1 Samuele 23 - Mawu a Mulluku

Davide anaavullusa athu a etawoni ya Keila

¹ Nllapo nimodda athu yaamulleella Davide wi Afilisti enimawana ni athu a muzinda wa Keila nave enimawaakha ddoohata ddiwa m'mapuroni awuuputhella.

² Vano Davide ahaakoha Apwiya wi, “Ethiyo kiye kawanena Afilistaayo?” Apwiya yaamulleella wi, “Khawe wawanena Afilistaayo wi waavulluse muzinda wa Keila.”

³ Koma athwaaye Davide yaamulleella wi, “Ninakhalla mwawoova o Yuda weewuno ninaawoove mwawiidde naya woowana ni Afilistaayo o Keila?”

⁴ Vano Davide aavekattho ezeru wa Apwiya nave yaamwaakhulla wi, “Timulla, oye o Keila, kineerewaavelleella Afilistaayo m'mattani mwawo.”

⁵ Sika Davide ni athwaaye yaaya o Keila nave yaawana ni Afilistaayo. Yaawiipha akhoto anchichi ni owaakha eng'ombe ddiwa. Vano ahaavullusa athu a o Keila.

⁶ Abiyatara, mwaana a Ahimeleki, oyo athawenlle wa Davide aamukusa efodi* athaanana ni Davide o Keila.

⁷ Saulo iiwalle wi Davide ari o Keila, aallota wi, “Mulluku ookivaha wi kimwiiphe. Ohiikoliha yeekhaaye m'musamphani voovollowani mu muzinda oyo ori ni mpanda nave mullakwiiwa onawalleya ni mikoko ddoollipa.”

⁸ Vano ahaatthukumaniha akhotwaaye, aaruma o Keila wi yamwaapheelle Davide ni athwaaye.

⁹ Koma Davide aadduwella wi Saulo anapaalla omwiipha. Vano aamulleella mullupa mukutho Abiyatara wi aweena efodi.

¹⁰ Vano Davide aallota ni Mulluku wi, “Apwiya Mulluku a Aisraele, mi oorumeyellaanyu kohiiwa wi Saulo anapaalla owa wuno o Keila wi oononge muzindoolla ekaamba ya miyaano.

¹¹ Ethiyo athu a o Keila eneerokivelleella wa Saulo? Ethiyo Saulo aneeroowa wonanko mi oorumeyellaanyu kiiwelleemimmu? Nyu Apwiya Mulluku Aaisraele, killeelleni.” Apwiya yaamulleella wi, “Ee, Saulo eneeroowa.”

¹² Vano Davide ahaakohattho Apwiya wi, “Ethiyo athu a o Keila eneerokivelleella ni athwaaka wa Saulo?” Apwiya yahaakhulla wi, “Ee, aneerewuuvelleella.”

¹³ Vano Davide ni akhotwaaye ayo yaari 600, yaavenyawo o Keila moothawa. Saulo iiwalle wi Davide oothawawo o Keila, ahaalleella akhotwaayo wi ehiyeewo.

¹⁴ Davide iipittha m'makhunguni mu ellapo yamiyaango muchipululuni mwa Zifi. Saulo aavirellella omwaashaasha koma Mulluku khaawaakhullelle wi Davide aphariwe.

Davide anaarera ni Yonatani o Horeshi

¹⁵ Davide aadduwella wi Saulo annamwaashaasha wi amwiiphe. Enthawi yeeyo Davide aari muchipululuni mwa Zifi o etawoni ya Horeshi

¹⁶ Vano Yonatani mwaana a Saulo, aatimulla aya wa Davide o etawoni ya Horeshi nave aamullipiha murima Davide voomulleellani wi Mulluku aneeromuteteza.

¹⁷ Yonatani aamulleella Davide wi, “Ohoove, attiitthaaka khewiipha. Oneerokhalla mwene a Aisraele nave miyaano kineerokhalla aneepiilli wa weyaano. Attiitthaaka ennadduwellattho ddenndda.”

¹⁸ Vano eellaayo yaakeraatthiha echipangano vamiitthoni va Apwiya wi ehiwe yiitana. Sika Davide aakhalla o Horeshi nave Yonatani aahokollweella owaniwa.

¹⁹ Vano athu a o etawoni ya Zifi yaaya wa Saulo o Gibea, yamulleella wi, “Davide aniipittha embali yoowanihu m'makhunguni a Horeshi vamwaangoni wa Hakila olle ori omwera wa Yeshimoni.

²⁰ Vano nyu amwene, moollikana ni mmo onapaallella murimaanyu kitthani mwaapaallaka. Hiyaano nineeromuvelleella m'mattani mwanyu.”

²¹ Saulo aallota wi, “Apwiya yuudaliseni vawi mookeerella echifundo

²² Khaweni moonesese nave mwaashaashe mvo ariiyevo ni omudduwella muthu oyo amoonille. Vawi kohiiwa wi tti oochenjeresesa.

²³ Vano moonesese mapuro mattheene aniipittheeyemo nave muwettho wuno ni okilleella ddawoona ddiwa. Vano kineerewuuthwarani nave akhalla wenko kineeromwaashaasha variyari va athu attheene ellapo ettheene ya Yuda.”

²⁴ Athwaayo yaahokollweella o Zifi, Saulo ahinatimulle. Va enthawi yeeyo Davide ni athwaaye yaari muchipululuni ya Mawoni o Araba, omwera wa Yeshimoni.

²⁵ Vano Saulo ni akhotwaaye yaaya yamwaashaashaka Davide koma olliye aari iiwalle. Ella sika ekaambiiwa athawilleeye aya omwaangoni wa malluku muchipululuni ya Mawoni. Vano Saulo iiwalle wi Davide aathawella o Mawoni aamuthwara ochipululuni wenko.

²⁶ Saulo aaweella embali emodda ya mwaango nave Davide ni athwaaye yaaweella embali emodda ya mwaangooyo. Vano Davide ni athwaaye yahaakuva ethawa vawi Saulo aamwaapheella Davide ni athwaaye wi yaaphare.

²⁷ Enthawi yeeyo vaaphiya oorumiwa emulleella Saulo wi, “Akuvani! Vawi Afilisti erina waahella ekhoto Aisraele.”

²⁸ Vano Saulo aahiya omuthwara Davide aya awanaka ni Afilisti. Sika nipuro nenna nineeriwiiwa Nlluku noomwallanella.

²⁹ Davide aavenyawo wenko aya akhallaka m'makhunguni o Engedi.