1 Samuele 26 - Mawu a Mulluku

Davide anakhootattho omwiipha Saulo

¹ Nllapo nimodda athu a o Zifi yaawa wa Saulo o Gibea, emulleella wi, “Davide aniipittha omwaangoni wa Hakila oyo ori woovollowa nndduwa wa Yeshimoni.”

² Saulo aatimulla enthawi yeeyo aya muchipululuni mwa Zifi aakusalle akhoto a Aisraele 3,000 wi yamwaashaashe Davide muchipululunimmo.

³ Yaamaka misasa ddiwa a akhoto vamwaangoni wa Hakila, oyo waari vakhwipi va musewu, wookhuma nndduwa wa Yeshimoni. Koma Davide ahiipitthave muchipululunimmo. Vano adduwenlle wi Saulo anamuthwara manyallo

⁴ Davide ahaaruma athu wi yazonde nave yahoona wi Saulo oophiya.

⁵ Vano Davide aatimulla enthawi yeeyo aya aphiya omisasani wa Saulo. Nave ahoona mvo Saulo akonilleeye ni Abinere mwaana a Nere, akhoto muullupalli a Saulo. Saulooyo akona muwari mwa musasa mmo mwaari muwari mwa misasa dda akhotwaaye.

⁶ Vano Davide aamukoha Ahimeleki Muhiti ni Abishai mwanamunne a Yowabu oyo amennya yaari Zeruya wi, “Ttaani anaathaanane ni miyaano omisasani dda Saulo?” Abisayi ahaakhulla wi, “Munaathaanane ni miyaano.”

⁷ Sika Davide ni Abishai yaaya mahiiyu omisasani wulle. Saulo aari akonaka m'musasani mwaye, atthipenlle vatthi nivaka naye omuruni waye. Abinere ni akhoto attheene yaakona moomwaapheella.

⁸ Abishai aamulleella Davide wi, “Mulluku ohuuvahani ekari mahiiyu vano wi mumweerena mudanaanyu eyo munapaalleenyu. Kaakhullelleni wi kimuhome omodda ni nivaka naye moomupataaniha ni ethaya. Ngimuhoma opiilli!”

⁹ Koma Davide aamulleella Abishai wi, “Iyaayi ohinamwiipha. Vawi Apwiya eneeromullaka oyo anaamuvoreye mwene, oozoziwa* a Apwiya.”

¹⁰ Nave Davide ahaalleella wi, “Kinnadduwella wi Apwiya sika enaamwiiphe apaalle nllapo naye nakwakhwana wi akhwe apaalle aniiphiwe okhotoni.

¹¹ Koma wakhalla wooworeya Apwiya ekikavihere wi kihimweerelle yoonanara mwene, oozoziwa ni Apwiya. Koma vano nikuse nivaka ni muno wa maaddi nnddo ddiri omuruni waye nave niroweke.”

¹² Vano Davide aakusa nivaka ni muno wa maaddi nnddo ddaari omuruni wa Saulo avenyavo. Khaavo mwa akhoto a Saulo oonille apaalle adduwella nnddo ddeereyille. Nave khaavo oyo avenyille vawi Apwiya yaaweeriha wi ekonesese.

¹³ Vano Davide aaya ekhopella emodda iimella vaddullu va mwaango. Variyari viwa vaakhalla mpata muullupalli.

¹⁴ Davide aakhuwa wa akhoto a Saulo wi, “Abinere, mwaana a Nere, onnakiiwa?” Nave olliyettho Abinere aakhuwa wi, “We ttaani onamusokosa mwene akonaka.?”

¹⁵ Davide aamukoha Abinere wi, “Ttaani ari mullopwana amasiva manchichi ookhwaranya weyaano mu Israele mutthemwene? Vano kaambiiwa tini ohinaatetezeewe apwiyaawo, mwene?” Naanweene vaava waawa muthu mmodda wenko wi awiiphe apwiyaawooyo.

¹⁶ Nndda weerilleewe khe ddaphaama. Kinimallupella vamiitthoni va Apwiya wi onaphwanella okhwa kaambiiwa khomutetezille mwene, oozoziwa a Apwiya. Ngaweha woone nivaka ni muno wa maaddi nndde ddaari omuruni wawo ddaarimi ddiri wenko.

¹⁷ Saulo aadduwella wi mawaayo yaari a Davide nave aamukoha wi, “Ethiyo mawaayo tti a we mwanaka Davide?” Davide ahaakhulla wi, “Ee, tti mawaaka, apwiyaaka amwene.

¹⁸ Kaambiiwa tini apwiya munakaashaasheenyu mi mullupa muttekwaanyu? Kheyiivo yoonanara eyo keerilleemi nave kheyiivo eyo kichimwalleemi!

¹⁹ Nyu apwiyaaka amwene, apellani maaru nnddo kinaallote mi mullupa muttekwaanyu. Yaarimi eri Apwiya eweerihalleni wi mukiwukile onapaalleya waapepesa ni mukutho. Koma yaarimi eri athu, Apwiya yaatembelele vawi aakiikariha wi kihikhallekena mu yoohallana ya Apwiya koma wi kallapelleke milluku ddimodda.

²⁰ Sika nyuwaano muhinaakhullella wi miyaano kikhwelle wuuteete ni Apwiya vawi mwene a Aisraele anapaalla okiipha mi ettotthomwa, muthu oohipaalleya, wonanko mmo athu enasayelliiwa ekhwalli m'mwaangoni.”

²¹ Vano Saulo aallota wi, “Koochimwa. Hokollowa mwanaka Davide vawi ngiweerella erive ello yoonanara vawi okumaaka tti woopaalleya wunchichi wa weyaano. Keerilleeminndda tti ddookarangeya nave koochimwa wunchichi.”

²² Davide ahaakhulla wi, “Amwene, nivaka nanyunna. Murumeni mmodda mwa akhotwaanywaayo wi anikuse.

²³ Apwiya enamudalisa muthu oororomelleya ni aweera ddaphaama. Apwiya yaakivaha ekari wi kiwiipheni koma ngaapanlle owiiphani nyuwaano mwene oozoziwa.

²⁴ Kooweerellani echifundo, wakhalla wooworeya Apwiya eneerokiteteza ni okivullusa mu ddookatamiha ddittheddene.”

²⁵ Saulo aamulleella Davide wi, “Wakhalla wooworeya Mulluku uudalise mwanaka, Davide. Nave uukavihere wi owore weera ddeko dduullupalli nave opambaneke mu ddeko ddittheddenennddo.” Vano Davide aavenyavo nave Saulo aahokollweella owaniwa.