1 Samuele 24 - Mawu a Mulluku

Davide anakhoota omwiipha Saulo

¹ Saulo awiillewo woowana ni Afilistaalle yaamulleella wi Davide ari mu echipululu ya Engedi.

² Saulo ahaakusa akhoto 3,000 ayo aatthoonlleeye variyari va akhoto attheene a Aisraele eya yamwaashaka Davide ni athwaaye o mwaango wa anaahe.

³ Yaaphiya omakhollani a enkhosa museresere mwa musewu mvo vaari nikhungu. Saulo aavollowa onikhunguninko wi iimellelle. Davide ni athwaaye yaari yiipitthalle muwariwari mwa nikhungunno.

⁴ Vaavo athu a Davidaalle yaamulleella wi, “Enthawi yookwakhwana elle Apwiya yuulleelliiwani wi, ‘Kineerewuuvaha ekari wi waagonjihe adanaawo.’ ” Vano Davide aatimulla mwawiitta aya aphadda echigamba otthoka wa mukanjo wa Saulo olliye ahidduwellaka.

⁵ Koma vatulli viwa Davidooyo khaahakallallille ni nnddo eerilleeye voophaddani otthoka wa mukanjo wa Saulooyo.

⁶ Vano ahaalleella athwaaye wi, “Wakhalla wooworeya Apwiya ekikavihere wi kihimweerelle yoonanara mwene Saulo, apwiyaaka oozoziwa* ni Apwiya. Kihinamuvoreya vawi tti oozoziwa ni Apwiya.”

⁷ Vano Davide allotilleeye mawu yaalla athwaaye yaamwiiwellella nave kheyaamweerelle erive ello yoonanara. Vano Saulo aakhumamo munikhunguni mulle anakhwaranya olendwaaye.

⁸ Vano nayeenettho Davide aakhuma amwiithana Saulo wi, “Apwiya, mwene!” Saulo amuwehille Davide aamuvaha olemu voowaramellani vatthi.

⁹ Aamukoha Saulo wi, “Kaambiiwa tini munawiiwellelleenyu athu ayo enallota wi, ‘Davide anapaalla owiiphani?’

¹⁰ Mohoonathi nyookhaanyu wi Apwiya yaakivaha ekari wi kiweerelleni yoopaallaaka ollello munikhunguni mulle. Amodda yaanakiwatihera wi kiwiipheni koma kuuhiyalleni phudda. Kaallota wi, ‘Ngaavoreya apwiya vawi tti mwene oozoziwa a Apwiya.’

¹¹ Attiitthaaka, ngayooneni echigamba ya otthoka wa mukanjwaanyu ella eri m'mattani mwaka. Vano mudduwelle wi m'murimani mwaka khamuri yoopaalla weera yoolakwa apaalle wuuwukilani vawi koophadda echigamba ya mukanjwaanyu koma wohiwiiphani. Miyaano nguulakwenlleni ello naari nyuwaano mukaashaashaka wi mukiiphe.

¹² Apwiya sika enaawoonihe wi oolakwa ttaani variyari va nyuwaano ni miyaano. Apwiya yuuhokolloselleni ddoonanara ekaamba ya nndda munakeerelleenyu. Koma miyaano ngiweerellani erive ello yoovoreya.

¹³ Athu akhalle yaallota wi, ‘Muthu oonanara mitteko ddaye tti ddoonanara.’ Sika miyaano nguuvoreyani iyaayi.

¹⁴ Ethiyo mwene a Aisraele anamwaasha aani nave nyuwaano munamwiikariha aani? Mwanapwa ookhwa! Apaalle ettotthomwa!

¹⁵ Ekaamba ya yeella Apwiya eneereweeruza wi ooneye oolakwa variyari va nyuwaano ni miyaano. Eneerokiteteza nave eneerewooniha echilungamwaaka vookivullusani wa nyuwaano.”

¹⁶ Davide amallihalle ollota mawu yaalla, Saulo aakoha wi, “Ethiyo tti we mwanaka Davide?” Vaavo Saulo ahinlla mookhuwa.

¹⁷ Aamulleella Davide wi, “We tti oolungama okikhwaranya miyaano. Vawi wookeerella ddaphaama miyaano kiweerellaka ddoonanara.

¹⁸ Ollello wookoonihella ophaamaawo ottheene voohikiiphani naari Apwiya yakivelleelle m'mattani mwawo.

¹⁹ Ethiyo muthu amuphwanya mudanaaye annaakhullella wi mudanooyo avulluwe? Apwiya eweerelle ddaphaama ekaamba ya nndda okeerelleewe ollellonndda.

²⁰ Vano ollello koodduwella wi oneerokhalla mwene nave omwene wa Aisraele oneerekokeraattheya m'mattani mwawo.

²¹ Lonjeza wi Apwiya ekhalle mbonaawo wi khawiipha naari edduullu ddaka miyaano kakhwa wi nnddina naattiitthaaka nihitiwalleye.”

²² Davide aallupella ddittheddenennddo Saulo iiwaka. Vano Saulo aahokollweella owaniwa koma Davide ni athwaaye yaaya woowiipittha onikhunguni wulle.