yamaka misasa ddiwa o Gilibowa.

⁵ Saulo oonille milloko ddakhotonnddo aatthukumella wawi ahoova wunchichi.

⁶ Sika ahaaveka Apwiya yawi eere koma kheyaamwaakhullalle naari oweella muullohani, mwa allupa mukutho apaalle mwa anamallotella.

⁷ Vano Saulo aalleella enduna ddaye wi, “Mukaashelle mutthiyana oyo anallota ni mitthowa wi kiye wa olliyooyo kakoherewo yawi keere.” Endunannddo ddamulleella wi, “O Endori wookhalla mutthiyana oyo anallota ni mitthowa.”

⁸ Vano Saulo aaddiipitthiha voowarani ddoowara ddeelleto wi athu ehimudduwelleke. Olliye ni athu eelli yaaya wa mutthiyanoolle mahiiyu. Vano aamulleella wi, “Okikohelle wa mitthowa nnddo ddinaaweereye muhoollo. Okiithanelle mutthowa wa oyo kinaamuromolleemi.”

⁹ Mutthiyanooyo aallota wi, “Nyu muneerathi phudda nndda mudduwellaka nnddo eerille mwene Saulo. Keesa valle aawiikaramo mwiillaponimmu athu attheene oollota ni mitthowa ni awoombesa makhanga? Kaambiiwa tini munakireyeenyu musampha wi kiiphiwe?”

¹⁰ Koma Saulo aamulonjeza mutthiyanoolle moollupella wi, “Kinimallupella vamiitthoni va Apwiya wi, khollakiwa ekaamba ya ddenndda.”

¹¹ Vano mutthiyanooyo aakoha wi, “Munapaalla kiwiithanelleni aani?” Aallota wi, “Okiithanelle Samuele”

¹² Mutthiyanoolle amoonille Samuele, aakhuwa wuullupalli wi, “Kaambiiwa tini mukillekilleenyu? Nyuwaano tti mwene Saulo!”

¹³ Vano mwenoolle aamulleella wi, “Ohinoovaka. Killeelle eyo onooneewe.” Mutthiyanooyo aallota wi, “Kinoona mutthowa okhumaka ovenyera vatthi va ellapo.”

¹⁴ Saulo aamukoha mutthiyanooyo wi, “Ethiyo mutthowooyo onooneya mwawiidde?” Mutthiyanooyo ahaakhulla wi, “Onooneya wonanko mullopwana awuulluvalla awanre mukanjo.” Vano Saulo aadduwella wi tti Samuele nave aavelleella olemu vookokhorani ni voopopheyani ekhovaaye vatthi.

¹⁵ Samuele aamukoha Saulo wi, “Kaambiiwa tini onakihooseewe vookikhumihani wi kiwe wuno?” Saulo ahaakhulla wi, “Koopaneya wunchichi vawi Afilisti aawa wi niwaneke nave Mulluku ookillutuwella, khanakaakhulla naari oweella mwa anamallotella apaalle muullohani. Ella sika ekaambiiwa kiwiithanilleemini wi mukilleelle yawi keere.”

¹⁶ Samuele aallota wi, “Kaambiiwa tini onakipaalleewe miyaano vawi Apwiya ahuullutuwella nave wookhalla mudaniiwa?

¹⁷ Apwiya aaweerella nnddo yuulleelliiwa oweella mwa miyaano. Aawaakha omwenaawo emwinnya muthu mmodda, Davide.

¹⁸ Apwiya aaweerella nndda ollello ekaamba yawi khawaawiiwellelle mawiiwa nave khewaawoonongille Aamaleke ni ddeko ddiwa ddene.

¹⁹ Vano eneerewuuhiya weyaano ni Aisraele m'mattani mwa Afilisti. Nave osiisello weyaano ni anaawo muneeroowa wuno kiriminngu, ellapo ya ookhwa. Apwiya eneerohiya mulloko wakhoto wa Aisraele m'mattani mwa Afilisti.”

²⁰ Enthawi yeeyo Saulo mwawaakuva ahiikuha vatthi akonaatthi mwawookowa, mwawoova ekaamba ya mawu a Samuele. Nave khaari ni masiva kaambiiwa khaachille ello nllapo nittheene otthaana ni mahiiyu.

²¹ Vaavo mutthiyanooyo aasusella vakhuviru ni Saulo. Nave amoonille wi animoova, aamulleella wi, “Apwiya, miyaano kahaakhullella ohiya vooswaani okumaaka vaweerani nnddo mwakivekilleenyu.

²² Vano nanyeenettho mweere nnddo kinaawuuvekeemini. Ewinnyeni yoocha vang'ono, muche wi mukhalle ni masiva aweetella.”

²³ Saulo aakhoota voollotani wi, “Mi ngicha iyaayi.” Koma enduna ddaye ni mutthiyanoolle yaamuwatihera nave aawiiwellella. Sika aavenya vatthi akonaatthilleeye valle akeraatthi vabedini.

²⁴ Mutthiyanoolle aakhalla ni musaanaang'ombe ooneneva nave aamwiipha mwawaakuva. Aakusa othu oottowa amwaapeya buledi oohikhalla ni yisiti.

²⁵ Vano aawaana buledooyo amwinnya Saulo ni enduna ddaye nave attheenaayo yaacha. Vatulli viwa yaatimulla evenyawo mahiiyu vaavo.