1 Samuele 27 - Mawu a Mulluku

Davide variyari va Afilisti

¹ Vano Davide aaganiza m'murimani mwaye wi, “Nllapo nimodda Saulo aneerokiipha. Ettilla yaphaama wi kivulluwe tti yawi kithawelle wa Afilisti. Vano Saulo aneerohiya okaashaasha mu ellapo ya Israele nave kineerovulluwa m'mattani mwaye.”

² Vano Davide aatimulla ni akhotwaaye 600 athawella wa Akishi, mwaana a Mawoki, mwene a o Gati.

³ Olliye ni athwaaye, arive muthu ni nibanja naye, yakhalla o Gati wa Akishi. Davide aari ni atthiyana eelli, Ahinowamu o Yezireele ni Abigaile olle aari mwaara a muha Nabala o Karimele.

⁴ Saulo iiwalle wi Davide oothawella o Gati khaamwaashaashillettho.

⁵ Nllapo nimodda Davide aallota ni Akishi wi, “Mwaarimi mukeerelle echifundo mukivahe nipuro mu etawoni eng'onong'ono mwiillaponi mwanyu mwemmu wi kakhalleke wenko. Vawi miyaano oorumeyellaanyu ngiphwanenlle okhalla m'muzindanaanyu woomwene.”

⁶ Sika nllapo nenno Akishi aamuvaha Davide etawoni ya Zikilagi. Ovenyera nllapo nenno etawoni ya Zikilagi tti ya mamwene a Ayuda ophiyera ollello.

⁷ Davide aakhalla wa Afilistinko muyakha mmodda ni miyeri misese.

⁸ Vano Davide ni athu ayo aariiyena yaanaya yawanaka ekhoto ni Ageshuri, Agerizi ni Aamaleke. Athu yaalla yaari aneena eellapweeyo waambeella khalle. Matawoniiwaayo yaambeelle o Shuri ophiyera omalireni wa ellapo ya Iguputo

⁹ Yaawanaka ekhoto Davide aanawiipha athu attheene, allopwana ni atthiyaneene. Koma enkhosa, eng'ombe, abulu, ekamira* ni ddoowara aanaddikusa anayaana wa Akishi.

¹⁰ Akishi aamukoha wi, “Ollello wakelle wawanaka ekhoto ni aani?” Davide aallota wi, “Nawana ekhoto ni athu oomwera wa Yuda.” Enthawi emodda aallota wi, “Nawana ekhoto ni Ayeramiyele” nave “Nawana ekhoto ni Akeni.”

¹¹ Davide voowiiphani athu attheenaalle wohimuhiyawo naari mmodda mukumi, oova wi oohallooyo aneeroya allote o Gati wi, “Davide sika ananeera nndda. Davide aaneera ddenndda enthawi ettheene akhalleeye wa Afilistinko.”

¹² Nave Akishi aanamukhulupilila Davide vooganizani wi, “Davide ohiitthattusa muthu oonanara, awiitiwa ni athwaayeene Aisraele. Ekaamba ya yeella anaakhalle oorumeyellaaka okumaaye muttheene.”